பள்ளி மாணவர்களின் பாதுகாப்பான பயணத்திற்கு இடையூறு: ஆக்கிரமிப்பை அகற்ற குழந்தைகள் உரிமைகள் ஆணையம் உத்தரவு.

கேரள மாநிலம் நெய்யாற்றின்கரை அருகே காரோடு கிராம பஞ்சாயத்தில், பள்ளி மாணவர்கள் செல்லும் பொதுப்பாதையில் ஏற்பட்டுள்ள ஆக்கிரமிப்பு மற்றும் போக்குவரத்து இடையூறு தொடர்பாக கேரள குழந்தைகள் உரிமைகள் பாதுகாப்பு ஆணையம் தலையிட்டு நடவடிக்கை எடுக்க உத்தரவிட்டுள்ளது.

காரோடு கிராம பஞ்சாயத்துக்கு உட்பட்ட குழிஞ்ஞான்விளா – தாழைவிளா சாலை வழியாக பள்ளிக்கு செல்லும் மாணவர்களின் பாதுகாப்பான பயணத்திற்கு இடையூறு ஏற்படுவதாக புகார் அளிக்கப்பட்டிருந்தது.

பொதுப்பாதையில் ஆக்கிரமிப்பு

பொதுமக்கள் பயன்படுத்தும் சாலையில் போக்குவரத்துக்கு இடையூறு ஏற்படுத்தும் வகையில் புறம்போக்கு நிலத்தை ஆக்கிரமித்து கட்டிடம் கட்டப்பட்டுள்ளதாக புகாரில் தெரிவிக்கப்பட்டிருந்தது.

இதனால் பள்ளி மாணவர்கள் பாதுகாப்பாக நடந்து செல்லவும், பள்ளி பேருந்துகள் மற்றும் பிற வாகனங்கள் சாலையில் சீராகச் செல்லவும் சிரமம் ஏற்படுவதாகவும் கூறப்பட்டிருந்தது.

இதையடுத்து, ஆக்கிரமிக்கப்பட்ட இடத்தை அகற்றி மாணவர்கள் தடையின்றி பயணிக்கும் வகையில் வசதி ஏற்படுத்துமாறு காரோடு கிராம பஞ்சாயத்து செயலருக்கு குழந்தைகள் உரிமைகள் பாதுகாப்பு ஆணையம் உத்தரவிட்டுள்ளது.

ஆக்கிரமிப்பு கட்டிடத்தால் ஆபத்து ஏற்படும் வாய்ப்பு

புறம்போக்கு நிலத்தில் ஆக்கிரமித்து கட்டப்பட்டுள்ள ஓட்டு கட்டிடத்தின் ஒரு பகுதி, மாணவர்கள் மற்றும் பொதுமக்களுக்கு ஆபத்தை ஏற்படுத்தும் வாய்ப்பு இருப்பதாக ஆணையம் தெரிவித்துள்ளது.

இதனால் காரோடு வில்லேஜ் அலுவலர், காரோடு கிராம பஞ்சாயத்து செயலர் மற்றும் பொழியூர் காவல் நிலைய ஹவுஸ் ஆபீசர் ஆகியோர் அவசர நடவடிக்கை எடுக்க வேண்டும் என உத்தரவிடப்பட்டுள்ளது.

ஆக்கிரமிப்பை அகற்ற தேவையான சூழல் ஏற்பட்டால், கேரள பஞ்சாயத்து ராஜ் சட்டத்தின் விதிகளின்படி பொழியூர் காவல் நிலைய ஹவுஸ் ஆபீசரின் உதவியை பஞ்சாயத்து செயலர் கோரலாம் என்றும் ஆணையம் தெரிவித்துள்ளது.

மின்கம்பத்தை மாற்ற உத்தரவு

ஆக்கிரமிப்பை அகற்றும் நடவடிக்கையின்போது, போக்குவரத்து மற்றும் பொதுமக்களின் நடமாட்டத்திற்கு இடையூறாக இருக்கும் மின்கம்பத்தையும் அவசரமாக மாற்ற நடவடிக்கை எடுக்குமாறு நெய்யாற்றின்கரை கே.எஸ்.இ.பி. நிர்வாகப் பொறியாளருக்கு உத்தரவிடப்பட்டுள்ளது.

மேலும், சாலையின் தொடக்கப் பகுதியில் அமைந்துள்ள செயின்ட் மேரிஸ் மலங்கரா கத்தோலிக்க தேவாலயத்தின் தூண், வாகனப் போக்குவரத்துக்கும் பொதுமக்களின் நடமாட்டத்துக்கும் இடையூறு ஏற்படாத வகையில் மாற்றி அமைக்க தேவையான நடவடிக்கை எடுக்குமாறு தேவாலய பங்குத்தந்தைக்கும் ஆணையம் அறிவுறுத்தியுள்ளது.

பஞ்சாயத்து வார்டு உறுப்பினர் மனு

இந்த விவகாரம் தொடர்பாக காரோடு கிராம பஞ்சாயத்து குழிஞ்ஞான்விளா வார்டு உறுப்பினர் ஏ. அஜீஷ் மனு தாக்கல் செய்திருந்தார்.

குழந்தைகள் உரிமைகள் பாதுகாப்பு ஆணையத்தின் உறுப்பினர்களான டாக்டர் எஃப். வில்சன், பி. மோகன்குமார் மற்றும் கே.கே. ஷாஜு ஆகியோர் அடங்கிய முழு அமர்வு இந்த உத்தரவை பிறப்பித்துள்ளது.

மாணவர்கள் பாதுகாப்பாக பள்ளிக்குச் சென்று வருவதற்கான சாலை வசதியை உறுதி செய்யும் வகையில், சம்பந்தப்பட்ட துறைகள் ஒருங்கிணைந்து நடவடிக்கை எடுக்க வேண்டிய நிலை ஏற்பட்டுள்ளது.