ரயில் நிலைய பார்க்கிங் கட்டணத்தில் ரூ.7.56 கோடி வரி ஏய்ப்பு? 69 இடங்களில் ஜிஎஸ்டி அதிரடி சோதனை.

கேரளாவில் தெற்கு ரயில்வேக்கு உட்பட்ட ரயில் நிலையங்களில் செயல்பட்டு வரும் வாகன பார்க்கிங் சேவைகளில் மிகப்பெரிய அளவில் வரி ஏய்ப்பு நடைபெற்றுள்ளதாக மாநில சரக்கு மற்றும் சேவை வரித்துறை (SGST) நடத்திய சோதனையில் தெரியவந்துள்ளது.

கடந்த செப்டம்பர் 16-ஆம் தேதி, SGST துறையின் புலனாய்வு மற்றும் அமலாக்கப் பிரிவுகள் இணைந்து மாநிலம் முழுவதும் இந்த சோதனையை மேற்கொண்டன.

69 இடங்களில் அதிரடி சோதனை

ரயில்வே வளாகங்களில் வாகன பார்க்கிங் சேவைகளை வழங்கி வரும் 22 வரி செலுத்துவோருக்கு சொந்தமான முக்கிய தொழில் நிறுவனங்கள், கூடுதல் தொழில் நிறுவனங்கள் மற்றும் குடியிருப்புகள் என மொத்தம் 69 இடங்களில் சோதனை நடைபெற்றது.

சோதனையின்போது, பார்க்கிங் சேவைகள் மூலம் கிடைத்த உண்மையான வருவாயை விட கணிசமாக குறைவான தொகையே வருமான வரிக் கணக்குகளில் காட்டப்பட்டிருந்ததாக அதிகாரிகள் தெரிவித்தனர்.

ரூ.42 கோடி வருவாய் மறைப்பு?

விசாரணையில் சுமார் ரூ.42 கோடி அளவிலான வருவாய் மறைக்கப்பட்டிருக்கலாம் என கண்டறியப்பட்டுள்ளதாகவும், இதன் அடிப்படையில் சுமார் ரூ.7.56 கோடி ஜிஎஸ்டி வரி ஏய்ப்பு நடைபெற்றுள்ளதாகவும் அதிகாரிகள் தெரிவித்துள்ளனர்.

மேலும், பார்க்கிங் கட்டணங்களை வசூலிப்பதற்காக ஒரே நிறுவனத்தால் ஒன்றுக்கும் மேற்பட்ட QR குறியீடுகள் பயன்படுத்தப்பட்டதும் சோதனையில் கண்டறியப்பட்டதாக கூறப்படுகிறது.

மென்பொருள், பதிவேடுகள், மொபைல் சாட்டுகள் ஆய்வு

22 வரி செலுத்துவோரில் 13 பேரின் தகவல்கள் மென்பொருள் தரவுகளில் இருந்து சேகரிக்கப்பட்டுள்ளதாக அதிகாரிகள் தெரிவித்துள்ளனர்.

மற்றவர்களின் விவரங்கள் பதிவேடுகள், கணக்கு புத்தகங்கள் மற்றும் மொபைல் வாட்ஸ்அப் உள்ளிட்ட உரையாடல்களில் இருந்து சேகரிக்கப்பட்டதாகவும் கூறப்பட்டுள்ளது.

1,000-க்கும் மேற்பட்ட பார்க்கிங் மையங்கள் கண்காணிப்பு

ரயில் நிலையங்களைத் தவிர, கேரளாவில் செயல்பட்டு வரும் கே.எஸ்.ஆர்.டி.சி பேருந்து நிலையங்கள், மருத்துவமனைகள், வணிக வளாகங்கள் மற்றும் திரையரங்குகள் உள்ளிட்ட இடங்களில் உள்ள 1,000-க்கும் மேற்பட்ட வாகன பார்க்கிங் மையங்களின் தகவல்களையும் மாநில ஜிஎஸ்டி புலனாய்வுப் பிரிவு சேகரித்துள்ளதாக தெரிவிக்கப்பட்டுள்ளது.

இதன் மூலம் மேலும் வரி ஏய்ப்பு நடைபெற்றுள்ளதா என்பது தொடர்பாக தொடர்ந்து ஆய்வு நடத்தப்பட உள்ளது.

பொதுமக்கள் தகவல் தெரிவிக்கலாம்

வரி ஏய்ப்பு தொடர்பான தகவல்கள் பொதுமக்களிடம் இருந்தால், inform.sgst@kerala.gov.in என்ற மின்னஞ்சல் முகவரிக்கு தெரிவிக்கலாம் என மாநில சரக்கு மற்றும் சேவை வரி ஆணையர் தெரிவித்துள்ளார்.

வரி ஏய்ப்பில் ஈடுபடுவோர் மீது விசாரணை மற்றும் சட்ட நடவடிக்கைகள் தொடர்ந்து கடுமையாக மேற்கொள்ளப்படும் என்றும் அதிகாரிகள் எச்சரித்துள்ளனர்.