கேரளம் : “முன்னேற்பாடு பணிகள் தொடரக்கூடாது!” சபரிமலை யாத்திரை குறித்து முதல்வர் அதிரடி உத்தரவு

சபரிமலை மண்டல மற்றும் மகரவிளக்கு யாத்திரை தொடங்கிய பிறகும் முன்னேற்பாட்டு பணிகள் தொடர்ந்து நடைபெறும் நிலை இந்த முறை இருக்கக்கூடாது என கேரள முதல்வர் வி.டி. சதீசன் அதிகாரிகளுக்கு உத்தரவிட்டுள்ளார்.

திருவனந்தபுரம் தைக்காடு விருந்தினர் மாளிகையில் நடைபெற்ற சபரிமலை யாத்திரைக்கான முன்னேற்பாடுகள் குறித்த ஆய்வுக் கூட்டத்தில் முதல்வர் இந்த அறிவுறுத்தல்களை வழங்கினார்.

பக்தர்களுக்குத் தேவையான அடிப்படை வசதிகள் மற்றும் பாதுகாப்பு ஏற்பாடுகளில் எந்தவிதமான குறைபாடும் ஏற்படக்கூடாது என்றும் முதல்வர் வலியுறுத்தினார்.

சன்னிதானத்தில் 24 மணி நேர கட்டுப்பாட்டு அறை

சபரிமலை சன்னிதானத்தில் அனைத்து துறைகளும் இணைந்து செயல்படும் வகையில் கூட்டு கட்டுப்பாட்டு அறை அமைக்க வேண்டும் என முதல்வர் உத்தரவிட்டார்.

பம்பா, சபரிமலை மற்றும் இடைத்தங்கல் மையங்களில் சிறப்பு தூய்மைப் பணிகளை மேற்கொள்ளவும் அறிவுறுத்தப்பட்டது. பம்பாவில் பக்தர்கள் விட்டுச் செல்லும் ஆடைகள் தேங்காமல் உடனுக்குடன் அகற்ற வேண்டும் என்றும் கூறப்பட்டது.

மேலும், பிரசாதம் தயாரிப்பதற்குத் தேவையான மூலப்பொருட்கள் போதுமான அளவில் கிடைப்பதை உறுதி செய்ய வேண்டும் என்றும், கட்டிடங்களின் உறுதித்தன்மை, தீயணைப்பு பாதுகாப்பு மற்றும் மின்சாரப் பாதுகாப்பு ஆகியவற்றை முறையாக ஆய்வு செய்ய வேண்டும் என்றும் முதல்வர் தெரிவித்தார்.

600 புதிய பயோ கழிப்பறைகள்

பக்தர்களுக்கான கழிப்பறை மற்றும் சுற்றுப்புறத் தூய்மை, குடிநீர் உள்ளிட்ட அடிப்படை வசதிகளில் சிறப்பு கவனம் செலுத்தப்பட உள்ளது. இந்த சீசனில் 600 புதிய பயோ கழிப்பறைகள் அமைக்கப்பட உள்ளன.

மேலும், பார்க்கிங் பகுதிகள் புதர் மற்றும் காடுகளால் மூடப்பட்ட நிலையில் இருக்கக்கூடாது என்றும், காவல்துறை மற்றும் சுகாதாரத்துறை உள்ளிட்ட அரசு ஊழியர்கள் சபரிமலையில் தங்குவதற்குத் தேவையான வசதிகளை திருவிதாங்கூர் தேவசம் போர்டு ஏற்படுத்த வேண்டும் என்றும் முதல்வர் உத்தரவிட்டார்.

பக்தர்களுக்கு ஆபத்தை ஏற்படுத்தும் வகையில் தடுப்புகள் அமைக்கக் கூடாது என்றும் அறிவுறுத்தப்பட்டது.

ரூ.551 கோடியில் சாலைப் பணிகள்

பொதுப்பணித்துறை சார்பில் சபரிமலை யாத்திரைக்காக ரூ.551 கோடி மதிப்பிலான சாலைப் பணிகள் மேற்கொள்ளப்படும் என அமைச்சர் பி.கே. பஷீர் தெரிவித்தார்.

பக்தர்கள் நீண்ட நேரம் காத்திருக்க வேண்டிய சூழல் ஏற்பட்டாலும் அவர்களுக்குத் தேவையான வசதிகளை ஏற்படுத்துவதில் எந்த சமரசமும் இருக்கக்கூடாது என அமைச்சர் கே. முரளீதரன் தெரிவித்தார்.

500 கூடுதல் பேருந்துகள்

இந்த ஆண்டு பக்தர்களின் போக்குவரத்து தேவையை சமாளிக்க 500 பேருந்துகளை குத்தகைக்கு எடுத்து கூடுதல் சேவைகள் இயக்கப்படும் என போக்குவரத்துத்துறை அமைச்சர் சி.பி. ஜான் தெரிவித்தார்.

