40-க்கும் மேற்பட்ட வழக்குகளில் சிக்கிய ‘கொடூர குற்றவாளி’ கைது! மரக்கிளைகளில் வீடு அமைத்து பதுங்கியிருந்தார்!

திருவனந்தபுரம்:

கேரள மாநிலம் திருவனந்தபுரம் அருகே பாலராமபுரம் புன்னக்காடு பகுதியைச் சேர்ந்த ஜம்புலிங்கம் சுரேஷ் என்பவரை பாலராமபுரம் போலீசார் கைது செய்துள்ளனர். சுமார் 40 வழக்குகளில் குற்றம்சாட்டப்பட்டுள்ள சுரேஷ், போலீசாரிடம் சிக்காமல் இருப்பதற்காக மரக்கிளைகளுக்கு இடையே தற்காலிகமாக அமைக்கப்பட்டிருந்த மறைவிடத்தில் பதுங்கியிருந்ததாக போலீசார் தெரிவித்துள்ளனர்.

அருகில் வசிக்கும் இளம் பெண்ணை தாக்கி அவரது செல்போனை பறித்துச் சென்றதாக அளிக்கப்பட்ட புகார் தொடர்பாக போலீசார் விசாரணை மேற்கொண்டபோது சுரேஷின் இருப்பிடம் குறித்து தகவல் கிடைத்ததாக கூறப்படுகிறது. ‘ஆபரேஷன் கிரிப்’ நடவடிக்கையின் ஒரு பகுதியாக சுரேஷை கைது செய்ய பாலராமபுரம் போலீசார் நடவடிக்கை மேற்கொண்டனர்.

போலீசாரின் தகவலின்படி, சுரேஷ் ஏற்கனவே 12 ஆண்டுகள் சிறைத் தண்டனை அனுபவித்து முடித்துவிட்டு சொந்த ஊருக்கு திரும்பிய பின்னர், மீண்டும் ஒரு குழுவை உருவாக்கி வழிப்பறி உள்ளிட்ட குற்றச்செயல்களில் ஈடுபட்டதாக கூறப்படுகிறது. மேலும், அருகில் வசிக்கும் பெண்ணின் வீட்டின் மீது தாக்குதல் நடத்தி, நகைகள் உள்ளிட்ட பொருட்களை திருடிச் சென்றதாகவும் அவர் மீது புகார் இருப்பதாக போலீசார் தெரிவித்துள்ளனர்.

சுரேஷ் அப்பகுதியில் கட்டுமானப் பணிகள் நிறைவடையாத ஒரு வீட்டில் தங்கியிருப்பதாக போலீசாருக்கு தகவல் கிடைத்தது. இதையடுத்து, பாலராமபுரம் காவல் நிலைய அதிகாரி தலைமையிலான போலீஸ் குழுவினர் அங்கு சென்றனர். போலீசாரை பார்த்ததும் சுரேஷ் கட்டிடத்தின் இரண்டாவது மாடியில் இருந்து குதித்து தப்பிக்க முயன்றதாக கூறப்படுகிறது. இருப்பினும், போலீசார் அவரை பின்தொடர்ந்து சென்று பிடித்து கைது செய்தனர்.

கைது செய்யப்பட்ட சுரேஷிடம் போலீசார் தொடர்ந்து விசாரணை நடத்தி வருகின்றனர். அவர் மீது நிலுவையில் உள்ள வழக்குகள் மற்றும் சமீபத்திய குற்றச்சம்பவங்களில் அவருக்கு உள்ள தொடர்பு குறித்து மேலும் விசாரணை நடைபெற்று வருகிறது.