காவேரிப்பட்டினத்தில் கோலாகலமாக நடைபெற்ற கிருஷ்ண ஜெயந்தி விழா!

ராதா–கிருஷ்ணருக்கு சிறப்பு பூஜை – ஏராளமான பக்தர்கள் சுவாமி தரிசனம்

காவேரிப்பட்டினம், செப்டம்பர் 05:

கிருஷ்ண ஜெயந்தி விழாவை முன்னிட்டு, கிருஷ்ணகிரி மாவட்டம் காவேரிப்பட்டினத்தில் அகில உலக கிருஷ்ண பக்தி இயக்கம் (இஸ்கான்) சார்பில் சிறப்பு ஆன்மிக நிகழ்ச்சிகள் வெகு விமரிசையாக நடைபெற்றன.

ஸ்தாபக ஆசாரியர் தெய்வத்திரு. பக்தி வேதாந்த சுவாமி பிரபுபாதா அவர்களின் நல்லாசியுடன், காவேரிப்பட்டினத்தில் உள்ள தனியார் திருமண மண்டபத்தில் இரண்டு நாட்கள் நடைபெறும் கிருஷ்ண ஜெயந்தி விழா தொடங்கியது.

சிறப்பு பூஜைகள் மற்றும் ஆன்மிக நிகழ்ச்சிகள்

விழாவின் முதல் நாளில் குருபூஜை, கீர்த்தன், கலை நிகழ்ச்சிகள், துளசி பூஜை, சந்தியா ஆரத்தி, மகா அபிஷேகம், ஆன்மிக சொற்பொழிவு, உரியடி, மங்களாரத்தி மற்றும் பிரசாத விநியோகம் உள்ளிட்ட பல்வேறு நிகழ்ச்சிகள் நடைபெற்றன.

வண்ண மலர்களால் சிறப்பாக அலங்கரித்து வைக்கப்பட்டிருந்த ராதா–கிருஷ்ணர் திருமேனிக்கு சிறப்பு பூஜைகள் மற்றும் அபிஷேகங்கள் நடைபெற்றன. இதையடுத்து காவேரிப்பட்டினம் மற்றும் சுற்றுவட்டாரப் பகுதிகளில் இருந்து ஏராளமான பக்தர்கள் விழாவில் கலந்து கொண்டு சுவாமி தரிசனம் செய்தனர்.

கிருஷ்ண ஜெயந்தியை முன்னிட்டு இஸ்கான் அமைப்புகள் நடத்தும் விழாக்களில் சிறப்பு அபிஷேகம், நாம சங்கீர்த்தனம், ஆரத்தி மற்றும் பிரசாத விநியோகம் உள்ளிட்ட ஆன்மிக நிகழ்ச்சிகள் முக்கிய இடம் பெறுவது குறிப்பிடத்தக்கது.

பக்தர்களுக்கு அன்னதானம்

விழாவில் பங்கேற்ற பக்தர்கள் மற்றும் பொதுமக்கள் பயன்பெறும் வகையில் காலை முதல் மாலை வரை அன்னதானமும் வழங்கப்பட்டது.

சிறப்பான ஏற்பாடுகள்

விழாவுக்கான அனைத்து ஏற்பாடுகளையும் தர்மபுரி–கிருஷ்ணகிரி மாவட்ட அகில கிருஷ்ண பக்தி இயக்க மாவட்ட தலைவர் H.G. சீனிவாச ஷிம் பிரபு தலைமையில், காவேரிப்பட்டினம் இஸ்கான் கிளை H.G. அனுத்தம கிருபதாஸ் முன்னிலையில் மேற்கொண்டனர்.

மேலும், ஓசூர் இஸ்கான் தலைவர் சீனிவாச சியாமதாஸ் மற்றும் காவேரிப்பட்டினம் இஸ்கான் ஆலய பக்தர்கள் இணைந்து விழாவிற்கான ஏற்பாடுகளை சிறப்பாக செய்திருந்தனர்.

இரண்டு நாட்கள் நடைபெறும் இவ்விழாவின் அடுத்தடுத்த நிகழ்ச்சிகளிலும் ஏராளமான பக்தர்கள் கலந்து கொள்வார்கள் என எதிர்பார்க்கப்படுகிறது.