கிணற்றில் 2 பிஞ்சு குழந்தைகள்..! தாயும் கள்ளக்காதலனும் கைது – வாணியம்பாடி அருகே அதிர்ச்சி!

வாணியம்பாடி:

திருப்பத்தூர் மாவட்டம் வாணியம்பாடி அருகே விவசாயக் கிணற்றில் அழுகிய நிலையில் இரண்டு சிறுவர்களின் சடலங்கள் மீட்கப்பட்ட வழக்கில், குழந்தைகளின் தாய் சிவகாமி மற்றும் அவருடன் தொடர்பில் இருந்த ராஜா ஆகிய இருவரை ஆலங்காயம் போலீசார் கைது செய்துள்ளனர்.

ஆலங்காயம் அடுத்த பெத்தூர் பகுதியில் ஓய்வுபெற்ற கிராம நிர்வாக அலுவலர் பிரகாசத்துக்கு சொந்தமான விவசாய நிலத்தில் உள்ள கிணற்றில், கடந்த ஆகஸ்ட் 30-ஆம் தேதி இரண்டு சிறுவர்களின் சடலங்கள் மிதந்துள்ளன. தகவலறிந்து சென்ற ஆலங்காயம் போலீசார் மற்றும் தீயணைப்புத் துறையினர் சடலங்களை மீட்டு பிரேதப் பரிசோதனைக்காக அனுப்பி வைத்து விசாரணையைத் தொடங்கினர்.

முதற்கட்ட விசாரணையில், கிணற்றில் மீட்கப்பட்டவர்கள் திருவண்ணாமலை மாவட்டம் ஜமுனாமரத்தூர் அருகே வெளிச்சனூர் பகுதியைச் சேர்ந்த சேட்டு – சிவகாமி தம்பதியின் மகன்களான பிரதாப் (5), பிரேம்குமார் (2) என்பது தெரியவந்தது.

கணவர் சிறையில் இருந்த நிலையில் ஏற்பட்ட தொடர்பு

சிவகாமியின் கணவர் சேட்டு, செம்மரக் கடத்தல் வழக்கில் ஆந்திர மாநில சிறையில் இருப்பதாக போலீஸ் விசாரணையில் தெரியவந்துள்ளது. இந்த நிலையில், அத்திப்பட்டு பகுதியைச் சேர்ந்த ராஜாவுடன் சிவகாமிக்கு திருமணத்தை மீறிய தொடர்பு ஏற்பட்டதாக கூறப்படுகிறது. ராஜாவுக்கு ஏற்கனவே மனைவி மற்றும் மூன்று குழந்தைகள் இருப்பதாகவும் போலீஸ் விசாரணையில் தெரியவந்துள்ளது.

இந்த நிலையில், சிவகாமி கர்ப்பமாக இருந்ததாகவும், தனது இரு மகன்கள் புதிய வாழ்க்கைக்கு இடையூறாக இருப்பார்கள் என கருதி அவர்களை கொலை செய்ய திட்டமிட்டதாகவும் போலீஸ் விசாரணையில் தெரியவந்ததாக செய்திகள் தெரிவிக்கின்றன.

கிணற்றில் தள்ளியதாக விசாரணையில் தகவல்

கடந்த ஆகஸ்ட் 27-ஆம் தேதி சிவகாமி தனது இரண்டு குழந்தைகளையும் அழைத்துக்கொண்டு ஆலங்காயம் பகுதிக்கு வந்ததாகவும், பின்னர் ஆள் நடமாட்டம் குறைவான பகுதியில் உள்ள விவசாயக் கிணற்றில் இருவரையும் தள்ளிவிட்டு அங்கிருந்து சென்றதாகவும் போலீஸ் விசாரணையில் தெரியவந்துள்ளது.

குழந்தைகள் காணாமல் போனது தொடர்பாக ஜமுனாமரத்தூர் போலீசாருக்கும் தகவல் கிடைத்த நிலையில், சிவகாமியிடம் நடத்தப்பட்ட விசாரணையின் மூலம் குழந்தைகளின் சடலங்கள் தொடர்பான வழக்கில் முக்கிய தகவல்கள் கிடைத்ததாக கூறப்படுகிறது.

இதையடுத்து ஆலங்காயம் போலீசார் விசாரணையை தீவிரப்படுத்தி, சிவகாமி மற்றும் ராஜா ஆகிய இருவரையும் கைது செய்து, இருவர் மீதும் கொலை வழக்குப்பதிவு செய்தனர். பின்னர் நீதிமன்றத்தில் ஆஜர்படுத்தப்பட்ட இருவரும் நீதிமன்றக் காவலில் சிறையில் அடைக்கப்பட்டனர்.

பெற்ற தாயே தனது இரண்டு குழந்தைகளை கிணற்றில் தள்ளி கொலை செய்ததாக வெளியாகியுள்ள தகவல், வாணியம்பாடி மற்றும் சுற்றுவட்டாரப் பகுதிகளில் பெரும் அதிர்ச்சியையும் சோகத்தையும் ஏற்படுத்தியுள்ளது.

இந்த வழக்கில் கொலைக்கான முழுமையான காரணம் மற்றும் சம்பவத்தில் ராஜாவின் பங்கு குறித்து போலீசார் தொடர்ந்து விசாரணை நடத்தி வருகின்றனர்.