மிசா விவகாரம்: திமுகவின் ‘தியாக பிம்பம்’ உடைகிறதா? – தவெக ஐடி விங் கடும் விமர்சனம்.

மிசா விவகாரம் தொடர்பாக தமிழக அரசியலில் விவாதம் தீவிரமடைந்துள்ள நிலையில், திமுகவின் அரசியல் வரலாறு மற்றும் அதன் செயல்பாடுகளை கடுமையாக விமர்சித்து தமிழக வெற்றிக் கழகத்தின் தகவல் தொழில்நுட்ப அணி அறிக்கை வெளியிட்டுள்ளது.

திமுகவின் அரசியல் பிம்பம் குறித்து கடுமையான விமர்சனத்தை முன்வைத்துள்ள தவெக ஐடி விங், அரசியல் உள்ளம் இருக்க வேண்டிய இடத்தில் பள்ளம் இருந்தாலும் ஒருநாள் அது மேடாகலாம். ஆனால், உள்ளம் முழுவதும் கள்ளம் இருந்தால் அதன் பெயரே திமுக எனக் கூறியுள்ளது.

மேலும், 1969-ஆம் ஆண்டு பிப்ரவரி 3-ஆம் தேதிக்குப் பிறகான திமுகவையும், 1972-ஆம் ஆண்டு அக்டோபர் 10 மற்றும் 14-ஆம் தேதிகளுக்குப் பிறகான திமுகவையும் குறிப்பிட்டு, அக்கட்சியின் அரசியல் பயணம் குறித்து பல்வேறு விமர்சனங்களை தவெக ஐடி விங் முன்வைத்துள்ளது.

அரசியல் உள்ளம் இருக்க வேண்டிய இடத்தில் பள்ளம் இருந்தால்கூட பரவாயில்லை. என்றாவது ஒருநாள் மேடாகி விடும் அல்லது மேடேற்றி விடலாம். ஆனால், உள்ளம் முழுமையும் கள்ளம் இருந்தால்?. அதன் பெயர்தான் தி.மு.க. என்பதே சரி. அதுவும் 1969 பிப்ரவரி 3க்குப் பிறகான தி.மு.க. என்றால் அதுதான். அதிலும்…

— TVK IT Wing Official (@TVKHQITWingOffl) September 9, 2026

தமிழக அரசியல் களத்தில் ஊழலுக்கான தொடக்கப்புள்ளியை உருவாக்கியவர்கள் என திமுகவை விமர்சித்துள்ள தவெக ஐடி விங், சட்டமன்ற நிகழ்வுகள் நேரலையாக மக்களை சென்றடையும் நிலையில், தங்களது அரசியல் பிம்பம் மக்கள் மன்றத்தில் கேள்விக்குள்ளாகி வருவதால் திமுக தரப்பில் பதற்றம் ஏற்பட்டுள்ளதாகவும் குற்றம்சாட்டியுள்ளது.

பழைய சம்பவங்களை தியாக வரலாறாக சித்தரிக்கும் முயற்சி நடைபெறுவதாகவும் அந்தப் பதிவில் விமர்சிக்கப்பட்டுள்ளது. குறிப்பாக, பழையதாகிவிட்டால் அது திருட்டுக் கணக்கில் வராமல் தியாகக் கணக்கில் சேர்க்கப்படுமா என்ற கேள்வியையும் தவெக ஐடி விங் எழுப்பியுள்ளது.

மேலும், திமுகவின் தலைமையகமான அறிவாலயத்தை மையமாகக் கொண்டதாகக் கூறப்படும் அரசியல் பிம்பம் தற்போது சிதைந்து வருவதாகவும், இதனால் மக்களிடம் எந்த முகத்துடன் வாக்கு கேட்பது என்ற நிலைக்கு திமுக தலைமை தள்ளப்பட்டுள்ளதாகவும் அந்தப் பதிவில் கடுமையாக விமர்சிக்கப்பட்டுள்ளது.

தமிழக அரசியலில் புதிய அரசியல் இயக்கமாக உருவெடுத்துள்ள தவெக மீது திமுக தரப்பில் அவதூறு மற்றும் வெறுப்பு அரசியல் மேற்கொள்ளப்படுவதாகவும் தவெக ஐடி விங் குற்றம்சாட்டியுள்ளது. ஏழாவது முறையாகவும் தாங்களே ஆட்சிக்கு வருவோம் என்ற இறுமாப்பை மக்கள் சக்தி உடைத்துள்ளதாகவும் அந்தப் பதிவு தெரிவிக்கிறது.

தவெக தலைவர் விஜயை மையமாகக் கொண்டு திமுக தரப்பில் தொடர்ந்து விமர்சனங்கள் முன்வைக்கப்படுவதாகவும், அதற்கு பதிலளிக்கும் வகையில் தவெக ஐடி விங் தனது பதிவில் திமுகவின் அரசியல் அணுகுமுறையை கடுமையாக விமர்சித்துள்ளது.

திமுகவின் அதிகாரப்பூர்வ நாளிதழான முரசொலி குறித்தும் தவெக ஐடி விங் தனது பதிவில் விமர்சனம் முன்வைத்துள்ளது. ஒருகாலத்தில் தமிழுக்காக இயங்கியதாகக் கூறப்பட்ட முரசொலி, தற்போது அதன் தலையங்கங்கள் மற்றும் எழுத்து நடையால் தனக்குத்தானே அரசியல் பின்னடைவை உருவாக்கிக் கொள்வதாக அந்தப் பதிவில் விமர்சிக்கப்பட்டுள்ளது.

இறுதியாக, திமுக எவ்வளவு தியாகப் பிம்பத்தை உருவாக்க முயன்றாலும், விஜயின் அரசியல் எழுச்சியும், அவர் முன்வைக்கும் லஞ்சம் மற்றும் ஊழல் ஒழிப்பு அரசியலும் மக்கள் மன்றத்தில் திமுகவின் அவதூறு மற்றும் ஆதாய அரசியலுக்கு முடிவுகட்டும் என தவெக ஐடி விங் தனது பதிவில் தெரிவித்துள்ளது.

மிசா விவகாரத்தைத் தொடர்ந்து முதலமைச்சர் விஜய், முன்னாள் முதலமைச்சர் மு.க. ஸ்டாலின் மற்றும் இரு கட்சிகளின் சமூக வலைதள அணிகளுக்கு இடையே கருத்து மோதல் அதிகரித்து வரும் நிலையில், தவெக ஐடி விங் வெளியிட்டுள்ள இந்தப் பதிவு அரசியல் வட்டாரத்தில் கவனம் பெற்றுள்ளது.