திருவள்ளூரில் மாபெரும் கல்விக் கடன் முகாம்: 95 மாணவர்களுக்கு ரூ.7.06 கோடி கடன் ஆணைகள்!

திருவள்ளூர்: திருவள்ளூர் மாவட்ட நிர்வாகம் மற்றும் மாவட்ட முன்னோடி வங்கி இணைந்து நடத்திய மாபெரும் கல்விக் கடன் முகாமில், 95 மாணவ, மாணவியருக்கு ரூ.7.06 கோடி மதிப்பிலான கல்விக் கடன் ஆணைகளை மாவட்ட ஆட்சியர் கவிதா வழங்கினார்.

திருவள்ளூர் மாவட்டம், பூந்தமல்லி வட்டம், வீரராகவபுரம், திருவேற்காடு பகுதியில் உள்ள தனியார் பொறியியல் கல்லூரியில் 16.10.2026 அன்று இம்முகாம் நடைபெற்றது. மாவட்ட ஆட்சியர் கவிதா தலைமையில் நடைபெற்ற நிகழ்ச்சியில், சட்டமன்ற உறுப்பினர்கள் ரமேஷ்குமார், விஜயகுமார், பிரகாசம் மற்றும் எம்.எஸ். ரவி ஆகியோர் கலந்து கொண்டனர்.

அவர்கள் வங்கிகளின் அரங்குகளைப் பார்வையிட்டு, கல்விக் கடன் வழங்கும் நடைமுறைகள் குறித்த விவரங்களைக் கேட்டறிந்தனர். தொடர்ந்து குத்துவிளக்கேற்றி முகாமைத் தொடங்கி வைத்தனர். நிகழ்ச்சியில் 95 மாணவ, மாணவியருக்கு ரூ.7.06 கோடி மதிப்பிலான கல்விக் கடன் ஆணைகள் வழங்கப்பட்டன.

3,500 மாணவர்களுக்கு கல்விக் கடன் வழங்க இலக்கு

இதைத்தொடர்ந்து செய்தியாளர்களிடம் பேசிய மாவட்ட ஆட்சியர் கவிதா கூறியதாவது:

தமிழ்நாடு முதலமைச்சரின் உத்தரவின்படி, 30.09.2026 வரை திருவள்ளூர் மாவட்டத்தில் 1,000 மாணவர்களுக்கு ரூ.30 கோடி வரையில் முன்னுரிமை அடிப்படையில் கல்விக் கடன் வழங்கப்பட்டுள்ளது. ரூ.25 லட்சத்திற்குக் குறைவான கல்விக் கடன்கள் இந்தப் பிரிவின் கீழ் வழங்கப்பட்டுள்ளன. இதுதவிர, ரூ.25 லட்சத்திற்கும் அதிகமான தொகையில், வெளிநாடுகளுக்குச் சென்று உயர்கல்வி பயில்வதற்காக ரூ.100 கோடிக்கும் அதிகமான கல்விக் கடன்கள் வழங்கப்பட்டுள்ளன.

திருவள்ளூர் மாவட்டத்தில் குறைந்தபட்சம் 3,500 மாணவர்களுக்கு கல்விக் கடன் வழங்க இலக்கு நிர்ணயிக்கப்பட்டுள்ளது. இதற்காக ரூ.90 கோடி அளவிலான கடன் வழங்கும் இலக்கை நோக்கிச் செயல்பட்டு வருகிறோம். ஏற்கெனவே 1,000 மாணவர்களுக்கு கடன் வழங்கப்பட்டுள்ள நிலையில், மீதமுள்ள 2,500 மாணவர்களுக்கும் கல்விக் கடன் குறித்த விழிப்புணர்வை ஏற்படுத்த நடவடிக்கை எடுக்கப்பட்டு வருகிறது.

வித்யாலட்சுமி இணையதளம் மூலம் விண்ணப்பிக்கலாம்

மாணவர்கள் கல்விக் கடன் பெறுவதற்கு ‘வித்யாலட்சுமி’ இணையதளம் வாயிலாக விண்ணப்பிக்கலாம். ஒரு மாணவர் மூன்று வங்கிகளில் விண்ணப்பிக்க முடியும். அவற்றில் முன்னுரிமை அடிப்படையில் கடன் வழங்க முன்வரும் வங்கியில் கடன் பெறலாம். மூன்று வங்கிகளுமே கடன் வழங்க முன்வந்தால், மாணவர் தமக்குத் தேவையான வங்கியைத் தேர்வு செய்து கொள்ளலாம்.

கல்விக் கடன் தொடர்பான தகவல்கள் அதிகளவிலான மாணவர்களைச் சென்றடைய வேண்டும் என்பதற்காக இந்த முகாம் நடத்தப்படுகிறது. இதுமட்டுமின்றி, ஊரகப் பகுதிகளில் உள்ள வங்கிக் கிளை மேலாளர்கள் மற்றும் வருவாய்த் துறை மூலமாகவும் மாணவர்களுக்கு விழிப்புணர்வு ஏற்படுத்தப்பட்டு வருகிறது.

இவ்வாறு மாவட்ட ஆட்சியர் கவிதா தெரிவித்தார்.