பால் உற்பத்தியாளர்களுக்கு குட் நியூஸ்! கொள்முதல் விலை லிட்டருக்கு ரூ.44 ஆக உயர்வு – முதல்வர் விஜய் அறிவிப்பு

சென்னை: தமிழகத்தில் பால் உற்பத்தியாளர்களுக்கு முக்கிய அறிவிப்பை முதலமைச்சர் விஜய் வெளியிட்டுள்ளார். பால் கொள்முதல் விலை லிட்டருக்கு மேலும் ரூ.3 உயர்த்தப்பட்டு, இனி ரூ.44-க்கு கொள்முதல் செய்யப்படும் என சட்டப்பேரவையில் முதலமைச்சர் அறிவித்துள்ளார்.

தமிழ்நாடு சட்டப்பேரவை கூட்டத்தொடரில் இன்று விதி 110-ன் கீழ் முதலமைச்சர் விஜய் இந்த அறிவிப்பை வெளியிட்டார்.

லிட்டருக்கு மேலும் ரூ.3 உயர்வு

தமிழகத்தில் பால் உற்பத்தியாளர்களின் கோரிக்கையை ஏற்று, ஏற்கனவே பால் கொள்முதல் விலை லிட்டருக்கு ரூ.38-ல் இருந்து ரூ.41 ஆக உயர்த்தப்பட்டிருந்தது.

இந்நிலையில், கறவை மாடுகளுக்கான தீவனம் உள்ளிட்ட இடுபொருட்களின் விலை தொடர்ந்து அதிகரித்து வருவதால், பால் கொள்முதல் விலையை மேலும் உயர்த்த வேண்டும் என உற்பத்தியாளர்கள் அரசிடம் கோரிக்கை விடுத்து வந்தனர்.

இதனை கருத்தில் கொண்டு, தற்போது கொள்முதல் விலையில் மேலும் ரூ.3 உயர்வு அறிவிக்கப்பட்டுள்ளது.

இதன்படி, பால் உற்பத்தியாளர்களிடம் இருந்து ஒரு லிட்டர் பால் ரூ.44-க்கு கொள்முதல் செய்யப்படும் என முதலமைச்சர் விஜய் தெரிவித்துள்ளார்.

3.15 லட்சம் பால் உற்பத்தியாளர்கள் பயன்பெறுவர்

இந்த விலை உயர்வின் மூலம் தமிழ்நாடு பால் உற்பத்தியாளர் கூட்டுறவு சங்கங்களின் கீழ் செயல்பட்டு வரும் சுமார் 3.15 லட்சம் பால் உற்பத்தியாளர்கள் நேரடியாக பயன்பெறுவார்கள் என தெரிவிக்கப்பட்டுள்ளது.

தீவனம் மற்றும் உற்பத்தி செலவுகள் அதிகரித்து வரும் நிலையில், பால் கொள்முதல் விலை உயர்த்தப்பட்டிருப்பது உற்பத்தியாளர்களுக்கு ஓரளவு நிவாரணமாக அமையும் என எதிர்பார்க்கப்படுகிறது.

பால் உற்பத்தியாளர்கள் வரவேற்பு

பால் கொள்முதல் விலையை உயர்த்த வேண்டும் என உற்பத்தியாளர்கள் தொடர்ந்து கோரிக்கை வைத்து வந்த நிலையில், தற்போது லிட்டருக்கு ரூ.44 என விலை நிர்ணயம் செய்யப்பட்டிருப்பதை பால் உற்பத்தியாளர்கள் வரவேற்றுள்ளதாக தகவல்கள் தெரிவிக்கின்றன.

இதன் மூலம் பால் உற்பத்தியாளர்களின் வருமானம் அதிகரிப்பதுடன், கூட்டுறவு சங்கங்களுக்கு பால் வழங்கும் உற்பத்தியாளர்களின் எண்ணிக்கையும் அதிகரிக்க வாய்ப்பு இருப்பதாக எதிர்பார்க்கப்படுகிறது.