பாலராமபுரத்தில் சோகம்: 5 வயது சிறுவன் கிணற்றில் சடலமாக மீட்பு.

கேரள மாநிலம் பாலராமபுரத்தில் வீட்டின் அருகே உள்ள ஆள் நடமாட்டம் இல்லாத வீட்டின் கிணற்றில் 5 வயது சிறுவன் சடலமாக மீட்கப்பட்ட சம்பவம் சோகத்தை ஏற்படுத்தியுள்ளது. கோட்டுக்கால்கோணம் பகுதியைச் சேர்ந்த திலீப் – ஸ்ருதி தம்பதியின் மகன் தீபக் (5) உயிரிழந்துள்ளார்.

திடீரென மாயமான சிறுவன்

தீபக் வீட்டில் இருந்து காணாமல் போனதை அறிந்த பெற்றோர், இன்று மதியம் பாலராமபுரம் காவல் நிலையத்தில் புகார் அளித்தனர். புகாரின் அடிப்படையில் போலீசார் உடனடியாக விசாரணை மற்றும் தேடுதல் பணியைத் தொடங்கினர். இதையடுத்து, போலீசார் நெய்யாற்றின்கரை தீயணைப்பு மற்றும் மீட்புப் படையினரின் உதவியுடன் சிறுவனை தேடும் பணியில் ஈடுபட்டனர்.

கிணற்றில் சடலம் மீட்பு

தேடுதல் பணியின்போது, வீட்டுக்கு அருகில் நீண்ட காலமாக ஆள் வசிக்காத வீட்டின் வளாகத்தில் இருந்த கிணற்றில் சிறுவனின் உடல் இருப்பது கண்டறியப்பட்டது. தகவல் அறிந்த தீயணைப்பு மற்றும் மீட்புப் படையினர் கிணற்றுக்குள் இறங்கி ஆய்வு மேற்கொண்டனர். பின்னர் சிறுவனின் உடலை பாதுகாப்பாக மீட்டு வெளியே கொண்டு வந்தனர்.

சம்பவம் தொடர்பாக பாலராமபுரம் போலீசார் தொடர்ந்து விசாரணை நடத்தி வருகின்றனர். சிறுவன் கிணற்றில் விழுந்தது எப்படி என்பது உள்ளிட்ட விவரங்கள் குறித்து விசாரணை நடைபெற்று வருகிறது.