கேர்மாளம் முன்னாள் வனக்காவலர் திடீர் உயிரிழப்பு! பணி நீக்கத்தால் மன உளைச்சலில் இருந்ததாக உறவினர்கள் தகவல் – உரிய விசாரணை நடத்த கோரிக்கை

சத்தியமங்கலம்:

ஈரோடு மாவட்டம், சத்தியமங்கலம் புலிகள் காப்பகம், ஆசனூர் வனக்கோட்டத்திற்கு உட்பட்ட கேர்மாளம் வனச்சரகத்தில் வனக்காவலராக பணியாற்றி வந்த மாருதுகுட்டி (40) என்பவர் திடீரென உடல்நலக்குறைவு ஏற்பட்டு உயிரிழந்த சம்பவம் கேர்மாளம் மலைப்பகுதி மக்களிடையே சோகத்தை ஏற்படுத்தியுள்ளது.

கேர்மாளம் பகுதியைச் சேர்ந்த மாருதுகுட்டி, கடந்த ஒரு மாதத்திற்கு முன்பு வரை கேர்மாளம் வனச்சரகத்தில் வனக்காவலராக பணியாற்றி வந்ததாக கூறப்படுகிறது. சில காரணங்களுக்காக அவர் பணியில் இருந்து நீக்கப்பட்டதாகவும், இதனால் மன உளைச்சலில் இருந்து வந்ததாகவும் அவரது உறவினர்கள் தெரிவித்துள்ளனர்.

திடீர் உடல்நலக்குறைவு

இந்த நிலையில், இன்று காலை சுமார் 10 மணியளவில் மாருதுகுட்டிக்கு திடீரென உடல்நலக்குறைவு ஏற்பட்டதாக கூறப்படுகிறது. இதையடுத்து அவர் கேர்மாளம் ஆரம்ப சுகாதார நிலையத்திற்கு கொண்டு செல்லப்பட்டு சிகிச்சைக்காக அனுமதிக்கப்பட்டார்.

ஆனால், மருத்துவமனையில் அனுமதிக்கப்பட்ட சில மணி நேரத்திலேயே மாருதுகுட்டி உயிரிழந்தார்.

அவரது உயிரிழப்புக்கான மருத்துவ ரீதியான காரணம் குறித்த அதிகாரப்பூர்வ தகவல் இதுவரை வெளியாகவில்லை.

உரிய விசாரணை நடத்த கோரிக்கை

மாருதுகுட்டியின் திடீர் உயிரிழப்பு குறித்து வனத்துறை உயர் அதிகாரிகள் உரிய விசாரணை நடத்த வேண்டும் என அவரது உறவினர்கள் மற்றும் கேர்மாளம் மலை கிராம மக்கள் கோரிக்கை விடுத்துள்ளனர்.

மேலும், அவர் பணியில் இருந்து நீக்கப்பட்ட பின்னர் ஏற்பட்டதாக கூறப்படும் மன உளைச்சல் உள்ளிட்ட அனைத்து காரணிகளையும் விசாரணைக்கு உட்படுத்தி, உண்மை நிலையை வெளிக்கொண்டு வந்து உரிய நீதி கிடைக்க நடவடிக்கை எடுக்க வேண்டும் என்றும் அவர்கள் வலியுறுத்தியுள்ளனர்.

கேர்மாளம் மலைப்பகுதியில் வனத்துறையில் பணியாற்றி வந்த ஒருவரின் திடீர் உயிரிழப்பு அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.