பையூர் தோட்டக்கலை கல்லூரியில் NSS மாணவர்கள் களப்பயணம் – வேளாண் தொழில்நுட்பங்கள் குறித்து நேரடி பயிற்சி.

கிருஷ்ணகிரி மாவட்டம், காவேரிப்பட்டணம் அருகே உள்ள நடுப்பையூர் அரசு மேல்நிலைப் பள்ளியில் நடைபெற்று வரும் நாட்டு நலப்பணித் திட்ட (NSS) சிறப்பு முகாமின் ஆறாம் நாள் நிகழ்வாக, மாணவர்கள் பையூரில் உள்ள தோட்டக்கலை கல்லூரி மற்றும் ஆராய்ச்சி நிறுவனத்திற்கு களப்பயணம் மேற்கொண்டனர்.

நடுப்பையூர் அரசு மேல்நிலைப் பள்ளியில் கடந்த செப்டம்பர் 26-ம் தேதி முதல் NSS சிறப்பு முகாம் நடைபெற்று வருகிறது. அதன் தொடர்ச்சியாக அக்டோபர் 1-ம் தேதி நடைபெற்ற களப்பயணத்தில் 25-க்கும் மேற்பட்ட NSS மாணவர்கள் பங்கேற்றனர்.

வேளாண் படிப்புகள் குறித்து விளக்கம்

பையூர் தோட்டக்கலை கல்லூரி மற்றும் ஆராய்ச்சி நிறுவனத்தில் மாணவர்களுக்கு பல்வேறு வேளாண் சார்ந்த தகவல்கள் எடுத்துரைக்கப்பட்டன.

உதவி பேராசிரியர் மங்கம்மாள், வேளாண் படிப்புகள் மற்றும் அதனுடன் தொடர்புடைய கல்வி வாய்ப்புகள் குறித்து மாணவர்களுக்கு விளக்கமளித்தார்.

தொடர்ந்து உதவி வேளாண் அலுவலர் ஜி. பரமசிவம், மியாசகி மாம்பழ ரகம், ஆப்பிள் தாவர வளர்ப்பு, பல்வேறு திராட்சை ரகங்கள், மண்புழு உரம் தயாரிக்கும் முறைகள், மருத்துவத் தாவரங்கள் மற்றும் பல்வேறு மா ரகங்கள் குறித்து மாணவர்களுக்கு விரிவாக எடுத்துரைத்தார்.

மேலும், வேளாண் மற்றும் தோட்டக்கலைத் துறையில் நடைமுறையில் மேற்கொள்ளப்படும் செயல்முறைகள் குறித்தும் மாணவர்கள் நேரடியாக அறிந்துகொண்டனர்.

ஆசிரியர்கள், மாணவர்கள் பங்கேற்பு

இந்த களப்பயணத்தில் பள்ளியின் நாட்டு நலப்பணித் திட்ட அலுவலர் சி. வேல், முதுகலை வேதியியல் ஆசிரியர் இரா. பக்தவச்சலம், முதுகலை உயிரியல் ஆசிரியர் வெ. சக்தி, ஆய்வக உதவியாளர் கோ. தமிழ்ச்செல்வி, SMC ஆசிரியர் ஜெ. சரவணன் உள்ளிட்டோர் கலந்து கொண்டனர்.

மேலும், 25-க்கும் மேற்பட்ட NSS மாணவர்கள் களப்பயணத்தில் பங்கேற்று, வேளாண் மற்றும் தோட்டக்கலை சார்ந்த தொழில்நுட்பங்களை நேரடியாக அறிந்துகொண்டனர்.