ஆம்னி பேருந்துகளில் அதிக கட்டணம் வசூல்: தமிழகம் முழுவதும் 1,222 பேருந்துகளில் அதிரடி சோதனை!

207 பேருந்துகளுக்கு சோதனை அறிக்கை, இ-சலான்; 4 பேருந்துகள் சிறைபிடிப்பு – ₹4.18 லட்சம் அபராதம் நிர்ணயம், ₹68,500 வசூல்

சென்னை – அக்டோபர் 16:

ஆயுத பூஜை மற்றும் விஜயதசமி தொடர் விடுமுறையை முன்னிட்டு, ஆம்னி பேருந்துகளில் பயணிகளிடம் அதிக கட்டணம் வசூலிப்பதைத் தடுக்கத் தமிழகம் முழுவதும் போக்குவரத்துத் துறை சார்பில் தீவிர வாகனத் தணிக்கை மேற்கொள்ளப்பட்டு வருகிறது.

அதிக கட்டணம் வசூலிக்கப்படுவதாகப் பயணிகளிடமிருந்து புகார்கள் வந்ததைத் தொடர்ந்து, போக்குவரத்துத் துறை அமைச்சரின் உத்தரவின்படி, அக்டோபர் 15ஆம் தேதி முதல் வட்டாரப் போக்குவரத்து அலுவலர்கள் மற்றும் மோட்டார் வாகன ஆய்வாளர்கள் அடங்கிய குழுவினர் இந்தச் சோதனையில் ஈடுபட்டு வருகின்றனர்.

1,222 ஆம்னி பேருந்துகளில் சோதனை

அக்டோபர் 15ஆம் தேதி மாலை முதல் அக்டோபர் 16ஆம் தேதி காலை வரை தமிழகம் முழுவதும் மொத்தம் 1,222 ஆம்னி பேருந்துகள் தணிக்கை செய்யப்பட்டன. இதில் விதிமீறல்கள் கண்டறியப்பட்ட 207 பேருந்துகளுக்கு சோதனை அறிக்கைகள் மற்றும் மின்னணு சலான்கள் வழங்கப்பட்டு உரிய நடவடிக்கைகள் மேற்கொள்ளப்பட்டன.

இந்தச் சோதனையின்போது, விதிமீறல்களுக்காக மொத்தம் ₹4,18,700 இணக்கக் கட்டணம் நிர்ணயிக்கப்பட்டது. இதில் ₹68,500 வசூலிக்கப்பட்டுள்ளது. மேலும், அதிக கட்டணம் வசூலித்தல் உள்ளிட்ட பிற குற்றங்களுக்காக நான்கு ஆம்னி பேருந்துகள் சிறைபிடிக்கப்பட்டன.

பயணச்சீட்டை ரத்து செய்தால் மாற்றுப் பேருந்து கட்டாயம்

ஆன்லைன் மூலம் பயணிகள் முன்பதிவு செய்த பயணச்சீட்டை ஆம்னி பேருந்து உரிமையாளர் ரத்து செய்யும் சூழலில், சம்பந்தப்பட்ட பயணிகள் பயணத்தைத் தொடர மாற்றுப் பேருந்து ஏற்பாடு செய்து தர வேண்டும் எனப் போக்குவரத்துத் துறை அறிவுறுத்தியுள்ளது.

இந்த விதிமுறையைப் பின்பற்றத் தவறும் ஆம்னி பேருந்துகளின் அனுமதிச் சான்றிதழை ரத்து செய்வது உள்ளிட்ட நடவடிக்கைகள் எடுக்கப்படும் என்றும் எச்சரிக்கப்பட்டுள்ளது.

அதிக கட்டணம் குறித்து எங்கே புகார் அளிக்கலாம்?

பண்டிகைக் காலங்களில் ஆம்னி பேருந்துகளில் அதிக கட்டணம் வசூலித்தல் மற்றும் பிற விதிமீறல்களைத் தடுக்கத் தொடர்ந்து தீவிர சோதனைகள் நடத்தப்படும் எனப் போக்குவரத்துத் துறை தெரிவித்துள்ளது.

ஆம்னி பேருந்துகளில் அதிக கட்டணம் வசூலிக்கப்பட்டால் அல்லது விதிமீறல்கள் இருந்தால், பொதுமக்கள் கீழ்க்கண்ட வழிகளில் புகார் அளிக்கலாம்:

• கட்டணமில்லா தொலைபேசி எண்: 1800 425 6151
• மின்னஞ்சல்: tc.tn@nic.in

பயணிகளின் நலனைக் கருத்தில் கொண்டு, விதிமீறல்களில் ஈடுபடும் ஆம்னி பேருந்துகள் மீது தொடர்ந்து நடவடிக்கை எடுக்கப்படும் என போக்குவரத்து மற்றும் சாலைப் பாதுகாப்பு ஆணையர் தெரிவித்துள்ளார்.