நானா படேக்கர் காலமானார்! – 75 வயதில் மாரடைப்பால் உயிரிழப்பு.

இந்தி மற்றும் மராத்தி திரைப்படங்களில் தனது தனித்துவமான நடிப்பால் தனி முத்திரை பதித்த பழம்பெரும் நடிகர் நானா படேக்கர் (75) காலமானார். வியாழக்கிழமை காலை கோவாவில் உள்ள அவரது இல்லத்தில் மாரடைப்பு ஏற்பட்ட நிலையில் அவர் உயிரிழந்ததாக தகவல் வெளியாகியுள்ளது. அவரது மகன் மல்ஹார் படேக்கரும் மரணத்தை உறுதிப்படுத்தியுள்ளார்.

விஸ்வநாத் படேக்கர் என்பது நானா படேக்கரின் இயற்பெயர். கோவாவில் உள்ள அவரது இல்லத்தில் அவர் உடல்நலக்குறைவு காரணமாக சுயநினைவின்றி கிடந்ததாகவும், தகவல் கிடைத்ததும் மருத்துவக் குழுவினர் அங்கு சென்று அவரை மருத்துவமனைக்கு அழைத்துச் சென்றதாகவும் தெரிவிக்கப்பட்டுள்ளது.

மணிப்பால் மருத்துவமனையின் மூத்த மருத்துவர் டாக்டர் சேகர் சல்கர் தெரிவித்த தகவலின்படி, அதிகாலை சுமார் 4.18 மணியளவில் மருத்துவக் குழுவினர் நானா படேக்கரை பார்க்க அவரது இல்லத்துக்கு சென்றனர். அப்போது அவர் மிகவும் ஆபத்தான நிலையில் இருந்ததாகவும், தொடர்ந்து சிபிஆர் சிகிச்சை அளித்தபடியே மருத்துவமனைக்கு அழைத்துச் சென்றதாகவும் தெரிவிக்கப்பட்டுள்ளது. மருத்துவமனையிலும் சிகிச்சை தொடர்ந்த நிலையில், காலை 5.20 மணிக்கு அவர் உயிரிழந்ததாக அறிவிக்கப்பட்டது.

சுமார் 45 நிமிடங்களுக்கும் மேலாக சிபிஆர் உள்ளிட்ட உயிர்காக்கும் சிகிச்சைகள் அளிக்கப்பட்டதாகவும், அவரது மரணம் தொடர்பாக மெடிக்கோ-லீகல் கேஸ் (MLC) பதிவு செய்யப்பட்டுள்ளதாகவும் தகவல்கள் தெரிவிக்கின்றன. மரணத்திற்கான காரணம் மாரடைப்பு என முதற்கட்டமாக தெரிவிக்கப்பட்டாலும், மரணத்திற்கான மருத்துவ காரணம் குறித்து முழுமையான தகவல் பிரேதப் பரிசோதனைக்குப் பின்னரே தெளிவாகும் என மருத்துவத் தரப்பில் தெரிவிக்கப்பட்டுள்ளது. அவரது உடல் கோவா மருத்துவக் கல்லூரிக்கு பிரேதப் பரிசோதனைக்காக கொண்டு செல்லப்பட்டதாகவும் தகவல் வெளியாகியுள்ளது.

‘கமன்’ முதல் ‘வெல்கம்’ வரை…

1978ஆம் ஆண்டு வெளியான ‘கமன்’ திரைப்படத்தின் மூலம் திரையுலகில் அறிமுகமான நானா படேக்கர், பல்வேறு கதாபாத்திரங்களில் தனது வித்தியாசமான நடிப்பை வெளிப்படுத்தினார். குறிப்பாக ‘பரிந்தா’, ‘பிரஹார்’, ‘கிராந்திவீர்’, ‘வஜூத்’, ‘யஷ்வந்த்’, ‘அப் தக் சப்பன்’, ‘அபஹரண்’, ‘ராஜ்நீதி’, ‘வெல்கம்’ உள்ளிட்ட திரைப்படங்களில் அவரது நடிப்பு பெரும் கவனம் பெற்றது.

