இடைத்தேர்தல் எதிரொலி: செங்கல்பட்டு, திருப்பூரில் இன்று முதல் டாஸ்மாக் கடைகள் மூடல்.

தமிழகத்தில் மதுராந்தகம் மற்றும் தாராபுரம் சட்டமன்ற தொகுதிகளுக்கான இடைத்தேர்தல் அக்டோபர் 6ஆம் தேதி நடைபெற உள்ள நிலையில், தேர்தலை முன்னிட்டு செங்கல்பட்டு மற்றும் திருப்பூர் மாவட்டங்களில் இன்று முதல் டாஸ்மாக் மதுபானக் கடைகள், மதுபானக் கூடங்கள் உள்ளிட்டவை மூடப்படுகின்றன.

3 நாட்களுக்கு மதுபான விற்பனைக்கு தடை

தேர்தல் அமைதியான முறையில் நடைபெறுவதை உறுதி செய்யும் வகையில், அக்டோபர் 4, 5 மற்றும் 6ஆம் தேதிகளில் மதுபான விற்பனைக்கு தடை விதிக்கப்பட்டுள்ளது.

செங்கல்பட்டு மாவட்டத்தில் இயங்கி வரும் அரசு டாஸ்மாக் சில்லறை விற்பனை கடைகள், அவற்றுடன் இணைந்த மதுபானக் கூடங்கள் மற்றும் உரிமம் பெற்ற தனியார் மதுபான விற்பனை நிலையங்களும் இந்த உத்தரவுக்கு உட்பட்டுள்ளன.

திருப்பூர் மாவட்டத்திலும் தாராபுரம் சட்டமன்றத் தொகுதி இடைத்தேர்தலை முன்னிட்டு டாஸ்மாக் கடைகள் மற்றும் உரிமம் பெற்ற மதுபானக் கூடங்கள் மூடப்படுவதாக மாவட்ட நிர்வாகம் அறிவித்துள்ளது.

வாக்கு எண்ணிக்கை நாளிலும் கடைகள் மூடல்

இடைத்தேர்தலுக்கான வாக்குப்பதிவு அக்டோபர் 6ஆம் தேதி நடைபெறும் நிலையில், வாக்கு எண்ணிக்கை அக்டோபர் 9ஆம் தேதி நடைபெறுகிறது. அந்த நாளிலும் செங்கல்பட்டு மாவட்டத்தில் மதுபான விற்பனை நிலையங்கள் மூடப்படும் என மாவட்ட நிர்வாகம் தெரிவித்துள்ளது.

தேர்தல் காலத்தில் சட்டம்-ஒழுங்கை பராமரிப்பதற்காக மதுபான விற்பனைக்கு கட்டுப்பாடுகள் விதிக்கப்படுவது தேர்தல் நடைமுறையின் ஒரு பகுதியாகும். தேர்தல் ஆணையத்தின் வழிகாட்டுதலின்படி, வாக்குப்பதிவு நிறைவடையும் நேரத்திற்கு முந்தைய 48 மணி நேரத்தில் மதுபான விற்பனைக்கு தடை விதிக்கப்படுகிறது.