“திமுகவின் உள்நோக்கத்தை மக்களிடம் சொல்லவே சீட் குறைப்பு குறித்து பேசினார்” – பிரேமலதா கருத்துக்கு அமைச்சர் வன்னியரசு பதில்.

திருவள்ளூர் மாவட்டம், அம்பத்தூரில் உள்ள தனியார் திருமண மண்டபத்தில் தமிழ்நாடு ஆதிதிராவிடர் மற்றும் பழங்குடியினர் நலத்துறை ஆசிரியர் காப்பாளர் சங்கத்தின் முப்பெரும் விழா நடைபெற்றது.

இதில் சமூக நீதித்துறை அமைச்சர் வன்னியரசு சிறப்பு விருந்தினராக கலந்து கொண்டார். பல ஆண்டுகளாக சிறப்பாக பணியாற்றி ஓய்வு பெற்ற ஆசிரியர்களுக்கு பாராட்டு விழாவும், திருவள்ளூர் மாவட்ட ஆதிதிராவிடர் நலத்துறை பள்ளிகளில் 10 மற்றும் 12-ஆம் வகுப்பு பொதுத்தேர்வுகளில் அதிக மதிப்பெண்கள் பெற்ற மாணவ, மாணவிகளுக்கு பாராட்டு விழாவும் நடைபெற்றது.

விழாவில் அமைச்சர் வன்னியரசு, ஆசிரியர்கள் மற்றும் மாணவ, மாணவிகளுக்கு பாராட்டுச் சான்றிதழ்கள் மற்றும் கேடயங்களை வழங்கினார்.

நிகழ்ச்சியில் திருவள்ளூர் மாவட்ட ஆதிதிராவிடர் மற்றும் பழங்குடியினர் நலத்துறை அலுவலர் செந்தில்குமார், மாவட்ட முதன்மைக் கல்வி அலுவலர் அறிவழகன், மாவட்டக் கல்வி அலுவலர் அமுதா உள்ளிட்ட அதிகாரிகள், ஆசிரியர்கள், மாணவர்கள் மற்றும் பெற்றோர்கள் என 200-க்கும் மேற்பட்டோர் கலந்து கொண்டனர்.

இடைத்தேர்தல் ஆதரவு குறித்து அமைச்சர்

பின்னர் செய்தியாளர்களை சந்தித்த அமைச்சர் வன்னியரசுவிடம், இடைத்தேர்தலில் யாருக்கு ஆதரவு என்பது குறித்து கேள்வி எழுப்பப்பட்டது.

இதற்கு பதிலளித்த அவர், தாங்கள் மதச்சார்பற்ற சமூகநீதி வெற்றிக் கூட்டணியில் இருப்பதாகவும், இடைத்தேர்தலில் தங்கள் தலைவர் யாருக்கு ஆதரவு என முன்மொழிந்துள்ளாரோ, அதனை தாங்கள் வழிமொழிவதாகவும் தெரிவித்தார்.

பிரேமலதா விஜயகாந்த் கருத்துக்கு பதில்

அமைச்சர் பதவிக்காக விடுதலைச் சிறுத்தைகள் கட்சி கூட்டணியை மாற்றிக் கொண்டதாக பிரேமலதா விஜயகாந்த் கூறியதாக எழுப்பப்பட்ட கேள்விக்கு பதிலளித்த அமைச்சர் வன்னியரசு, தங்கள் தலைவரின் பேச்சின் பொருளை புரிந்து கொள்ளாமல் பிரேமலதா விஜயகாந்த் கருத்து தெரிவித்துள்ளதாக கூறினார்.

மேலும், கடந்த காலங்களில் திமுகவுடன் கூட்டணியில் இருந்தபோது விடுதலைச் சிறுத்தைகள் கட்சிக்கு குறைவான தொகுதிகள் ஒதுக்கப்பட்டதாகவும், புதிதாக கூட்டணியில் இணைந்த தேமுதிகவுக்கு அதிக தொகுதிகள் ஒதுக்கப்பட்டதாகவும் அவர் கூறினார்.

திமுகவுக்கும் விடுதலைச் சிறுத்தைகள் கட்சிக்கும் இடையே இருந்த முரண்பாடுகளை சுட்டிக்காட்டவே தங்கள் தலைவர் பேசியதாகவும், தேமுதிக தலைவர்களை குறைத்து மதிப்பிடும் நோக்கில் அந்த கருத்து தெரிவிக்கப்படவில்லை என்றும் அமைச்சர் விளக்கமளித்தார்.

திமுகவின் உள்நோக்கத்தை மக்களிடம் தெரியப்படுத்துவதற்காகவே தொகுதி பங்கீடு தொடர்பான அந்த கருத்து முன்வைக்கப்பட்டதாகவும் அவர் தெரிவித்தார்.

பெண்கள் குறித்த பேச்சு தொடர்பாக விமர்சனம்

பெண்களை இழிவுபடுத்தும் வகையில் யார் பேசினாலும் அது குறித்து கேள்வி எழுப்ப வேண்டியுள்ளதாக கூறிய அமைச்சர் வன்னியரசு, பெண்களை இழிவுபடுத்துபவர்கள் எந்த இயக்கத்தில் இருந்தாலும் அவர்கள் சனாதனவாதிகள் என்ற கருத்தையும் தெரிவித்தார்.

பிரேமலதா விஜயகாந்த் தங்கள் தலைவரை சாதி ரீதியாக பேசியதாகக் கூறிய அமைச்சர், அது அவரது அறியாமையை காட்டுவதாக விமர்சித்தார்.

புதிய தலைமைச் செயலகம் குறித்து கருத்து

புதிய தலைமைச் செயலகம் கட்டப்படுவது தொடர்பாகவும் அமைச்சர் வன்னியரசு கருத்து தெரிவித்தார்.

மக்களின் கருத்துகளை அறிந்து அவர்களின் முடிவுக்கு ஏற்ப அரசு செயல்பட்டு வருவதாகவும், புதிய தலைமைச் செயலகம் அமைப்பது தொடர்பாக மீனவ மக்களின் கருத்துகளும் கவனத்தில் கொள்ளப்பட வேண்டும் என்றும் அவர் தெரிவித்தார். இதுகுறித்து முதல்வர் உரிய முடிவை எடுப்பார் எனவும் கூறினார்.

மேலும், தமிழ்நாட்டுக்கு புதிய தலைமைச் செயலகம் தேவை என்பதில் மாற்றுக் கருத்து இல்லை என்றும், கடந்த காலங்களிலும் புதிய தலைமைச் செயலகம் அமைப்பதற்கான முயற்சிகள் மேற்கொள்ளப்பட்டதாகவும் அமைச்சர் குறிப்பிட்டார்.

பட்டினப்பாக்கத்தில் புதிய தலைமைச் செயலகம் அமைப்பது தொடர்பாக மீனவர்களின் வாழ்வாதாரம் குறித்த கவலைகள் முன்வைக்கப்பட்டுள்ள நிலையில், அவர்களின் கோரிக்கைகளை பரிசீலிப்பது முக்கியம் என அமைச்சர் வன்னியரசு தெரிவித்திருப்பது குறிப்பிடத்தக்கது.