உள்ளாட்சி அமைப்புகள் சார்பில் தூய்மைப் பணிகள் உள்ளிட்ட அனைத்து ஏற்பாடுகளும் முழுமையாக மேற்கொள்ளப்படும் என அமைச்சர் கே.எம். ஷாஜி தெரிவித்தார்.

தினமும் 3.25 லட்சம் அரவணா தயாரிப்பு

திருவிதாங்கூர் தேவசம் போர்டு சார்பில், அரவணா தயாரிப்பு ஆலையின் உற்பத்தித் திறன் அதிகரிக்கப்பட்டுள்ளதாக தெரிவிக்கப்பட்டது.

தினமும் சுமார் 3.25 லட்சம் அரவணா தயாரிக்க முடியும் என்றும், சீசன் தொடங்கும்போது 70 லட்சம் அரவணா கையிருப்பில் இருக்கும் என்றும் தெரிவிக்கப்பட்டுள்ளது.

அப்பம் பாக்கிங் பணிகளுக்காக இயந்திரமயமாக்கப்பட்ட வசதியும் ஏற்படுத்தப்பட உள்ளது.

பக்தர்களுக்கு ரூ.2 லட்சம் காப்பீடு

யாத்திரையின்போது உயிரிழக்கும் பக்தர்களின் குடும்பங்களுக்கு உதவும் வகையில், எல்.ஐ.சி.யுடன் இணைந்து ரூ.2 லட்சம் காப்பீட்டுத் திட்டம் செயல்படுத்தப்பட உள்ளதாக தேவசம் போர்டு தெரிவித்துள்ளது.

மேலும், அறை முன்பதிவு உள்ளிட்ட சபரிமலை யாத்திரை தொடர்பான அனைத்து சேவைகளையும் இந்த முறை டிஜிட்டல் முறையில் செயல்படுத்த திட்டமிடப்பட்டுள்ளது.

வாடகை அறைகளில் ஹவுஸ் கீப்பிங் வசதி ஏற்படுத்தப்படுவதுடன், உணவுக் கழிவுகளைச் செயல்படுத்த தூய்மை மிஷனுடன் இணைந்து புதிய ஆலை அமைக்கப்பட உள்ளது.

5,000 போலீசார் பாதுகாப்புப் பணியில்

சபரிமலை சீசனில் சுமார் 5,000 போலீசார் பாதுகாப்புப் பணியில் ஈடுபடுத்தப்பட உள்ளனர்.

சபரிமலை பகுதியில் பல்வேறு இடங்களில் ரூ.3 கோடி செலவில் போலீஸ் ஏஐ கேமராக்கள் நிறுவப்பட உள்ளன. திருவிதாங்கூர் தேவசம் போர்டு தலைமையகத்தில் 24 மணி நேரமும் செயல்படும் கட்டுப்பாட்டு அறையும் அமைக்கப்பட உள்ளது.

மேலும், தினசரி அன்னதானம் வழங்கப்படும் என்றும், சீசன் காலத்தில் 22 அவசர சுகாதார மையங்கள் செயல்படும் என்றும் தெரிவிக்கப்பட்டுள்ளது.

குடிநீர், ரயில் சேவைகளிலும் கூடுதல் ஏற்பாடுகள்

சீதத்தோட்டில் புதிய குடிநீர் ஆலை செயல்பாட்டுக்கு வந்துள்ளதால், சபரிமலைக்கு குடிநீர் வழங்க இனி டேங்கர் லாரிகளை சார்ந்திருக்க வேண்டிய நிலை இருக்காது என கேரள நீர்வாரியம் தெரிவித்துள்ளது.

பக்தர்களின் பயண வசதிக்காக 300 கூடுதல் ரயில் சேவைகள் இயக்கப்படும் என இந்திய ரயில்வே தெரிவித்துள்ளது.

பம்பாவில் பக்தர்கள் ஆடைகளை விட்டுச் செல்லும் பழக்கத்தைத் தடுக்கும் வகையில், பிற மாநிலங்களிலும் விழிப்புணர்வு பிரசாரம் மேற்கொள்ள ஆய்வுக் கூட்டத்தில் முடிவு செய்யப்பட்டது.

அடுத்த சபரிமலை முன்னேற்பாட்டு ஆய்வுக் கூட்டம் அக்டோபர் மாதம் பம்பாவில் நடைபெறும் என தெரிவிக்கப்பட்டுள்ளது.

கூட்டத்தில் சுகாதாரம், உள்ளாட்சி, நிதி, காவல்துறை, பொதுப்பணித்துறை, வருவாய், மாநில பேரிடர் மேலாண்மை ஆணையம், கேஎஸ்இபி, போக்குவரத்து, நீர்வாரியம், வனத்துறை உள்ளிட்ட பல்வேறு துறைகளின் அதிகாரிகள் கலந்து கொண்டனர். பத்தனம்திட்டா, கோட்டயம், இடுக்கி மாவட்ட ஆட்சியர்கள் மற்றும் இந்திய ரயில்வே பிரதிநிதிகளும் பங்கேற்றனர்.