தமிழக வெற்றிக்குரல் காவிரி நதிநீர் விவகாரம்: ஓசூரில் மேகதாதுவை நோக்கி கண்டன நடைப்பயணம் – 125 பேர் கைது!
By
News Desk
ஓசூர், செப். 2: காவிரி நதிநீர் விவகாரத்தில் கர்நாடக அரசின் நடவடிக்கைகளை கண்டித்தும், மேகதாது அணைத் திட்டத்தை கைவிட வலியுறுத்தியும் கிருஷ்ணகிரி மாவட்டம் ஓசூரில் நடைபெற்ற கண்டன நடைப்பயணத்தில் ஈடுபட்ட 125 பேரை காவல்துறையினர் கைது செய்தனர்.
தமிழகத்தின் காவிரி நதிநீர் உரிமையை நிலைநாட்ட வலியுறுத்தி, தமிழக மக்கள் ஜனநாயக கட்சி சார்பில் மேகதாதுவை நோக்கிய கண்டன நடைப்பயணம் ஓசூர் பேருந்து நிலையம் முன்பு நடைபெற்றது.
இந்தப் போராட்டத்திற்கு தமிழக மக்கள் ஜனநாயக கட்சியின் தலைவர் கே.எம். சரீப் தலைமை வகித்தார். கட்சி சார்பற்ற விவசாயிகள் சங்கத் தலைவர் திருப்பூர் ஆறு. காளிமுத்து நடைப்பயணத்தை தொடங்கி வைத்தார்.
நிகழ்ச்சியில் தமிழர் ஆட்சிக் கழகத் தலைவர் எஸ்.ஆர். பாண்டியன், தமிழ்நாடு விவசாய சங்கங்களின் கூட்டியக்கத் தலைவர் தனபாலன், ஐயா வி.என். அரசு உள்ளிட்ட பல்வேறு அரசியல் இயக்கங்கள் மற்றும் விவசாய அமைப்புகளின் நிர்வாகிகள் கலந்து கொண்டனர்.
நான்கு முக்கிய கோரிக்கைகள்
போராட்டத்தின்போது கர்நாடக அரசைக் கண்டித்து முழக்கங்கள் எழுப்பப்பட்டன. மேலும், முக்கியமாக நான்கு கோரிக்கைகளை வலியுறுத்தி போராட்டக்காரர்கள் முழக்கமிட்டனர்.
- காவிரியில் தமிழகத்துக்கு உரிய நதிநீர் பங்கை கர்நாடக அரசு உடனடியாக வழங்க வேண்டும்.
- தமிழகத்தின் அனுமதியின்றி மேற்கொள்ளப்படும் மேகதாது அணைத் திட்டத்தை கர்நாடக அரசு கைவிட வேண்டும்.
- தமிழக மக்களின் முக்கிய குடிநீர் ஆதாரமான காவிரி ஆற்றில் கழிவுநீர் கலப்பதைத் தடுக்க வேண்டும்.
- படுகொலை செய்யப்பட்டதாக கூறப்படும் 3 தமிழர் குடும்பங்களுக்கு உரிய நீதி வழங்க வேண்டும்.
நடைப்பயணத்தை தடுத்து 125 பேர் கைது
இந்தக் கோரிக்கைகளை வலியுறுத்தி முழக்கங்களை எழுப்பியவாறு ஓசூரில் இருந்து மேகதாது அணையை நோக்கி நடைப்பயணமாக புறப்பட்ட சுமார் 125 பேரை காவல்துறையினர் தடுத்து நிறுத்தினர்.
இதையடுத்து போராட்டத்தில் ஈடுபட்ட 125 பேரையும் போலீசார் கைது செய்து அழைத்துச் சென்றனர். இதனால் அப்பகுதியில் சிறிது நேரம் பரபரப்பு ஏற்பட்டது.
“போராட்டம் தொடரும்” – கே.எம். சரீப்
கைது நடவடிக்கையைத் தொடர்ந்து செய்தியாளர்களிடம் பேசிய தமிழக மக்கள் ஜனநாயக கட்சித் தலைவர் கே.எம். சரீப், தங்களது நடைப்பயணம் தடுக்கப்பட்டாலும், போராட்டத்தின் நியாயத்தை தமிழக மக்களிடம் எடுத்துச் செல்ல விரும்புவதாக தெரிவித்தார்.
மேகதாது அணைத் திட்டம் தமிழகத்தின் சுற்றுச்சூழல் மற்றும் காவிரி நீர் உரிமையை பாதிக்கும் என அவர் குற்றம்சாட்டினார். மேலும், கர்நாடகத்தில் இருந்து மின்னணுக் கழிவுகள் தமிழகத்திற்குள் கொண்டுவரப்படுவதாகவும், இதனை தமிழக அரசு தடுத்து நிறுத்த வேண்டும் என்றும் அவர் வலியுறுத்தினார்.
மேலும், உச்சநீதிமன்ற உத்தரவுகளுக்குப் பிறகும் தமிழகத்துக்கான காவிரி நீர் பங்கில் பிரச்னைகள் நீடிப்பதாக அவர் குற்றம்சாட்டினார்.
“ஒரு காட்டைக் கொளுத்துவதற்கு ஒரு தீக்குச்சி போதுமானது. அதுபோல இந்தச் சிறிய கூட்டம் பிரச்சினையைத் தீர்ப்பதற்கான முயற்சியை தொடங்கியுள்ளது. தமிழக மக்கள் கிளர்ந்தெழுந்து தொடங்கியுள்ள இந்தப் போராட்டம் வெறும் தொடக்கம்தான்” என கே.எம். சரீப் தெரிவித்தார்.
காவிரி நதிநீர் விவகாரம் மற்றும் மேகதாது அணைத் திட்டத்திற்கு எதிரான இந்தப் போராட்டம் காரணமாக ஓசூரில் காவல்துறை பாதுகாப்பும் பலப்படுத்தப்பட்டிருந்தது.
