கோவளம் சிறுமி பாலியல் வன்கொடுமை வழக்கு: ஸ்பா நிறுவனத்தின் உண்மையான உரிமையாளர் கைது!

திருவனந்தபுரம்: கேரள மாநிலம், கோவளத்தில் 16 வயது சிறுமி பாலியல் வன்கொடுமைக்கு ஆளானதாகக் கூறப்படும் வழக்கில், சம்பந்தப்பட்ட ஸ்பா நிறுவனத்தின் உண்மையான உரிமையாளர் கைது செய்யப்பட்டுள்ளார். திருவனந்தபுரம் மாநகராட்சியில் இளநிலை சுகாதார ஆய்வாளராகப் பணியாற்றிய அனுரூப் என்பவரை காவல்துறையினர் கைது செய்துள்ளனர். இதையடுத்து, அவரை மாநகர மேயர் பணியிடைநீக்கம் செய்துள்ளார்.

சிறுமியுடன் ஸ்பாவில் தடயச் சோதனை!

இந்த வழக்கில் தொடர்புடைய ‘ட்ரீம்ஸ்’ என்ற ஸ்பா நிறுவனத்தில், பாதிக்கப்பட்ட சிறுமியை அழைத்துச் சென்ற விசாரணைக் குழுவினர் தடயச் சோதனையை நிறைவு செய்தனர்.

பினாமி பெயரில் ஸ்பா நடத்தியதாகக் குற்றச்சாட்டு!

உறவினர்களால் விற்கப்பட்டதாகக் கூறப்படும் சிறுமி தொடர்பான வழக்கில், ‘ட்ரீம்ஸ்’ ஸ்பா நிறுவனத்தை மாநகராட்சியின் இளநிலை சுகாதார ஆய்வாளர் அனுரூப் பினாமி பெயரில் நடத்தி வந்ததாகக் காவல்துறையினர் தெரிவித்துள்ளனர். பூவாரைச் சேர்ந்த நிஷாந்த் என்பவரை முன்னிறுத்தி நிறுவனம் செயல்பட்டு வந்ததாகக் கூறப்படுகிறது.

நாளொன்றுக்கு ரூ.20 ஆயிரத்துக்கும் மேல் பணப் பரிவர்த்தனை!

ஸ்பாவில் பயன்படுத்தப்பட்ட பணப்பரிவர்த்தனைக்கான விரைவுக் குறியீடு (QR Code) வழியாகப் பெறப்பட்ட பணம் அனுரூப்பின் வங்கிக் கணக்குக்குச் சென்றதாக விசாரணையில் தெரியவந்துள்ளதாகக் காவல்துறையினர் தெரிவித்துள்ளனர். இவ்வாறு நாளொன்றுக்கு ரூ.20 ஆயிரத்துக்கும் அதிகமான தொகை அவரது கணக்குக்கு வந்ததாகவும் கூறப்படுகிறது.

கைது செய்யப்பட்டதைத் தொடர்ந்து பணியிடைநீக்கம்!

திருவனந்தபுரம் மாநகராட்சியில் ஏற்கெனவே பல்வேறு பிரச்சினைகளில் தொடர்புடையவராகக் கூறப்படும் அனுரூப் கைது செய்யப்பட்டதைத் தொடர்ந்து, அவரைப் பணியிடைநீக்கம் செய்து மேயர் நடவடிக்கை எடுத்துள்ளார். இந்த வழக்கில் காவல்துறையினரின் விசாரணை தொடர்ந்து நடைபெற்று வருகிறது.