தமிழக வெற்றிக்குரல் தருமபுரியில் மக்கள் குறைதீர்க்கும் நாள் கூட்டம்: 702 மனுக்கள் பெறப்பட்டன – இரத்த தான ஒருங்கிணைப்பாளர்களுக்கு பாராட்டு.
By
Ps.Velu Siva
தருமபுரி மாவட்ட ஆட்சியர் அலுவலகத்தில் நடைபெற்ற மக்கள் குறைதீர்க்கும் நாள் கூட்டத்தில், பொதுமக்களிடமிருந்து பல்வேறு கோரிக்கைகள் தொடர்பாக மொத்தம் 702 மனுக்கள் பெறப்பட்டன. மனுக்களை மாவட்ட ஆட்சியர் சரவணன், இ.ஆ.ப., பெற்றுக்கொண்டு, உரிய நடவடிக்கை மேற்கொள்ள அதிகாரிகளுக்கு உத்தரவிட்டார்.
அடிப்படை வசதிகள் முதல் அரசு உதவிகள் வரை கோரிக்கைகள்
மக்கள் குறைதீர்க்கும் நாள் கூட்டத்தில் பொதுமக்கள் சாலை வசதி, குடிநீர் வசதி, பேருந்து வசதி உள்ளிட்ட பல்வேறு அடிப்படை வசதிகள் தொடர்பான கோரிக்கைகளை முன்வைத்தனர்.
மேலும், பட்டா, சிட்டா பெயர் மாற்றம், புதிய குடும்ப அட்டை, வாரிசு சான்றிதழ், வேலைவாய்ப்பு, இலவச வீட்டுமனைப் பட்டா, முதியோர் ஓய்வூதியம் உள்ளிட்ட பல்வேறு அரசு உதவிகள் தொடர்பாகவும் மனுக்கள் அளிக்கப்பட்டன.
மாற்றுத்திறனாளிகளும் தங்களுக்கு தேவையான உதவித்தொகைகள் மற்றும் உதவி உபகரணங்கள் வழங்கக் கோரி மனுக்களை அளித்தனர்.
மனுக்களுக்கு விரைந்து தீர்வு காண ஆட்சியர் உத்தரவு
பொதுமக்களிடமிருந்து பெறப்பட்ட அனைத்து மனுக்களும் சம்பந்தப்பட்ட துறை அலுவலர்களிடம் வழங்கப்பட்டன. தகுதியான மனுக்களுக்கு அரசின் விதிமுறைகளுக்கு உட்பட்டு விரைந்து தீர்வு காண வேண்டும் என மாவட்ட ஆட்சியர் அதிகாரிகளுக்கு அறிவுறுத்தினார்.
பொதுமக்கள் அளிக்கும் கோரிக்கை மனுக்கள் மீது துறை அலுவலர்கள் உரிய நடவடிக்கை மேற்கொண்டு, தகுதியான கோரிக்கைகளுக்கு உடனுக்குடன் தீர்வு வழங்க வேண்டும் என்றும் அவர் உத்தரவிட்டார்.
மேலும், தருமபுரி மாவட்டத்தை வளர்ச்சிப் பாதைக்கு கொண்டு செல்ல அனைவரும் ஒன்றிணைந்து செயல்பட வேண்டும் என மாவட்ட ஆட்சியர் சரவணன் தெரிவித்தார்.
2,657 யூனிட் இரத்தம் வழங்கிய 34 குழுக்களுக்கு பாராட்டு
மக்கள் குறைதீர்க்கும் நாள் கூட்டத்தின் போது, NVBD 2026 முகாம் மூலம் அரசு தருமபுரி மருத்துவக் கல்லூரி மருத்துவமனை இரத்த மையத்திற்கு 2,657 யூனிட் இரத்தம் வழங்கிய பல்வேறு கல்லூரிகள், அரசு அலுவலகங்கள் மற்றும் தன்னார்வ தொண்டு நிறுவனங்களைச் சேர்ந்த 34 இரத்த ஒருங்கிணைப்பாளர் குழுக்களுக்கு பாராட்டு தெரிவிக்கப்பட்டது.
இதையடுத்து, இரத்த தானம் மற்றும் ஒருங்கிணைப்புப் பணிகளில் சிறப்பாக செயல்பட்ட குழுக்களுக்கு மாவட்ட ஆட்சியர் சரவணன் பாராட்டுச் சான்றிதழ்களை வழங்கினார்.
அதிகாரிகள் பங்கேற்பு
இக்கூட்டத்தில் மாவட்ட வருவாய் அலுவலர் கவிதா, மாவட்ட ஊரக வளர்ச்சி முகமை திட்ட இயக்குநர் மதுமதி, தருமபுரி வருவாய் கோட்டாட்சியர் ஜார்ஜ், அரூர் வருவாய் கோட்டாட்சியர் செம்மலை, துணை ஆட்சியர் பயிற்சி லார்சன் இஸ்ரேல் உள்ளிட்ட தொடர்புடைய அரசுத்துறை உயர் அலுவலர்கள் கலந்து கொண்டனர்.
