தேனி மாவட்டத்தில் தொடர் மழை: அருவிகளில் குளிக்கத் தற்காலிகத் தடை! ஆற்றங்கரையோர மக்களுக்கு ஆட்சியர் எச்சரிக்கை.

தேனி: தேனி மாவட்டத்தில் சமீபகாலமாகத் தொடர்ந்து மழை பெய்து வருவதால் ஆறுகள், நீர்வீழ்ச்சிகள், குளங்கள், குட்டைகள் மற்றும் ஓடைகளில் நீர்வரத்து அதிகரித்துள்ளது. இதையடுத்து, பொதுமக்கள் பாதுகாப்பாக இருக்க வேண்டும் என மாவட்ட ஆட்சியர் அறிவுறுத்தியுள்ளார்.

ஆறுகளில் நீர்வரத்து அதிகரித்துள்ளதால், ஆற்றங்கரையோரங்களில் வசிக்கும் மக்கள் தங்களது பாதுகாப்பைக் கருத்தில் கொண்டு அங்கிருந்து வெளியேறி, பாதுகாப்பான இடங்களுக்குச் செல்ல வேண்டும் என ஒலிபெருக்கி மூலம் மாவட்ட நிர்வாகம் எச்சரிக்கை விடுத்துள்ளது.

மேலும், நீர்வரத்து அதிகரிப்பால் ஏற்படக்கூடிய ஆபத்துகளைத் தவிர்க்கும் வகையில், கும்பக்கரை அருவி, சின்னச் சுருளி அருவி, கம்பம் சுருளி அருவி, குரங்கணி அருவி உள்ளிட்ட நீர்வீழ்ச்சிகளில் குளிப்பதற்குத் தற்காலிகத் தடை விதிக்கப்பட்டுள்ளது. ஆறுகளிலும் குளிக்கத் தடை விதிக்கப்பட்டுள்ளதாக அறிவிக்கப்பட்டுள்ளது.

இந்தத் தடையைப் பொதுமக்கள் கட்டாயம் கடைப்பிடிக்க வேண்டும் என்றும், தடையை மீறுவோர் மீது கடுமையான நடவடிக்கை எடுக்கப்படும் என்றும் மாவட்ட ஆட்சியர் எச்சரித்துள்ளார்.

எனவே, தொடர்ந்து பெய்து வரும் மழையைக் கருத்தில் கொண்டு, பொதுமக்கள் நீர்நிலைகளுக்குச் செல்வதைத் தவிர்த்து, மாவட்ட நிர்வாகத்தின் பாதுகாப்பு அறிவுறுத்தல்களைப் பின்பற்ற வேண்டும் எனக் கேட்டுக்கொள்ளப்பட்டுள்ளனர்.