வரலாறு படைத்த பிரக்ஞானந்தா! Grand Chess Tour பட்டத்தை வென்ற முதல் இந்தியர்.

அமெரிக்கா, ஆக. 29:

இந்திய செஸ் உலகிற்கு மேலும் ஒரு வரலாற்றுச் சாதனையைப் பெற்றுத் தந்துள்ளார் கிராண்ட்மாஸ்டர் ஆர். பிரக்ஞானந்தா. அமெரிக்காவின் செயின்ட் லூயிஸில் நடைபெற்ற 2026 Grand Chess Tour இறுதிப்போட்டியில், உலகின் முன்னணி வீரர்களில் ஒருவரான ஃபேபியானோ கருவானாவை வீழ்த்தி பிரக்ஞானந்தா சாம்பியன் பட்டம் வென்றுள்ளார். இந்த வெற்றியின் மூலம் Grand Chess Tour பட்டத்தை வென்ற முதல் இந்திய வீரர் என்ற பெருமையை அவர் பெற்றுள்ளார்.

6 புள்ளிகள் பின்தங்கிய நிலையில் அபார கம்பேக்

இறுதிப்போட்டியின் தொடக்கத்தில் பிரக்ஞானந்தாவுக்கு கடும் சவால் காத்திருந்தது. கிளாசிக்கல் ஆட்டங்களுக்குப் பிறகு ஃபேபியானோ கருவானா 9–3 என்ற கணக்கில் முன்னிலையில் இருந்தார்.

இதனால் ஆறு புள்ளிகள் பின்தங்கியிருந்த பிரக்ஞானந்தா, அடுத்தடுத்த ரேபிட் மற்றும் பிளிட்ஸ் ஆட்டங்களில் தனது திறமையை வெளிப்படுத்தினார். வேகமான ஆட்டங்களில் தொடர்ந்து சிறப்பாக செயல்பட்டு புள்ளி வித்தியாசத்தை குறைத்த அவர், இறுதியில் 15–13 என்ற மொத்த புள்ளிக்கணக்கில் கருவானாவை வீழ்த்தி சாம்பியன் பட்டத்தை கைப்பற்றினார்.

பரிசுத்தொகை எவ்வளவு?

Grand Chess Tour இறுதிப்போட்டில் சாம்பியன் பட்டம் வென்றதற்காக பிரக்ஞானந்தாவுக்கு 2 லட்சம் அமெரிக்க டாலர் பரிசுத்தொகையாக வழங்கப்பட்டுள்ளது. இந்திய மதிப்பில் இது சுமார் ரூ.1.7 கோடிக்கும் அதிகம் ஆகும்.

மேலும், 2026 Grand Chess Tour முழுவதும் பிரக்ஞானந்தா சிறப்பான ஆட்டத்தை வெளிப்படுத்தியதால், அந்த ஆண்டின் Tour மூலம் அவரது மொத்தப் பரிசுத்தொகை 4 லட்சம் அமெரிக்க டாலரைத் தாண்டியதாக தகவல்கள் தெரிவிக்கின்றன.

ஒரே ஆண்டில் அடுத்தடுத்து சாதனைகள்

2026ஆம் ஆண்டு பிரக்ஞானந்தாவின் செஸ் வாழ்க்கையில் மிகவும் முக்கியமான ஆண்டாக அமைந்துள்ளது. Grand Chess Tour வெற்றிக்கு முன்பாகவே அவர் Norway Chess போட்டியிலும் சாம்பியன் பட்டம் வென்று அசத்தியிருந்தார்.

அதனைத் தொடர்ந்து செயின்ட் லூயிஸ் Rapid & Blitz போட்டியிலும் சிறப்பாக செயல்பட்ட அவர், Sinquefield Cup-ல் இரண்டாவது இடத்தைப் பகிர்ந்தார். இதன் தொடர்ச்சியாக Grand Chess Tour ஒட்டுமொத்த பட்டத்தையும் கைப்பற்றி தனது சர்வதேச ஆதிக்கத்தை நிரூபித்துள்ளார்.

அடுத்த Grand Chess Tour-க்கும் தகுதி

Grand Chess Tour பட்டத்தை வென்றதன் மூலம், பிரக்ஞானந்தா அடுத்த ஆண்டு நடைபெறவுள்ள Grand Chess Tour-க்கும் தகுதி பெற்றுள்ளார். இந்திய செஸ் வரலாற்றில் இந்தப் பட்டத்தை வென்ற முதல் வீரர் என்ற சாதனை அவரது சர்வதேச பயணத்தில் மேலும் ஒரு முக்கிய மைல்கல்லாக அமைந்துள்ளது.

21 வயதிலேயே உலகின் முன்னணி வீரர்களை வீழ்த்தி தொடர்ந்து பெரிய பட்டங்களை வென்று வரும் பிரக்ஞானந்தாவின் இந்த சாதனை, இந்திய செஸ் ரசிகர்களிடையே பெரும் உற்சாகத்தை ஏற்படுத்தியுள்ளது.