விருதுநகர் மாவட்டத்தில் தாய் மாமன் தங்க மோதிரம் வழங்கும் திட்டம் தொடக்கம்!

விருதுநகர் – செப்டம்பர் 28: மதுரையில் தமிழ்நாடு முதலமைச்சர் திரு. விஜய் அவர்களால் மாநில அளவில் “தாய் மாமன் தங்க மோதிரம் வழங்கும் திட்டம்” தொடங்கி வைக்கப்பட்டதைத் தொடர்ந்து, விருதுநகர் மாவட்டத்திலும் இத்திட்டம் தொடங்கி வைக்கப்பட்டது.

விருதுநகர் மாவட்ட அரசு மருத்துவக்கல்லூரி மருத்துவமனையில் நடைபெற்ற நிகழ்ச்சியில், மாவட்ட ஆட்சித் தலைவர் ஷரண்யா அறி, இ.ஆ.ப. முன்னிலையில், சமூக நலன் மற்றும் மகளிர் உரிமைத்துறை அமைச்சரும், விருதுநகர் மாவட்ட பொறுப்பு அமைச்சருமான கு. ஜெகதீஸ்வரி கலந்து கொண்டு குழந்தைகளுக்கு தங்க மோதிரம் அணிவித்து திட்டத்தை தொடங்கி வைத்தார்.

தமிழ்நாடு அரசு அறிவித்துள்ள இத்திட்டத்தின் கீழ், அரசு மருத்துவமனைகள் மற்றும் அரசு ஆரம்ப சுகாதார நிலையங்களில் பிறக்கும் குழந்தைகளுக்கு ஒரு கிராம் எடையுள்ள தங்க மோதிரம் வழங்கப்படுகிறது. அரசு மருத்துவமனைகளில் 22.06.2026 முதல் பிறந்த குழந்தைகளும் இத்திட்டத்தின் கீழ் பயன்பெற உள்ளனர்.

விருதுநகர் மாவட்டத்தில் விருதுநகர், அருப்புக்கோட்டை, சிவகாசி, திருவில்லிபுத்தூர் மற்றும் ராஜபாளையம் ஆகிய 5 அரசு தலைமை மருத்துவமனைகளிலும் இத்திட்டத்தின் கீழ் தங்க மோதிரம் வழங்க ஏற்பாடுகள் செய்யப்பட்டுள்ளன. மேலும், மாவட்டத்தில் உள்ள 60 அரசு ஆரம்ப சுகாதார நிலையங்கள், 9 அரசு மருத்துவமனைகள் மற்றும் 1 அரசு மருத்துவக்கல்லூரி மருத்துவமனை ஆகியவற்றிலும் இத்திட்டம் செயல்படுத்தப்பட உள்ளது என மாவட்ட நிர்வாகத் தகவல்கள் தெரிவிக்கின்றன.

விருதுநகர் மாவட்டத்தில் அரசு மருத்துவமனைகளில் நாளொன்றுக்கு சராசரியாக 25 முதல் 30 குழந்தைகள் பிறப்பதாகவும், தகுதியுடைய குழந்தைகளுக்கு தலா ஒரு கிராம் தங்க மோதிரம் வழங்குவதற்கான நடவடிக்கைகள் மேற்கொள்ளப்பட்டுள்ளதாகவும் தெரிவிக்கப்பட்டுள்ளது.

இத்திட்டத்திற்கான முன்னேற்பாடுகளை மாவட்ட நிர்வாகம் ஏற்கனவே மேற்கொண்டிருந்தது. விருதுநகர் அரசு மருத்துவக்கல்லூரி மருத்துவமனையில் தங்க மோதிரங்களை பாதுகாப்பாக வைப்பதற்கான அறைகள், பாதுகாப்பு ஏற்பாடுகள், நிகழ்ச்சி நடைபெறும் இடம், பயனாளிகள் அமரும் வசதி, குடிநீர், சுகாதாரம், மின்சாரம் உள்ளிட்ட அடிப்படை வசதிகள் தொடர்பாக மாவட்ட ஆட்சியர் ஷரண்யா அறி ஆய்வு மேற்கொண்டிருந்தார்.

மேலும், விருதுநகர் அரசு மருத்துவமனையில் மட்டும் 4,093 தங்க மோதிரங்கள் பாதுகாப்புடன் சேமித்து வைக்கப்பட்டுள்ளதாகவும், மாவட்டத்தின் பல்வேறு அரசு மருத்துவமனைகளில் செப்டம்பர் 28 முதல் திட்டத்தை செயல்படுத்துவதற்கான ஏற்பாடுகள் செய்யப்பட்டுள்ளதாகவும் செய்திகள் தெரிவிக்கின்றன.

மாநில அளவில் செயல்படுத்தப்படும் இத்திட்டத்திற்காக முதல் கட்டமாக 1,28,000 தங்க மோதிரங்கள் கொள்முதல் செய்யப்பட்டுள்ளன. ஒவ்வொரு மோதிரத்திற்கும் தனித்துவமான வரிசை எண் வழங்கப்படுவதுடன், சேதப்படுத்த முடியாத பாதுகாப்புப் பெட்டகத்தில் வழங்க ஏற்பாடு செய்யப்பட்டுள்ளது.

அரசு மருத்துவமனைகளில் பிறக்கும் குழந்தைகளை சிறப்பிக்கும் வகையிலும், தாய்-சேய் நலனை ஊக்குவிக்கும் வகையிலும், அரசு மருத்துவ சேவைகள் மீதான பொதுமக்களின் நம்பிக்கையை மேலும் வலுப்படுத்தும் நோக்கிலும் இத்திட்டம் செயல்படுத்தப்படுவதாக அரசு தெரிவித்துள்ளது. தமிழர் பண்பாடு மற்றும் பாரம்பரியத்தில் இடம்பெறும் தாய்மாமன் சீர் மரபை பிரதிபலிக்கும் வகையிலும் இத்திட்டம் வடிவமைக்கப்பட்டுள்ளதாக தெரிவிக்கப்பட்டுள்ளது.

விருதுநகர் மாவட்டத்தில் நடைபெற்ற நிகழ்ச்சியில் அமைச்சர் கு. ஜெகதீஸ்வரி குழந்தைகளுக்கு தங்க மோதிரம் அணிவித்து திட்டத்தை மாவட்ட அளவில் தொடங்கி வைத்தார். நிகழ்ச்சியில் மாவட்ட நிர்வாகம் மற்றும் சுகாதாரத்துறை அதிகாரிகள், மருத்துவர்கள் உள்ளிட்டோர் கலந்து கொண்டனர்.