“குதிரை பேரம் நடத்தியது திமுகதான்” – பேரவையில் ஆதவ் அர்ஜுனா பரபரப்பு குற்றச்சாட்டு!

சென்னை: தமிழக சட்டப்பேரவையில் குதிரை பேரம் தொடர்பான விவகாரம் இன்று பெரும் பரபரப்பை ஏற்படுத்தியது. தமிழக வெற்றிக் கழகத்தின் அமைச்சர் ஆதவ் அர்ஜுனா, தேர்தலுக்குப் பின்னர் குதிரை பேரத்தில் ஈடுபட்டது திமுகதான் என சட்டப்பேரவையில் பகிரங்கமாக குற்றம்சாட்டினார்.

எதிர்க்கட்சித் தலைவர் ஊடகங்களுக்கு அளித்த பேட்டியில், தவெக கூட்டணியில் உள்ள இந்திய யூனியன் முஸ்லிம் லீக் கட்சி எம்.எல்.ஏ.க்கள் தொடர்பாக குதிரை பேரம் நடந்ததாக கூறியிருப்பதாக ஆதவ் அர்ஜுனா குறிப்பிட்டார். இதற்கு பதிலளித்த அவர், தவெக எந்த சட்டமன்ற உறுப்பினரிடமும் தனிப்பட்ட முறையில் பேரம் பேசவில்லை என்றும் தெரிவித்தார்.

மேலும், தேர்தல் முடிவுகளுக்குப் பிறகு காங்கிரஸ், இந்திய யூனியன் முஸ்லிம் லீக், விடுதலை சிறுத்தைகள் கட்சி மற்றும் கம்யூனிஸ்ட் கட்சிகளின் தலைவர்களுடன் மட்டுமே அரசியல் ரீதியான பேச்சுவார்த்தைகள் நடைபெற்றதாகவும், ஜனநாயக அடிப்படையிலேயே ஆட்சி அமைக்கப்பட்டதாகவும் ஆதவ் அர்ஜுனா விளக்கம் அளித்தார்.

“அக்கார்டு ஹோட்டலில் தங்க வைத்தது யார்?”

குதிரை பேரம் தொடர்பாக பேசும்போது, இரண்டு எம்.எல்.ஏ.க்கள் சென்னை அக்கார்டு ஹோட்டலில் தங்க வைக்கப்பட்டதாகக் கூறப்படும் விவகாரத்தையும் ஆதவ் அர்ஜுனா சட்டப்பேரவையில் எழுப்பினார்.

அந்த ஹோட்டல் திமுக எம்.பி. ஜெகத்ரட்சகனுடன் தொடர்புடையது எனக் குறிப்பிட்ட ஆதவ் அர்ஜுனா, அங்கு எம்.எல்.ஏ.க்கள் தங்க வைக்கப்பட்ட விவகாரம் குறித்து விரைவாக விசாரணை நடத்த வேண்டும் என வலியுறுத்தினார்.

இதையடுத்து, “குதிரை பேரத்தை நடத்தியது யார் என்பது தெரியும்; திமுகதான் குதிரை பேரம் நடத்தியது” என ஆதவ் அர்ஜுனா திட்டவட்டமாக குற்றம்சாட்டினார்.

இந்த விவகாரம் தொடர்பான குற்றச்சாட்டுகள் குறித்து உரிய விசாரணை நடத்தப்பட வேண்டும் என்பதே தவெக தரப்பின் நிலைப்பாடாக உள்ளது. குற்றச்சாட்டுகள் தொடர்பாக சம்பந்தப்பட்ட தரப்பினரின் பதிலும், விசாரணையின் முடிவுகளும் வெளிவர வேண்டியுள்ளது.