வாணியம்பாடியில் தொடர் இருசக்கர வாகன திருட்டு: 2 பேர் கைது – 11 வாகனங்கள் பறிமுதல்.

வாணியம்பாடி மற்றும் சுற்றுவட்டார பகுதிகளில் தொடர்ந்து இருசக்கர வாகனங்கள் திருடுபோவதாக நகர காவல் நிலையத்திற்கு புகார்கள் வந்தன. இதையடுத்து, வாகனத் திருட்டில் ஈடுபடுபவர்களை கண்டறிந்து கைது செய்ய தனிப்படை அமைத்து போலீசார் தீவிர விசாரணை மேற்கொண்டு வந்தனர்.

இந்த நிலையில், வாணியம்பாடி பெருமாள்பேட்டை கூட்டு சாலையில் நகர போலீசார் வாகனத் தணிக்கையில் ஈடுபட்டிருந்தனர். அப்போது இருசக்கர வாகனத்தில் வந்த இருவரை போலீசார் பிடித்து விசாரணை நடத்தினர்.

விசாரணையின்போது இருவரும் முன்னுக்குப் பின் முரணாக பதிலளித்ததாக கூறப்படுகிறது. இதனால் சந்தேகமடைந்த போலீசார் இருவரையும் காவல் நிலையத்திற்கு அழைத்துச் சென்று தீவிர விசாரணை மேற்கொண்டனர்.

விசாரணையில் அவர்கள் திருவண்ணாமலை மாவட்டம் ஜமுனாமரத்தூர் பகுதியைச் சேர்ந்த தேவேந்திரன் மகன் சுபாஷ் (25) மற்றும் லட்சுமணன் மகன் அருண் (26) என்பது தெரியவந்தது.

மேலும், போலீசார் நடத்திய விசாரணையில் இருவரும் வாணியம்பாடி மற்றும் சுற்றுவட்டார பகுதிகளில் தொடர்ந்து இருசக்கர வாகனங்களை திருடியதாக தெரியவந்ததாக கூறப்படுகிறது.

இதையடுத்து, இருவரிடமிருந்தும் 11 இருசக்கர வாகனங்களை போலீசார் பறிமுதல் செய்தனர்.

தொடர்ந்து இருவர் மீதும் வழக்குப்பதிவு செய்த போலீசார், அவர்களை நீதிமன்றத்தில் ஆஜர்படுத்தி சிறையில் அடைத்தனர்.

வாணியம்பாடி மற்றும் சுற்றுவட்டார பகுதிகளில் நடைபெற்றதாக கூறப்படும் தொடர் இருசக்கர வாகனத் திருட்டு வழக்கில் இருவர் கைது செய்யப்பட்டு, 11 வாகனங்கள் பறிமுதல் செய்யப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.