தமிழக வெற்றிக்குரல் பென்னாகரத்தில் நில அளவீட்டின்போது தகராறு: 100-க்கும் மேற்பட்டோர் சாலை மறியல்.
By
தருமபுரி மாவட்டம், பென்னாகரம் பேருந்து நிலையம் அருகே சுன்னத் ஜமாத் ஜாமியா மஜித்துக்கு சொந்தமான நிலத்தை அளவீடு செய்யும் பணியின்போது ஏற்பட்ட தகராறில், முத்தவல்லி தரப்பினரை தாக்கியவர்களை கைது செய்யக் கோரி 100-க்கும் மேற்பட்டோர் சாலை மறியலில் ஈடுபட்டதால் பரபரப்பு ஏற்பட்டது.
பென்னாகரம் பேருந்து நிலையம் அருகே சுன்னத் ஜமாத் ஜாமியா மஜித்துக்கு சொந்தமான சுமார் 12 ஏக்கர் நிலம் உள்ளதாக கூறப்படுகிறது. இந்த நிலத்தின் சில பகுதிகளில் ஆக்கிரமிப்பு செய்து வீடுகள் மற்றும் கடைகள் கட்டப்பட்டு வருவதாக மஜித் முத்தவல்லி தௌலத் பாஷா தரப்பினர் குற்றம்சாட்டியுள்ளனர்.
இதுதொடர்பாக முத்தவல்லி தௌலத் பாஷாவுக்கும், இஸ்மாயில் உள்ளிட்ட மற்றொரு தரப்பினருக்கும் ஏற்கெனவே தகராறு இருந்து வந்ததாக கூறப்படுகிறது.
வஃக்பு வாரிய அதிகாரிகள் நில அளவீடு
நில ஆக்கிரமிப்பு தொடர்பாக வஃக்பு வாரியத்திடம் புகார் அளிக்கப்பட்டதுடன், சம்பந்தப்பட்ட நிலத்தை அளவீடு செய்யக் கோரி இரு தரப்பினரும் விண்ணப்பித்திருந்ததாக தெரிவிக்கப்பட்டுள்ளது.
இதையடுத்து, வஃக்பு வாரிய அதிகாரிகள் மஜித்துக்கு சொந்தமான நிலத்தை அளவீடு செய்வதற்காக செப்டம்பர் 28-ஆம் தேதி பென்னாகரத்திற்கு வந்தனர்.
அப்போது இரு தரப்பினருக்கும் இடையே தகராறு ஏற்பட்டதாகவும், ஒருவரையொருவர் தாக்கிக்கொண்டதாகவும் கூறப்படுகிறது.
100-க்கும் மேற்பட்டோர் சாலை மறியல்
இந்த சம்பவத்தில் முத்தவல்லி தௌலத் பாஷாவை தாக்கியதாக கூறப்படும் நபர்களை கைது செய்ய வலியுறுத்தி, அவரது தரப்பைச் சேர்ந்த 100-க்கும் மேற்பட்டோர் பென்னாகரம்–தருமபுரி சாலையில் மாலை சுமார் 6 மணியளவில் மறியலில் ஈடுபட்டனர்.
இதனால் அந்த பகுதியில் போக்குவரத்து பாதிக்கப்பட்டது.
தகவல் அறிந்து சம்பவ இடத்திற்கு வந்த பென்னாகரம் காவல் துணைக் கண்காணிப்பாளர் தங்கவேல், காவல் ஆய்வாளர் ஜாகிர் உசேன் மற்றும் பென்னாகரம் துணை வட்டாட்சியர் குமரன் ஆகியோர் மறியலில் ஈடுபட்டவர்களிடம் பேச்சுவார்த்தை நடத்தினர்.
இதையடுத்து போராட்டத்தில் ஈடுபட்டவர்கள் சாலை மறியலை கைவிட்டு கலைந்து சென்றனர். தொடர்ந்து, அவர்கள் காவல் நிலையத்தில் புகார் அளித்தனர்.
மஜித் பகுதியில் போலீஸ் பாதுகாப்பு
சாலை மறியல் காரணமாக அப்பகுதியில் ஒரு மணி நேரத்துக்கும் மேலாக போக்குவரத்து பாதிக்கப்பட்டதாக தெரிவிக்கப்பட்டுள்ளது.
நில அளவீட்டின்போது ஏற்பட்ட தகராறு தொடர்பாக போலீசார் விசாரணை மேற்கொண்டு வரும் நிலையில், தொடர்ந்து பதற்றம் ஏற்படாமல் இருக்க மஜித் பகுதியில் போலீஸ் பாதுகாப்பு பணியில் ஈடுபடுத்தப்பட்டுள்ளது.
