திருப்பத்தூர் மாவட்டத்தில் 51 செவிலியர்களுக்கு பணி நியமன ஆணைகள்!

திருப்பத்தூர்: திருப்பத்தூர் மாவட்ட ஆட்சியர் அலுவலகக் கூட்டரங்கில், அரசு ஆரம்ப சுகாதார நிலையங்கள் மற்றும் அரசு மருத்துவமனைகளில் பணிபுரியத் தேர்வு செய்யப்பட்ட 51 செவிலியர்களுக்குப் பணி நியமன ஆணைகள் வழங்கும் நிகழ்ச்சி நடைபெற்றது.

மாவட்ட ஆட்சியர் வே. நல்லசிவன் தலைமையில் நடைபெற்ற இந்நிகழ்ச்சியில், தமிழக வனத்துறை அமைச்சர் ரஞ்சித்குமார் பங்கேற்று, தேர்வு செய்யப்பட்ட 51 செவிலியர்களுக்கும் பணி நியமன ஆணைகளை வழங்கிப் பாராட்டினார்.

தொடர்ந்து, செவிலியர்களுக்கான புத்தாக்கப் பயிற்சியையும் அமைச்சர் தொடங்கி வைத்தார்.

நோயாளிகளிடம் அன்புடன் நடந்து கொள்ள வேண்டும்: அமைச்சர் அறிவுறுத்தல்

நிகழ்ச்சியில் பேசிய அமைச்சர் ரஞ்சித்குமார், அரசு மருத்துவமனைகள் மற்றும் ஆரம்ப சுகாதார நிலையங்களில் பெரும்பாலும் ஏழை, எளிய மற்றும் நடுத்தரக் குடும்பங்களைச் சேர்ந்த மக்கள் சிகிச்சை பெற்று வருகின்றனர் எனக் குறிப்பிட்டார்.

எனவே, செவிலியர்கள் நோயாளிகளிடம் தாயுள்ளத்துடன் அன்பாகவும், கனிவாகவும் நடந்து கொண்டு, அவர்களுக்குத் தேவையான உதவிகளை உரிய முறையில் வழங்க வேண்டும் என அறிவுறுத்தினார்.

இந்நிகழ்ச்சியில் மாவட்ட வருவாய் அலுவலர் பாலசுப்பிரமணியன், திருப்பத்தூர் சட்டமன்ற உறுப்பினர் திருப்பதி மற்றும் பல்வேறு துறைகளைச் சேர்ந்த அரசு அலுவலர்கள் கலந்து கொண்டனர்.