ஐடிஐ மாணவர்களுக்கு ரூ.25,000 பரிசு; 673 பேருக்கு அரசு பணி ஆணை!

30 அரசு தொழிற்பயிற்சி நிலையங்களில் நவீன மின் ஆய்வகங்கள் திறப்பு – மேலும் 40 நிலையங்களில் அமைக்க ஒப்பந்தம்

சென்னை – அக்டோபர் 28: தமிழ்நாடு முதலமைச்சர் சி. ஜோசப் விஜய், அரசு தொழிற்பயிற்சி நிலையங்களில் பயிலும் மாணவர்களின் தொழில்நுட்பத் திறனை மேம்படுத்தும் வகையில், 30 அரசு தொழிற்பயிற்சி நிலையங்களில் அமைக்கப்பட்டுள்ள நவீன மின் ஆய்வகங்களைத் திறந்து வைத்தார். மேலும், 40 அரசு தொழிற்பயிற்சி நிலையங்களில் நவீன மின் ஆய்வகங்களை அமைப்பதற்கான புரிந்துணர்வு ஒப்பந்தமும் மேற்கொள்ளப்பட்டது.

சென்னை கிண்டியில் உள்ள அரசு தொழிற்பயிற்சி நிலையத்தில் அக்டோபர் 28-ஆம் தேதி நடைபெற்ற நிகழ்ச்சியில், 59-வது மாநில அளவிலான திறன் போட்டியில் வெற்றி பெற்ற 15 மாணவ, மாணவியருக்கு தலா ரூ.25,000 மதிப்பிலான காசோலைகளையும், அகில இந்திய தொழிற்தேர்வுகளில் தேசிய அளவில் முதலிடம் பெற்ற 60 மாணவ, மாணவியருக்குப் பாராட்டுச் சான்றிதழ்களையும் முதலமைச்சர் வழங்கினார். மேலும், வேலைவாய்ப்பு மற்றும் பயிற்சித் துறைக்குத் தேர்வு செய்யப்பட்ட 673 இளநிலைப் பயிற்சி அலுவலர்களுக்குப் பணிநியமன ஆணைகளையும் வழங்கினார்.

ரூ.5.10 கோடியில் 30 நவீன மின் ஆய்வகங்கள்

தமிழ்நாட்டின் பல்வேறு மாவட்டங்களில் உள்ள 30 அரசு தொழிற்பயிற்சி நிலையங்களில், Schneider Electric India Pvt. Ltd. நிறுவனத்தின் உதவியுடன் ரூ.5.10 கோடி செலவில் நவீன மின் ஆய்வகங்கள் அமைக்கப்பட்டுள்ளன. இந்த ஆய்வகங்களை முதலமைச்சர் திறந்து வைத்தார். இதன் மூலம் ஆண்டுதோறும் 9,250 மாணவ, மாணவியர் பயிற்சி பெற்று பயன்பெற உள்ளனர்.

இதன் அடுத்தகட்டமாக, மேலும் 40 அரசு தொழிற்பயிற்சி நிலையங்களில் ரூ.6.80 கோடி மதிப்பீட்டில் நவீன மின் ஆய்வகங்களை அமைப்பதற்காக Schneider Electric India Pvt. Ltd. நிறுவனத்திற்கும், தமிழ்நாடு அரசின் வேலைவாய்ப்பு மற்றும் பயிற்சித் துறைக்கும் இடையே புரிந்துணர்வு ஒப்பந்தம் மேற்கொள்ளப்பட்டது.

திறன் போட்டியில் வென்ற மாணவர்களுக்குப் பரிசு

தமிழ்நாடு அரசின் தொழிலாளர் நலன் மற்றும் திறன் மேம்பாட்டுத் துறையின் கீழ் செயல்படும் வேலைவாய்ப்பு மற்றும் பயிற்சித் துறை சார்பில், தொழிற்பயிற்சி நிலைய மாணவர்களின் தொழில்சார் திறன்களை ஊக்குவிக்கும் நோக்கில் 59-வது மாநில அளவிலான திறன் போட்டி – 2026 நடத்தப்பட்டது. இதில் வெற்றி பெற்ற 15 மாணவ, மாணவியருக்கு தலா ரூ.25,000 மதிப்பிலான காசோலைகளை முதலமைச்சர் வழங்கிப் பாராட்டினார்.

