புகார் கொடுக்கச் சென்ற குடும்பத்துக்கு காவல் நிலையத்தில் தாக்குதலா? பெண்ணிடம் அத்துமீறல் புகார் – ஆட்சியரிடம் பரபரப்பு மனு.

தருமபுரி மாவட்டம் பாலக்கோடு அருகே உள்ள ஜோதிஅள்ளி கரம்பு கிராமத்தில், குடும்பப் பிரச்சினை தொடர்பாக புகார் அளிக்கச் சென்ற தங்களையே போலீசார் தாக்கி துன்புறுத்தியதாகவும், பெண்ணிடம் காவல்துறையினர் அத்துமீறலில் ஈடுபட்டதாகவும் குற்றச்சாட்டு எழுந்துள்ளது. இதுதொடர்பாக பாதிக்கப்பட்டதாக கூறப்படும் பெண் தேவி, தருமபுரி மாவட்ட ஆட்சியரிடம் மனு அளித்துள்ளார்.

மனுவில் தேவி தெரிவித்துள்ளதாவது:

ஜோதிஅள்ளி கிராமத்தைச் சேர்ந்த பொன்னுசாமியின் மனைவியான தேவி, தனது கணவருடன் இணைந்து வீட்டின் அருகே செங்கல் சூளை மற்றும் கோழிக் கொட்டகை அமைத்து தொழில் செய்து வருவதாக தெரிவித்துள்ளார்.

கடந்த சில நாட்களாக தங்களது வீட்டிற்கான மின்சாரம் அடிக்கடி துண்டிக்கப்பட்டதாகவும், இதுகுறித்து மின்வாரியத்திற்கு தகவல் தெரிவித்ததாகவும் கூறியுள்ளார். சம்பவ இடத்திற்கு வந்த மின்வாரிய ஊழியர்கள் ஆய்வு செய்துவிட்டு பிரச்சினை இல்லை என தெரிவித்துச் சென்றதாகவும், ஆனால் தொடர்ந்து மின்தடை ஏற்பட்டதால் தங்களது தொழில் பாதிக்கப்பட்டதாகவும் மனுவில் குறிப்பிட்டுள்ளார்.

இந்த நிலையில், கடந்த மாதம் மர்ம நபர்கள் 5 பேர் தங்களது வீட்டின் மின் பியூஸ் கேரியரை பிடுங்கியதாகவும், அப்போது சூர்யபிரகாஷ் என்பவர் மட்டும் சிக்கியதாகவும், மற்றவர்கள் அங்கிருந்து தப்பிச் சென்றதாகவும் தெரிவித்துள்ளார்.

இதுகுறித்து மாரண்டஅள்ளி காவல் நிலையத்திற்கு தகவல் அளிக்கப்பட்டதாகவும், தகவலின் பேரில் சம்பவ இடத்திற்கு வந்த பாலக்கோடு போலீசார், சிக்கிய சூர்யபிரகாஷ் மீது உரிய நடவடிக்கை எடுக்கவில்லை என்றும் குற்றம்சாட்டியுள்ளார்.

இதுகுறித்து தனது கணவர் பொன்னுசாமி கேள்வி எழுப்பியதால் போலீசார் ஆத்திரமடைந்து தங்களது குடும்பத்தினரை துன்புறுத்தியதாகவும் தேவி தனது மனுவில் தெரிவித்துள்ளார்.

மேலும், தனது கணவர் பொன்னுசாமி மற்றும் மகளை போலீசார் மிரட்டியதாகவும், தனது மகளின் கையை முறுக்கிப் பிடித்து காயப்படுத்தியதாகவும் அவர் குற்றம்சாட்டியுள்ளார்.

தொடர்ந்து தனது கணவர் பொன்னுசாமியை பாலக்கோடு காவல் நிலையத்திற்கு அழைத்துச் சென்று அங்கு வைத்து தாக்கி துன்புறுத்தியதாகவும், இதன் காரணமாக அவரது உடல்நிலை பாதிக்கப்பட்டு தற்போது வேலைக்குச் செல்ல முடியாத நிலையில் இருப்பதாகவும் தேவி தெரிவித்துள்ளார்.

மேலும், தங்கள் குடும்பத்தினர் மீதே வழக்குப்பதிவு செய்துவிடுவதாக போலீசார் மிரட்டி வருவதாகவும், இதனால் குடும்பத்தினர் அச்சத்தில் இருப்பதாகவும் அவர் குறிப்பிட்டுள்ளார்.

பெண்ணிடம் காவல்துறையினர் அத்துமீறலில் ஈடுபட்டதாக கூறப்படும் குற்றச்சாட்டு தொடர்பாகவும் உரிய விசாரணை நடத்த வேண்டும் என மனுவில் கோரிக்கை விடுக்கப்பட்டுள்ளது.

இந்தப் புகார்கள் தொடர்பாக உண்மை நிலையை கண்டறிய உரிய விசாரணை நடத்தப்பட வேண்டும் என்றும், தங்களது குடும்பத்திற்கு பாதுகாப்பு வழங்க வேண்டும் என்றும் தேவி கோரிக்கை விடுத்துள்ளார்.

மேலும், சம்பவம் தொடர்பாக தருமபுரி மாவட்ட காவல் கண்காணிப்பாளர், தமிழக காவல்துறை இயக்குநர் மற்றும் தமிழக அரசு உரிய விசாரணை நடத்தி, குற்றச்சாட்டுகள் உண்மை என தெரியவந்தால் சம்பந்தப்பட்ட காவல்துறையினர் மீது நடவடிக்கை எடுக்க வேண்டும் எனவும் கோரிக்கை விடுக்கப்பட்டுள்ளது.

குறிப்பு: மேற்கண்ட தகவல்கள் மாவட்ட ஆட்சியரிடம் அளிக்கப்பட்ட மனுவில் தெரிவிக்கப்பட்ட குற்றச்சாட்டுகளின் அடிப்படையிலானவை. குற்றச்சாட்டுகளின் உண்மைத் தன்மை குறித்து அதிகாரப்பூர்வ விசாரணை முடிவுகள் வெளியாகவில்லை.