ரூ.10 லட்சம் லஞ்ச வழக்கு..! கேரளாவில் முன்னாள் துணை ஆட்சியர் கைது.

கொச்சி: நிலத்தை வகைமாற்றம் செய்து ஆவணங்கள் வழங்குவதற்காக ரூ.10 லட்சம் லஞ்சம் பெற்றதாகக் கூறப்படும் வழக்கில், இடைத்தரகராக செயல்பட்டதாக குற்றச்சாட்டுக்கு உள்ளான ஓய்வு பெற்ற துணை ஆட்சியர் என்.கே. க்ருபாவை கேரள விஜிலென்ஸ் கைது செய்துள்ளது.

எர்ணாகுளம் கடவந்திரா பகுதியைச் சேர்ந்த 59 வயதான என்.கே. க்ருபா, கடந்த ஆகஸ்ட் 13ஆம் தேதி நடைபெற்ற லஞ்ச ஒழிப்பு நடவடிக்கையின் தொடர்ச்சியான விசாரணையில் கைது செய்யப்பட்டுள்ளார்.

கலூர் பகுதியைச் சேர்ந்த ஒருவரின் குடும்பத்துக்குச் சொந்தமான நிலத்தை, விவசாய நிலம் என்பதிலிருந்து குடியிருப்பு நிலமாக வகைமாற்றம் செய்து ஆவணங்களைப் பெறுவதற்காக ரூ.10 லட்சம் லஞ்சம் கேட்கப்பட்டதாக விஜிலென்ஸ் விசாரணையில் தெரியவந்துள்ளது. இந்த விவகாரத்தில் போலியான புகாரை உருவாக்கி நில உரிமையாளருக்கு நெருக்கடி கொடுத்ததாகவும் விசாரணையில் கூறப்பட்டுள்ளது.

இதையடுத்து, நில உரிமையாளர் அளித்த தகவலின் அடிப்படையில் விஜிலென்ஸ் அதிகாரிகள் நடத்திய சோதனை நடவடிக்கையில், கண்ணயன்னூர் நில ஆவணத் தாசில்தார் ஜோசப் ஆண்டனி ஹர்டீஸ் மற்றும் இடைத்தரகர்கள் ராஜேஷ் என்.எஸ்., ஜோசப் ஷிபின் ஆகியோர் கைது செய்யப்பட்டனர். ரூ.2 லட்சம் ரொக்கமும் ரூ.8 லட்சத்திற்கான காசோலையும் வழங்கப்பட்டதாக அதிகாரிகள் தெரிவித்துள்ளனர்.

இந்த வழக்கின் அடுத்தகட்ட விசாரணையில், ஓய்வு பெற்ற துணை ஆட்சியர் என்.கே. க்ருபாவும் லஞ்சப் பேரத்தில் இடைத்தரகராக செயல்பட்டதாக விஜிலென்ஸ் அதிகாரிகளுக்கு தகவல்கள் கிடைத்ததாக கூறப்படுகிறது. இதன் அடிப்படையில் அவரை கைது செய்துள்ளனர்.

கைது செய்யப்பட்ட க்ருபா, மூவாட்டுப்புழா விஜிலென்ஸ் நீதிமன்றத்தில் ஆஜர்படுத்தப்பட உள்ளதாக தகவல்கள் தெரிவிக்கின்றன. இந்த வழக்கில் மேலும் யாருக்கெல்லாம் தொடர்பு உள்ளது என்பது குறித்து விஜிலென்ஸ் விசாரணை தொடர்ந்து நடைபெற்று வருகிறது.