உகாண்டாவில் 38 பேரைக் கொன்று தின்றதாகக் கூறப்படும் நபர் கைது! 15 ஆண்டுகளாகத் தேடப்பட்டதாகத் தகவல்!

கம்பாலா:

உகாண்டாவில் கடந்த 2010 முதல் 2025-ஆம் ஆண்டு வரை 38 பேரைக் கொலை செய்து, அவர்களின் உடல்களைத் தின்றதாகக் குற்றம்சாட்டப்படும் முஜுரிசி மோசஸ் என்பவர் கைது செய்யப்பட்டுள்ளதாக அந்நாட்டின் பாதுகாப்புப் படைத் தலைவர் ஜெனரல் முஹூசி கைனெருகாபா தெரிவித்துள்ளார்.

உகாண்டாவின் மசாகா, இபாண்டா மற்றும் காசோ மாவட்டங்களில் நடைபெற்ற கொலைச் சம்பவங்களுடன் தொடர்புடையதாகக் கூறப்படும் இந்த நபரைப் பாதுகாப்புப் படையினர் கைது செய்துள்ளதாக, ஜெனரல் முஹூசி தனது சமூக வலைதளப் பதிவில் குறிப்பிட்டதாகச் செய்தியில் தெரிவிக்கப்பட்டுள்ளது.

வீடுகளில் புகுந்து தாக்கியதாகக் குற்றச்சாட்டு

குற்றம்சாட்டப்பட்ட நபர் வீடுகளுக்குள் அத்துமீறிப் புகுந்து, வாளால் தாக்கிக் கொலை செய்ததாகவும், சில சம்பவங்களில் ஒரே குடும்பத்தைச் சேர்ந்த பலரைத் தாக்கியதாகவும் தகவல்கள் தெரிவிக்கின்றன. சிலரை ஏமாற்றி அழைத்துச் சென்று கொலை செய்ததாகவும் கூறப்படுகிறது.