முன்கூட்டிப் பிறக்கும் குழந்தைகளுக்கான மருந்து தட்டுப்பாடா? தமிழக அரசு விளக்கம்.

Government of Tamil Nadu — Health and Family Welfare Department's Rejoinder to the news report "Govt. hospitals short on critical medicines for pre-term babies" (The Hindu, 22.09.2026)

The Government of Tamil Nadu accords the highest priority to newborn care, and the report's… pic.twitter.com/2CDBPqCp1r

— Arunraaj TVK (@arunraajkg) September 22, 2026

குறைப்பிரசவ குழந்தைகளுக்கு தொடர் மருத்துவக் கண்காணிப்பு

தமிழகத்தில் பிறக்கும் குறைப்பிரசவ குழந்தைகளின் பராமரிப்புக்கு அரசு அதிக முக்கியத்துவம் அளித்து வருவதாக சுகாதாரத்துறை தெரிவித்துள்ளது.

மாநிலம் முழுவதும் செயல்பட்டு வரும் சிறப்பு பிறந்த குழந்தைகள் பராமரிப்பு பிரிவுகள் (SNCU) மூலம் குறைப்பிரசவ குழந்தைகளுக்கு மருத்துவ நெறிமுறைகளின் அடிப்படையில் சிகிச்சைகள் வழங்கப்பட்டு வருவதாக அரசு கூறியுள்ளது.

குழந்தையின் மருத்துவ நிலைக்கு ஏற்ப சுவாச உதவி, சர்ஃபாக்டன்ட் சிகிச்சை, காஃபின் சிட்ரேட் சிகிச்சை, உடல் வெப்பநிலையை சீராக பராமரித்தல் மற்றும் தாயுடன் குழந்தையை நெருக்கமாக பராமரிக்கும் ‘கங்காரு மதர் கேர்’ உள்ளிட்ட சிகிச்சைகள் வழங்கப்படுகின்றன.

பயிற்சி பெற்ற குழந்தைகள் நல மருத்துவக் குழுவினர் 24 மணி நேரமும் இந்தப் பிரிவுகளில் பணியாற்றி வருவதாகவும் அரசு தெரிவித்துள்ளது.

தற்காலிக தட்டுப்பாடு ஏற்பட்டாலும் உடனடி கொள்முதல்

அத்தியாவசிய மருந்துகளின் விநியோகத்தில் தற்காலிக இடையூறு ஏற்பட்டால் அதை சமாளிக்க ஏற்கனவே கண்காணிப்பு நடைமுறையும், நிலையான செயல்பாட்டு வழிகாட்டுதல்களும் (SOP) நடைமுறையில் இருப்பதாக சுகாதாரத்துறை தெரிவித்துள்ளது.

குறிப்பாக சர்ஃபாக்டன்ட் போன்ற அவசரத் தேவையுள்ள மருந்துகளை மருத்துவமனைகள் தங்களிடம் உள்ள நிதியை பயன்படுத்தி உடனடியாக உள்ளூர் அளவில் கொள்முதல் செய்யும் நடைமுறை உள்ளது என கூறப்பட்டுள்ளது.

அனைத்து அரசு மருத்துவக் கல்லூரி மருத்துவமனைகளின் முதல்வர்கள் மற்றும் சுகாதார சேவைகள் இணை இயக்குநர்கள், தங்களது நிறுவன அளவில் கிடைக்கும் நிதியைப் பயன்படுத்தி சர்ஃபாக்டன்ட் மருந்துகளை தாமதமின்றி கொள்முதல் செய்ய வேண்டும் என அறிவுறுத்தப்பட்டுள்ளதாக தெரிவிக்கப்பட்டுள்ளது.

ஒரு குறைப்பிரசவ குழந்தைக்கு உயிர்காக்கும் மருந்து தேவைப்படும் நிலையில், நிதியும் கொள்முதல் நடைமுறையும் மருத்துவமனை அளவில் இருக்கும் போது, மருந்து கிடைக்காத காரணத்தால் குழந்தையை காத்திருக்க வைக்கக் கூடாது என்றும் அரசு வலியுறுத்தியுள்ளது.

TNMSC விநியோகம் மட்டுமே ஒரே வழி அல்ல

தமிழ்நாடு மருத்துவப் பணிகள் கழகம் (TNMSC) மூலம் வழங்கப்படும் மருந்து விநியோகம், மருத்துவமனைகளின் உள்ளூர் கொள்முதலுக்கு மாற்றாக அல்ல; அதற்கு கூடுதலான விநியோக ஆதாரமாகவே செயல்படுகிறது என தமிழக அரசு விளக்கம் அளித்துள்ளது.