1988ஆம் ஆண்டு வெளியான ‘சலாம் பாம்பே’ திரைப்படம் அவரது திரையுலகப் பயணத்தில் முக்கியமான படமாக அமைந்தது. தொடர்ந்து வெளியான ‘பரிந்தா’ திரைப்படத்தில் அவர் நடித்ததற்காக தேசிய திரைப்பட விருது பெற்றார். பின்னர் ‘அக்னி சாட்சி’ மற்றும் ‘கிராந்திவீர்’ ஆகிய படங்களுக்காகவும் தேசிய திரைப்பட விருதுகளை வென்றார். மொத்தம் மூன்று தேசிய திரைப்பட விருதுகளை பெற்றுள்ளார்.

2000-களில் ‘சக்தி: தி பவர்’, ‘அப் தக் சப்பன்’, ‘அபஹரண்’, ‘டாக்ஸி நம்பர் 9211’ உள்ளிட்ட படங்களில் நடித்ததன் மூலம் தனது நடிப்புத் திறனை தொடர்ந்து வெளிப்படுத்தினார். 2007ஆம் ஆண்டு வெளியான ‘வெல்கம்’ திரைப்படத்தில் அவர் நடித்த ‘உதய் ஷெட்டி’ கதாபாத்திரம் ரசிகர்களிடையே மிகவும் பிரபலமானது. அதன் தொடர்ச்சியான ‘வெல்கம் பேக்’ படத்திலும் அதே கதாபாத்திரத்தில் நடித்தார். சமீபத்தில் வெளியான ‘ஹவுஸ்ஃபுல் 5’ திரைப்படத்திலும் அவர் நடித்திருந்தார்.

மராத்தி திரையுலகிலும் நானா படேக்கரின் பங்களிப்பு குறிப்பிடத்தக்கது. ‘நட்ஸம்ராட்’ திரைப்படத்தில் அவரது நடிப்பு பெரும் வரவேற்பைப் பெற்றது. திரைப்பட நடிப்புடன் மட்டுமல்லாமல் இயக்குநர், பின்னணிப் பாடகர் உள்ளிட்ட பல்வேறு துறைகளிலும் அவர் தனது பங்களிப்பை வழங்கியுள்ளார்.

தமிழ் ரசிகர்களுக்கும் நானா படேக்கர் பரிச்சயமானவர். இயக்குநர் பாரதிராஜா இயக்கிய ‘பொம்மலாட்டம்’ திரைப்படத்தின் மூலம் தமிழில் அறிமுகமான அவர், பின்னர் ரஜினிகாந்த் நடித்த ‘காலா’ திரைப்படத்திலும் முக்கிய கதாபாத்திரத்தில் நடித்திருந்தார்.

திரைப்படத் துறையில் அவர் ஆற்றிய பங்களிப்பை பாராட்டி, இந்திய அரசு 2013ஆம் ஆண்டு பத்மஸ்ரீ விருது வழங்கி கவுரவித்தது.

திரையுலகில் மட்டுமின்றி சமூகப் பணிகளிலும் நானா படேக்கர் ஈடுபட்டு வந்தார். விவசாயிகள் மற்றும் கிராமப்புற மக்களுக்கு உதவும் பணிகளில் அவர் இணைந்து செயல்பட்டார். அவரது மறைவுக்கு குடியரசுத் தலைவர் திரௌபதி முர்மு, பிரதமர் நரேந்திர மோடி உள்ளிட்ட அரசியல் தலைவர்களும், திரையுலக பிரபலங்களும் இரங்கல் தெரிவித்து வருகின்றனர்.

நானா படேக்கரின் மறைவையடுத்து, அவரது நீண்டகால திரைப்பயணத்தையும் தனித்துவமான நடிப்பையும் நினைவுகூர்ந்து ரசிகர்களும் திரைப்படத் துறையினரும் இரங்கல் தெரிவித்து வருகின்றனர். மகாராஷ்டிர அரசு அவரது திரைத்துறை மற்றும் நாடகத்துறைக்கான பங்களிப்பை கருத்தில் கொண்டு அரசு மரியாதையுடன் இறுதிச் சடங்கு நடத்தப்படும் என அறிவித்துள்ளது.