அரசு வேலை வாங்கித் தருவதாக ரூ.2 லட்சம் மோசடி செய்ததாக புகார்: தவாக கட்சி நிர்வாகி மீது இளைஞர் எஸ்.பி. அலுவலகத்தில் மனு

திருவண்ணாமலை, செப்.30:

அரசு வேலை வாங்கித் தருவதாகக் கூறி தன்னிடம் ரூ.2 லட்சம் பெற்றுக்கொண்டு, வேலை வாங்கித் தராமலும் பணத்தைத் திருப்பித் தராமலும் மிரட்டல் விடுப்பதாக தமிழக வாழ்வுரிமைக் கட்சி நிர்வாகி மீது இளைஞர் ஒருவர் திருவண்ணாமலை மாவட்ட காவல் கண்காணிப்பாளர் அலுவலகத்தில் புகார் அளித்துள்ளார்.

விழுப்புரம் மாவட்டம் விக்கிரவாண்டி வட்டம் நந்திவாடி கிராமத்தைச் சேர்ந்த சதீஷ் என்பவர் இந்தப் புகாரை அளித்துள்ளார். அவரது புகாரில், திருவண்ணாமலை தாலுகா தச்சம்பட்டு அஞ்சல் இருதயபுரம் கிராமத்தைச் சேர்ந்த தமிழக வாழ்வுரிமைக் கட்சியின் மாநில செயற்குழு உறுப்பினர் யேசுராஜ் என்பவர் தனக்கு அறிமுகமானதாக தெரிவித்துள்ளார்.

அப்போது, கிராம நிர்வாக உதவியாளர் பணியை வாங்கித் தருவதாக யேசுராஜ் கூறியதாகவும், இதனை நம்பி சதீஷ் ரூ.2 லட்சம் பணம் வழங்கியதாகவும் புகாரில் கூறப்பட்டுள்ளது.

பணம் வழங்கி சுமார் 3 ஆண்டுகள் கடந்தும் வேலை வாங்கித் தரப்படவில்லை என்றும், இதனால் தான் வழங்கிய பணத்தைத் திருப்பித் தருமாறு கேட்டதாகவும் சதீஷ் தெரிவித்துள்ளார்.

ஆனால், பணத்தைத் திருப்பித் தர மறுத்ததுடன், பணத்தை திரும்பக் கேட்டால் கொலை செய்துவிடுவதாக மிரட்டல் விடுத்ததாகவும் அவர் தனது புகார் மனுவில் தெரிவித்துள்ளார்.

இதையடுத்து சதீஷ் திருவண்ணாமலை மாவட்ட காவல் கண்காணிப்பாளர் அலுவலகத்திற்கு நேரில் சென்று புகார் மனு அளித்தார்.

புகார் அளித்த பின்னர் செய்தியாளர்களிடம் பேசிய சதீஷ், ஏழ்மையான குடும்பத்தைச் சேர்ந்த தான் கடன் வாங்கி ரூ.2 லட்சம் பணத்தை வழங்கியதாகவும், தற்போது வேலை கிடைக்காததுடன் பணத்தையும் திரும்பப் பெற முடியாமல் தவித்து வருவதாகவும் தெரிவித்தார்.

மேலும், தன்னிடம் பெறப்பட்டதாக கூறப்படும் ரூ.2 லட்சத்தை மீட்டுத் தருவதுடன், மிரட்டல் விடுத்ததாகக் கூறப்படும் நபர் மீது உரிய நடவடிக்கை எடுக்க வேண்டும் என்றும் அவர் காவல்துறையிடம் கோரிக்கை விடுத்துள்ளார்.

இந்த புகார் தொடர்பாக காவல்துறையினர் விசாரணை மேற்கொண்டு, புகாரில் கூறப்பட்டுள்ள குற்றச்சாட்டுகளின் உண்மைத் தன்மை குறித்து ஆய்வு செய்து வருகின்றனர். சம்பந்தப்பட்ட யேசுராஜின் தரப்பு விளக்கம் வெளியாகவில்லை.