275 மலைப்படிகள்… 275 யோகாசனங்கள்! பழனி ஐவர் மலையில் மூன்று மாணவர்கள் உலக சாதனை முயற்சி!

பழனி:

திண்டுக்கல் மாவட்டம், பழனி அருகே உள்ள ஐவர் மலையில், 275 மலைப்படிகளில் ஏறியபடி 275 யோகாசனங்களைச் செய்து மூன்று மாணவர்கள் உலக சாதனை முயற்சியில் ஈடுபட்டனர்.

குளோபல் வேர்ல்டு ரெக்கார்ட்ஸ் (GWR) அமைப்பின் கீழ், அக்டோபர் 31ஆம் தேதியான இன்று இந்த வித்தியாசமான நிகழ்ச்சி நடைபெற்றது. மலைப்படிகளில் ஏறும்போது ஒவ்வொரு படியிலும் ஒரு யோகாசனம் என மொத்தம் 275 படிகளில் 275 யோகாசனங்களைச் செய்வதே இந்த முயற்சியின் சிறப்பம்சமாகும்.

மூன்று மாணவர்கள் பங்கேற்பு

இந்தச் சாதனை முயற்சியில் PRG வேலப்பநாயுடு மெட்ரிக் மேல்நிலைப் பள்ளியைச் சேர்ந்த T.N. நகுலன், A. மேஹவர்ணிகா மற்றும் பாரத் பப்ளிக் பள்ளியைச் சேர்ந்த V. ரெனுஷ்கா ஆகிய மூன்று மாணவர்கள் பங்கேற்றனர்.

ராம் யோகாலயா மையத்தின் யோகா பயிற்றுநர் பிரகாஷ் மேற்பார்வையில் நடைபெற்ற இந்நிகழ்வில், குளோபல் வேர்ல்டு ரெக்கார்ட்ஸ் அமைப்பின் அலுவலர் ராஜேஷ்குமார் முன்னிலை வகித்தார். மாணவர்கள் ஒவ்வொரு மலைப்படியிலும் வெவ்வேறு யோகாசனங்களைச் செய்து தங்களது திறமையை வெளிப்படுத்தினர்.

யோகக் கலையின் சிறப்பை எடுத்துரைத்த முயற்சி

உடல் நெகிழ்வுத்தன்மை, மன ஒருமைப்பாடு, விடாமுயற்சி மற்றும் தன்னம்பிக்கை ஆகியவற்றை வளர்க்கும் யோகக் கலையின் சிறப்பை எடுத்துரைக்கும் வகையில் இந்த முயற்சி முன்னெடுக்கப்பட்டது.

இளைய தலைமுறையினர் கல்வியுடன் உடல் மற்றும் மன ஆரோக்கியத்திற்கும் முக்கியத்துவம் அளிக்க வேண்டும் என்பதை வலியுறுத்தும் வகையில் அமைந்த இந்த நிகழ்ச்சி, மாணவர்களின் திறமையையும் யோகக் கலையின் மகத்துவத்தையும் வெளிப்படுத்தியது.