அகில இந்திய தொழிற்தேர்வுகளில் தேசிய அளவில் முதலிடம் பெற்று தமிழ்நாட்டிற்குப் பெருமை சேர்த்த 60 மாணவ, மாணவியருக்கும் பாராட்டுச் சான்றிதழ்கள் வழங்கப்பட்டன. கடந்த ஆண்டு தேசிய அளவில் 40 மாணவர்கள் முதலிடம் பெற்றிருந்த நிலையில், இந்த ஆண்டு அந்த எண்ணிக்கை 60 ஆக உயர்ந்துள்ளது. இதன் மூலம் அகில இந்திய அளவிலான மாநிலத் தரவரிசையில் தமிழ்நாடு நான்காவது இடத்திலிருந்து இரண்டாவது இடத்திற்கு முன்னேறியுள்ளதாக அரசின் செய்திக்குறிப்பில் தெரிவிக்கப்பட்டுள்ளது.

673 பேருக்கு அரசுப் பணி நியமன ஆணைகள்

தமிழ்நாடு அரசுப் பணியாளர் தேர்வாணையம் மூலம் வேலைவாய்ப்பு மற்றும் பயிற்சித் துறைக்குத் தேர்வு செய்யப்பட்ட 673 புதிய இளநிலைப் பயிற்சி அலுவலர்களுக்கு முதலமைச்சர் பணிநியமன ஆணைகளை வழங்கினார்.

நிகழ்ச்சிக்கு முன்னதாக, கிண்டி அரசு தொழிற்பயிற்சி நிலைய வளாகத்தில் மாணவர்களின் திறன் படைப்புகளை முதலமைச்சர் பார்வையிட்டார். டர்னர், வெல்டர், ஹைட்ராலிக் மற்றும் நியூமேட்டிக்ஸ், ரோபோட்டிக்ஸ், மேம்பட்ட CNC, லேசர் கட்டிங் உள்ளிட்ட ஆய்வகங்களில் மாணவர்களுக்கு வழங்கப்படும் நவீன தொழில்நுட்பப் பயிற்சி வசதிகளையும் ஆய்வு செய்தார். மாணவர்களுடன் கலந்துரையாடியும் அவர்களை ஊக்குவித்தார்.

மேலும், கிண்டி அரசு தொழிற்பயிற்சி நிலையத்தில் காது கேளாத மற்றும் வாய் பேச முடியாத மாற்றுத்திறனாளி மாணவர்களுக்காகச் செயல்படும் ஃபிட்டர் தொழிற்பிரிவில் பயிலும் மாணவ, மாணவியரைச் சந்தித்து வாழ்த்துத் தெரிவித்தார். ஜப்பானின் EHIME NISSAN நிறுவனத்தில் பணியமர்விற்குத் தேர்வு செய்யப்பட்டு, சிறப்புத் தொழில்நுட்பப் பயிற்சி மற்றும் ஜப்பானிய மொழி பயின்று வரும் மாணவர்களையும் சந்தித்துப் பாராட்டினார்.

இந்நிகழ்ச்சியில் தொழிலாளர் நலன் மற்றும் திறன் மேம்பாட்டுத் துறை அமைச்சர் தா. முகமது பர்வேஸ், சட்டமன்ற உறுப்பினர் எம். அருள் பிரகாசம், தலைமைச் செயலாளர் முனைவர் மு. சாய்குமார், துறைச் செயலாளர் கொ. வீர ராகவ ராவ், வேலைவாய்ப்பு மற்றும் பயிற்சித் துறை இயக்குநர் டாக்டர் சி. பழனி, Schneider Electric India நிறுவனத்தின் நிர்வாக இயக்குநர் தீபக் ஷர்மா உள்ளிட்ட அரசு உயர் அலுவலர்கள், தொழில் நிறுவனப் பிரதிநிதிகள் மற்றும் மாணவ, மாணவியர் கலந்து கொண்டனர்.

தமிழ்நாட்டில் அரசு மற்றும் தனியார் தொழிற்பயிற்சி நிலையங்கள் மூலம் சுமார் 67,000 மாணவ, மாணவியர் பயிற்சி பெற்று வரும் நிலையில், நவீன ஆய்வகங்கள் மற்றும் திறன் மேம்பாட்டு வசதிகள் தொழில்நுட்பக் கல்விக்கும் வேலைவாய்ப்புக்கும் உதவும் வகையில் அமைந்துள்ளன.