மகாளய அமாவாசை: ஆம்பூர் கோவில்களில் முன்னோர்களுக்கு சிறப்பு பித்ரு பூஜை!

திருப்பத்தூர் மாவட்டம், ஆம்பூர் கிருஷ்ணாபுரம் பகுதியில் உள்ள அருள்மிகு சீனிவாச பெருமாள் ஆலயம், காளியம்மன் ஆலயம், பூந்தோட்டம் பெரிய ஆஞ்சநேயர் ஆலயம் உள்ளிட்ட பல்வேறு கோவில்களில் மகாளய அமாவாசையை முன்னிட்டு சிறப்பு பித்ரு பூஜைகள் நடைபெற்றன.

முன்னோர்களுக்கு மரியாதை செலுத்திய பக்தர்கள்

இந்த வழிபாட்டில் ஏராளமான பக்தர்கள் கலந்துகொண்டு, தங்களது முன்னோர்களை நினைவுகூர்ந்து வழிபட்டனர். பித்ரு பூஜையின் ஒரு பகுதியாக, எள் மற்றும் மாவினால் பிண்டம் வைத்து, தர்ப்பைப் புல், மஞ்சள், குங்குமம் உள்ளிட்ட பூஜைப் பொருட்களைக் கொண்டு முன்னோர்களுக்கான சடங்குகளை மேற்கொண்டனர்.

தொடர்ந்து, பூஜையில் பயன்படுத்தப்பட்ட பிண்டங்களைக் கரைத்து, அதனைச் செடிகளில் ஊற்றி வழிபாட்டை நிறைவு செய்தனர்.

மகாளய அமாவாசையின் முக்கியத்துவத்தைப் போற்றும் வகையில் நடைபெற்ற இந்தச் சிறப்பு வழிபாடுகளில் பக்தர்கள் திரளாகப் பங்கேற்று, தங்களது முன்னோர்களுக்கு மரியாதை செலுத்தினர். இதனால் கோவில்களில் பக்தி நிறைந்த சூழல் நிலவியது.

இந்த செய்தியை உங்கள் நண்பர்களுக்கு பகிரவும். இதுகுறித்து உங்கள் கருத்துகளை கமெண்ட் செய்யவும்.