தி.நகரில் சித்தப்பா–சித்தியை கத்தியால் தாக்கிய 4 பேர் கைது! வீடு தொடர்பான தகராறில் விபரீதம் – 2 கத்திகள் பறிமுதல்; கைதானவர்களுக்கு ஏற்கனவே குற்ற வழக்குகள் இருப்பது அம்பலம்

சென்னை, தி.நகர்:

தி.நகர் பகுதியில் வீடு தொடர்பான முன்விரோதத்தில் சித்தப்பா மற்றும் அவரது மனைவியை வழிமறித்து கத்தியால் தாக்கி கொலை மிரட்டல் விடுத்ததாக கூறப்படும் 4 பேரை சௌந்தரபாண்டியனார் அங்காடி காவல் நிலைய போலீசார் கைது செய்தனர். அவர்களிடமிருந்து குற்றச் செயலுக்கு பயன்படுத்தியதாக கூறப்படும் 2 கத்திகள் பறிமுதல் செய்யப்பட்டன.

வீடு தொடர்பாக சகோதரர்களிடையே தகராறு

தி.நகர், பாரதி நகர், ராமகிருஷ்ணாபுரம் பகுதியைச் சேர்ந்த நவீன்குமார் (34) என்பவர் தனது சொந்த வீட்டின் கீழ்தளத்தில் வசித்து வந்ததாக கூறப்படுகிறது. அதே வீட்டின் மேல்தளத்தில் அவரது அண்ணன் சாம்குமார் குடும்பத்துடன் வசித்து வந்துள்ளார்.

நவீன்குமார் வசித்து வந்த வீடு சிறியதாக இருந்ததால், தனது தாயாரை அங்கு தங்க வைத்துவிட்டு, கடந்த 2 மாதங்களாக தி.நகர் பசுல்லா சாலையில் உள்ள வாடகை வீட்டில் மனைவியுடன் வசித்து வந்ததாக கூறப்படுகிறது.

இந்த நிலையில், கீழ்தளத்தில் தனது தாயார் வசித்து வந்த வீட்டையும் சாம்குமார் தன்னுடையது எனக் கூறி பிரச்சனை செய்து, வீட்டை பூட்டிவிட்டு தாயாரை வெளியே அனுப்பியதாக புகாரில் தெரிவிக்கப்பட்டுள்ளது.

இதுகுறித்து நவீன்குமார் தனது மனைவியுடன் சென்று சாம்குமாரிடம், “ஏன் அம்மாவை வெளியே அனுப்பினாய்? இந்த வீடு நம் இருவருக்கும் சொந்தமானது” எனக் கேட்டதாகவும், அப்போது சாம்குமார் நவீன்குமாரை தாக்க முயன்றதாகவும், அருகிலிருந்தவர்கள் தலையிட்டு சமாதானம் செய்து அனுப்பி வைத்ததாகவும் கூறப்படுகிறது.

வழிமறித்து கத்தியால் தாக்கியதாக புகார்

இதன் தொடர்ச்சியாக, கடந்த செப்டம்பர் 1ஆம் தேதி இரவு, நவீன்குமார் தனது மனைவி ரேவதி மற்றும் மகளுடன் தி.நகர், வடக்கு உஸ்மான் சாலை, திலக் தெருவில் டிபன் வாங்கிக் கொண்டு வீட்டிற்கு சென்று கொண்டிருந்ததாக கூறப்படுகிறது.

அப்போது அங்கு வந்த அவரது அண்ணன் சாம்குமாரின் மகன் ஷாம் மற்றும் அவரது நண்பர்கள், நவீன்குமார் மற்றும் ரேவதியை வழிமறித்து, “எதற்காக எனது அப்பாவிடம் தகராறு செய்கிறாய்?” எனக் கேட்டு தகாத வார்த்தைகளால் பேசியதாகவும், தொடர்ந்து இருவரையும் கத்தியால் தாக்கி கொலை மிரட்டல் விடுத்துச் சென்றதாகவும் புகார் தெரிவிக்கிறது.

இந்த தாக்குதலில் ரத்தக்காயமடைந்த நவீன்குமார் மற்றும் அவரது மனைவி ரேவதி, இராயப்பேட்டை அரசு மருத்துவமனையில் உள்நோயாளிகளாக அனுமதிக்கப்பட்டு சிகிச்சை பெற்று வருகின்றனர்.

கொலை முயற்சி உள்ளிட்ட பிரிவுகளில் வழக்குப்பதிவு

மருத்துவமனையிலிருந்து நவீன்குமார் அளித்த புகாரின் அடிப்படையில், R-4 சௌந்தரபாண்டியனார் அங்காடி காவல் நிலைய போலீசார் கொலை முயற்சி உள்ளிட்ட பிரிவுகளின் கீழ் வழக்குப்பதிவு செய்து விசாரணை மேற்கொண்டனர்.

காவல் ஆய்வாளர் தலைமையிலான தனிப்படை போலீசார் சம்பவ இடத்தில் தீவிர விசாரணை நடத்தி, இந்த குற்றச் சம்பவத்தில் தொடர்புடையதாகக் கூறப்படும் 4 பேரை கடந்த செப்டம்பர் 2ஆம் தேதி கைது செய்தனர்.

கைது செய்யப்பட்டவர்கள்:

1. ஷாம் என்கிற பார்த்திபன் (19) – ராமகிருஷ்ணாபுரம், தி.நகர்
2. ரூபன் (19) – ராமகிருஷ்ணாபுரம், தி.நகர்
3. தினேஷ் (21) – ராஜாஜி வடக்கு சாலை, நுங்கம்பாக்கம்
4. கோகுலகண்ணன் (21) – ராமகிருஷ்ணாபுரம், தி.நகர்

இவர்களிடமிருந்து குற்றச் செயலுக்கு பயன்படுத்தியதாக கூறப்படும் 2 கத்திகள் பறிமுதல் செய்யப்பட்டன.

கைதானவர்கள் மீது ஏற்கனவே குற்ற வழக்குகள்

போலீசாரின் விசாரணையில், கைது செய்யப்பட்ட ஷாம் என்கிற பார்த்திபன் மீது ஏற்கனவே 3 அடிதடி வழக்குகளும், ரூபன் மீது 2 குற்ற வழக்குகளும், கோகுலகண்ணன் மீது கஞ்சா வழக்கு உள்ளிட்ட 3 குற்ற வழக்குகளும் இருப்பது தெரியவந்ததாக போலீசார் தெரிவித்துள்ளனர்.

கைது செய்யப்பட்ட 4 பேரிடமும் விசாரணை மேற்கொள்ளப்பட்ட பின்னர், அவர்கள் நீதிமன்றத்தில் ஆஜர்படுத்தப்பட்டனர். நீதிமன்ற உத்தரவின்படி 4 பேரும் சிறையில் அடைக்கப்பட்டனர்.

சம்பவம் தொடர்பாக சௌந்தரபாண்டியனார் அங்காடி காவல் நிலைய போலீசார் தொடர்ந்து விசாரணை மேற்கொண்டு வருகின்றனர்.