தேவை ஏற்படும் போது மருத்துவ நிறுவனங்கள் உள்ளூர் அளவில் மருந்துகளை கொள்முதல் செய்யும் வகையிலும், அதே நேரத்தில் TNMSC மூலம் தொடர்ந்து கையிருப்பு அதிகரிக்கப்படும் வகையிலும் நடைமுறை வடிவமைக்கப்பட்டுள்ளதாக தெரிவிக்கப்பட்டுள்ளது.

ரூ.443.98 கோடி நிதி இருப்பதாக அரசு தகவல்

தற்போதைய நிலவரப்படி, மருத்துவக் கல்வி இயக்குநரகத்தின் கீழ் உள்ள நிறுவனங்களிடம் ரூ.409.81 கோடியும், மருத்துவப் பணிகள் இயக்குநரகத்தின் கீழ் உள்ள நிறுவனங்களிடம் ரூ.34.17 கோடியும் நிதி இருப்பதாக தமிழக அரசு தெரிவித்துள்ளது.

இதனால், சர்ஃபாக்டன்ட் உள்ளிட்ட அத்தியாவசிய மருந்துகளை தொடர்ந்து கிடைக்கச் செய்வதில் நிதி பற்றாக்குறை இல்லை என அரசு கூறியுள்ளது.

மேலும், உள்ளூரில் கிடைக்கும் நிதியை பயன்படுத்தி சர்ஃபாக்டன்ட் உள்ளிட்ட மருந்துகளை கொள்முதல் செய்ய வேண்டும் என்ற அறிவுறுத்தல் இன்று மீண்டும் அனைத்து தலைமை மருத்துவ அலுவலர்கள் மற்றும் குழந்தைகள் நல மருத்துவத் துறைத் தலைவர்களுக்கும் வழங்கப்பட்டுள்ளதாக தெரிவிக்கப்பட்டுள்ளது.

இந்த நடைமுறைகள் முறையாக பின்பற்றப்படுகிறதா என்பது சம்பந்தப்பட்ட இயக்குநரகங்களால் கண்காணிக்கப்படும் என்றும், உள்ளூர் கொள்முதல் நடைமுறையை பயன்படுத்துவதில் மருத்துவமனை அளவில் அலட்சியம் அல்லது தவறு ஏற்பட்டால் அது தீவிரமாக எடுத்துக்கொள்ளப்படும் என்றும் அரசு தெரிவித்துள்ளது.

முந்தைய அரசிலும் உள்ளூர் கொள்முதல் நடைமுறை

சர்ஃபாக்டன்ட் மற்றும் காஃபின் சிட்ரேட் மருந்துகளை உள்ளூர் அளவில் கொள்முதல் செய்யும் நடைமுறை ஏற்கனவே நடைமுறையில் உள்ளதாக தமிழக அரசு தனது மறுப்பு அறிக்கையில் குறிப்பிட்டுள்ளது.

இதற்காக தேசிய சுகாதார இயக்ககம் – தமிழ்நாடு சார்பில், 01.12.2025 தேதியிட்ட Rc.No.1233/P15/NHM/2022 என்ற உத்தரவின் மூலம் அனைத்து அரசு மருத்துவக் கல்லூரி மருத்துவமனை முதல்வர்கள் மற்றும் சுகாதார சேவைகள் இணை இயக்குநர்களுக்கும் சர்ஃபாக்டன்ட் மருந்துகளை உள்ளூரில் கொள்முதல் செய்ய அனுமதியும் அறிவுறுத்தலும் வழங்கப்பட்டிருந்ததாக அரசு தெரிவித்துள்ளது.

அரசு உறுதி

தமிழகத்தில் உள்ள ஒவ்வொரு பிறந்த குழந்தைக்கும் தரமான மருத்துவ சேவை கிடைப்பதை உறுதி செய்வதில் அரசு உறுதியாக இருப்பதாக சுகாதாரத்துறை தெரிவித்துள்ளது.

SNCU பிரிவுகளில் வழங்கப்படும் மருத்துவ சேவையின் தரமும், குறைப்பிரசவ குழந்தைகளுக்குத் தேவையான உயிர்காக்கும் மருந்துகளின் இருப்பும் பாதுகாக்கப்பட்டுள்ளதாக பொதுமக்களுக்கு தமிழக அரசு உறுதியளித்துள்ளது.