தமிழக வெற்றிக்குரல் வாணியம்பாடியில் போலி மருத்துவர் புகார்: மருத்துவமனை நிர்வாகத்தினர் 4 பேர் மீது வழக்குப்பதிவு.
By
திருப்பத்தூர் மாவட்டம் வாணியம்பாடியில் போலி சான்றிதழ்களை சமர்ப்பித்து மருத்துவராக பணியாற்றியதாக கைது செய்யப்பட்ட நபர், தன்னை மருத்துவமனை நிர்வாகத்தினர் கட்டி வைத்து தாக்கியதாக அளித்த புகாரின் பேரில் 4 பேர் மீது போலீசார் வழக்குப்பதிவு செய்து விசாரணை நடத்தி வருகின்றனர்.
வாணியம்பாடி நியூடவுன் பைபாஸ் சாலையில் உள்ள கவின் மருத்துவமனையில் புதுச்சேரியைச் சேர்ந்த 30 வயதான பிரவீன்குமார் என்பவர் மருத்துவராக பணியாற்றி வந்ததாக கூறப்படுகிறது. சிறுநீரக நிபுணர் எனக் கூறி அவர் பணியாற்றி வந்த நிலையில், அவரது சிகிச்சை முறையில் சந்தேகம் ஏற்பட்டதாகவும், இதையடுத்து அவரது கல்விச் சான்றிதழ்கள் குறித்து மருத்துவமனை நிர்வாகம் ஆய்வு செய்ததாகவும் தெரிவிக்கப்பட்டுள்ளது.
போலி சான்றிதழ் சமர்ப்பித்ததாக குற்றச்சாட்டு
ஆய்வின்போது, பிரவீன்குமார் டிப்ளமோ டயாலிசிஸ் படிப்பு மட்டுமே முடித்திருந்த நிலையில், எம்.பி.பி.எஸ். மற்றும் சிறுநீரக மருத்துவ நிபுணர் தொடர்பான போலி சான்றிதழ்களை சமர்ப்பித்து பணியில் சேர்ந்ததாக தெரியவந்ததாக கூறப்படுகிறது.
இதுதொடர்பாக வாணியம்பாடி அரசு மருத்துவமனை தலைமை மருத்துவர் சிவகுமார் அளித்த புகாரின் அடிப்படையில், வாணியம்பாடி நகர போலீசார் வழக்குப்பதிவு செய்து விசாரணை மேற்கொண்டனர்.
விசாரணையின் அடிப்படையில் பிரவீன்குமார் போலி சான்றிதழ்களை பயன்படுத்தி மருத்துவராக பணியாற்றியதாக கூறி போலீசார் அவரை கைது செய்தனர்.
மருத்துவமனையில் கட்டி வைத்து தாக்கியதாக புகார்
இதற்கிடையே, கைது செய்யப்பட்ட பிரவீன்குமார் போலீசாரிடம் அளித்த புகாரில், தனது சான்றிதழ்கள் போலியானவை என்பது மருத்துவமனை நிர்வாகத்துக்கு தெரியவந்த பின்னர், மருத்துவமனையிலேயே தன்னை இரண்டு நாட்கள் கட்டி வைத்து தாக்கியதாக குற்றம்சாட்டியுள்ளார்.
இந்த தாக்குதலில் உடலின் பல்வேறு பகுதிகளில் காயங்கள் ஏற்பட்டதாகவும் அவர் புகாரில் தெரிவித்துள்ளார்.
மேலும், தனது தாயார் கவிதாவை மருத்துவமனை நிர்வாகத்தினர் தொடர்புகொண்டு, இரண்டு மாதங்களுக்கான சம்பளத்துடன் கூடுதலாக ரூ.10 லட்சம் வழங்கினால் மட்டுமே அவரது மகனை அனுப்புவோம் என கூறியதாகவும் பிரவீன்குமார் தனது புகாரில் குறிப்பிட்டுள்ளதாக தெரிவிக்கப்பட்டுள்ளது.
4 பேர் மீது வழக்குப்பதிவு
தனது தாயார் அளித்த தகவலின் அடிப்படையில் போலீசார் மருத்துவமனைக்கு வந்து தன்னை மீட்டதாகவும் பிரவீன்குமார் தெரிவித்துள்ளார்.
தன்னை தாக்கியதாக கூறப்படும் மருத்துவமனை நிர்வாகி கமல் ராவ், சென்னாம்பேட்டை பகுதியைச் சேர்ந்த தபரேஸ், ரஜினி மற்றும் சூர்யா ஆகியோர் மீது நடவடிக்கை எடுக்க வேண்டும் என்றும் அவர் புகார் அளித்துள்ளார்.
இந்த புகாரின் அடிப்படையில் வாணியம்பாடி நகர போலீசார் 4 பேர் மீது வழக்குப்பதிவு செய்து விசாரணை நடத்தி வருகின்றனர்.
போலி சான்றிதழ் பயன்படுத்தியதாக பிரவீன்குமார் மீது ஏற்கனவே போலீசார் நடவடிக்கை எடுத்துள்ள நிலையில், தற்போது மருத்துவமனை நிர்வாகத்தினர் மீது அளிக்கப்பட்டுள்ள புகாரும் விசாரணைக்கு உட்படுத்தப்பட்டுள்ளது. புகாரில் கூறப்பட்டுள்ள குற்றச்சாட்டுகள் தொடர்பாக போலீசாரின் விசாரணை மற்றும் அடுத்தகட்ட சட்ட நடவடிக்கைகளின் அடிப்படையிலேயே உண்மை நிலை தெரியவரும்.
