தமிழ்நாட்டில் ரூ.1,000 கோடி முதலீடு முதல் 2,600 வேலைவாய்ப்புகள் வரை! GCC துறையில் அடுத்த அதிரடி!

லண்டன்: தமிழ்நாட்டில் உலகளாவிய திறன் மையங்கள் (Global Capability Centres – GCCs) அமைப்பதற்கும், ஏற்கனவே செயல்பட்டு வரும் மையங்களை விரிவுபடுத்துவதற்கும் இரண்டு முக்கிய புரிந்துணர்வு ஒப்பந்தங்கள் கையெழுத்தாகியுள்ளன.

இதன் மூலம் தமிழ்நாட்டில் தொழில்நுட்பம், தகவல் தொடர்பு, எம்பெடட் சிஸ்டம்ஸ், மின்மயமாக்கல் மற்றும் தொழில்துறை டிஜிட்டல்மயமாக்கல் உள்ளிட்ட உயர் மதிப்பு துறைகளில் ஆயிரக்கணக்கான புதிய வேலைவாய்ப்புகள் உருவாகும் வாய்ப்பு ஏற்பட்டுள்ளது.

சென்னையில் ரூ.1,000 கோடி முதலீடு

இங்கிலாந்தை தலைமையிடமாகக் கொண்ட முன்னணி உலகளாவிய தகவல் தொடர்பு நிறுவனம், தமிழ்நாட்டில் புதிய உலகளாவிய திறன் மையத்தை அமைக்க திட்டமிட்டுள்ளது.

இதற்கான புரிந்துணர்வு ஒப்பந்தத்தை தமிழ்நாடு அரசின் வழிகாட்டி நிறுவனமும் (Guidance), ஏர்ன்ஸ்ட் & யங் (Ernst & Young) நிறுவனமும் மேற்கொண்டுள்ளன.

சுமார் ரூ.1,000 கோடி முதலீட்டில் அமைய உள்ள இந்த GCC மையம் மூலம் 2,000-க்கும் மேற்பட்ட உயர் மதிப்புடைய வேலைவாய்ப்புகள் உருவாகும் என தெரிவிக்கப்பட்டுள்ளது.

இந்த மையம் சென்னையின் மவுண்ட் பூந்தமல்லி சாலை பகுதியில் புதிதாக அறிவிக்கப்பட்டுள்ள GCC காரிடார் பகுதியில் அமைக்கப்பட உள்ளது. இதன் மூலம் சென்னை, உலகளாவிய திறன் மையங்களுக்கான முக்கிய தொழில்நுட்ப மையமாக மேலும் வளர வாய்ப்பு ஏற்பட்டுள்ளது.

திருச்சி, சென்னையில் சிக்மா டெக்னாலஜி விரிவாக்கம்

இதனிடையே, ஸ்வீடனைச் சேர்ந்த சிக்மா டெக்னாலஜி குரூப் (Sigma Technology Group) நிறுவனம் தமிழ்நாட்டில் தனது உலகளாவிய திறன் மையங்களை மேலும் விரிவுபடுத்த முடிவு செய்துள்ளது.

தனது இந்திய நிறுவனமான ஸ்ரியா சொல்யூஷன்ஸ் மூலம் திருச்சிராப்பள்ளி மற்றும் சென்னையில் செயல்பட்டு வரும் GCC மையங்களை விரிவுபடுத்துவதற்காக தமிழ்நாடு அரசின் வழிகாட்டி நிறுவனத்துடன் புரிந்துணர்வு ஒப்பந்தம் கையெழுத்தாகியுள்ளது.

இந்த விரிவாக்கத்தின் மூலம் எம்பெடட் சிஸ்டம்ஸ், மின்மயமாக்கல் மற்றும் தொழில்துறை டிஜிட்டல்மயமாக்கல் உள்ளிட்ட துறைகளில் சுமார் 600 உயர் மதிப்பு வேலைவாய்ப்புகள் உருவாக்க இலக்கு நிர்ணயிக்கப்பட்டுள்ளது.

முதலமைச்சர் முன்னிலையில் ஒப்பந்தம்

தமிழ்நாடு முதலமைச்சர் ச. ஜோசப் விஜய் முன்னிலையில் நடைபெற்ற நிகழ்ச்சியில், சிக்மா டெக்னாலஜி குரூப் நிறுவனத்தின் நிறுவனர் மற்றும் தலைமை நிர்வாக அதிகாரி மைக்கேல் கார்ல்சன், ஸ்ரியா நிறுவனத்தின் தலைமை நிர்வாக அதிகாரி கிருஷ்ணா ராதாகிருஷ்ணன் மற்றும் தமிழ்நாடு அரசின் வழிகாட்டி நிறுவனத்தின் நிர்வாக இயக்குநர் தீபக் ஜேக்கப், IAS ஆகியோர் புரிந்துணர்வு ஒப்பந்தத்தை பரிமாறிக் கொண்டனர்.

இந்த இரண்டு திட்டங்களையும் சேர்த்து பார்க்கும்போது, தமிழ்நாட்டில் GCC துறையில் 2,600-க்கும் மேற்பட்ட உயர் மதிப்பு வேலைவாய்ப்புகள் உருவாகும் என எதிர்பார்க்கப்படுகிறது.

இந்நிகழ்ச்சியில் இங்கிலாந்துக்கான இந்திய தூதர் குமரன் பெரியசாமி, IFS, சம்பந்தப்பட்ட நிறுவனங்களின் பிரதிநிதிகள் மற்றும் தமிழ்நாடு அரசின் உயர் அலுவலர்கள் கலந்து கொண்டனர்.

உலகளாவிய நிறுவனங்களை தமிழ்நாட்டில் முதலீடு செய்ய ஈர்ப்பதுடன், உயர் திறன் கொண்ட மனிதவளத்திற்கான வேலைவாய்ப்புகளை உருவாக்கும் வகையில் இந்த ஒப்பந்தங்கள் முக்கியத்துவம் பெற்றுள்ளன.