“உயிரைவிடத் தமிழினத்தின் அடையாளமே பெரிது!” – தியாகி சங்கரலிங்கனாருக்கு முதல்வர் விஜய் வீரவணக்கம்.

சென்னை: தமிழ்நாடு எனப் பெயர் மாற்றம் செய்ய வேண்டும் என்ற கோரிக்கையை முன்வைத்து 76 நாட்கள் அறவழியில் உண்ணாவிரதம் இருந்து உயிர்த்தியாகம் செய்த தியாகி சங்கரலிங்கனாரின் நினைவு நாளையொட்டி, முதல்வர் விஜய் அவருக்கு வீரவணக்கம் செலுத்தியுள்ளார்.

இதுகுறித்து முதல்வர் விஜய் வெளியிட்டுள்ள பதிவில், தமிழ்நாடு எனப் பெயர் மாற்றம் செய்யப்பட வேண்டும் என்பதை முதன்மைக் கோரிக்கையாக முன்வைத்து, 76 நாட்கள் உறுதியான உண்ணாவிரதம் இருந்து தனது இன்னுயிரைத் தியாகம் செய்த ஒப்பற்ற தியாகி சங்கரலிங்கனாரை நினைவுகூர்ந்துள்ளார்.

தனது கொள்கையிலும், தமிழ் மண்ணின் தன்னாட்சிப் பெருமையிலும் எள்ளளவும் விட்டுக்கொடுக்காமல், உயிரைவிடத் தமிழினத்தின் அடையாளமே பெரிது என்பதைத் தனது தியாகத்தின் மூலம் நிரூபித்தவர் சங்கரலிங்கனார் என முதல்வர் புகழாரம் சூட்டியுள்ளார்.

அவரது இணையற்ற உயிர்த்தியாகம் தமிழக மற்றும் இந்திய வரலாற்றுப் பக்கங்களில் பொன்னெழுத்துகளால் பொறிக்கப்பட வேண்டிய ஒன்று என்றும் அவர் குறிப்பிட்டுள்ளார்.

மேலும், தமிழ்நாட்டின் தனித்துவத்தையும் தமிழர் உரிமையையும் காக்க தியாகி சங்கரலிங்கனார் கொண்டிருந்த உறுதியும் அவரது தியாகமும் என்றும் நமக்கு வழிகாட்டட்டும் என முதல்வர் விஜய் தனது பதிவில் தெரிவித்துள்ளார்.