“அரசின் ஒரு பைசா கூட செலவாகவில்லை” – தனியார் விமானப் பயணம் குறித்து கேரள முதல்வர் சதீசன் விளக்கம்.

திருவனந்தபுரம்: மலப்புரம் மாவட்டத்தில் ஏற்பட்ட வெள்ளம் மற்றும் மலையாற்று வெள்ளப்பெருக்கு பாதிப்புகளை பார்வையிடுவதற்காக மேற்கொண்ட விமானப் பயணத்திற்கு மாநில அரசின் நிதியில் இருந்து ஒரு ரூபாய் கூட செலவிடப்படவில்லை என கேரள முதலமைச்சர் வி.டி. சதீசன் தெரிவித்துள்ளார்.

மலப்புரம் பயணத்திற்காக விமானத்தை மலையாளியான தனது அறிமுகமான ஒருவர் ஏற்பாடு செய்து கொடுத்ததாகவும், அவரது பெயரை வெளியிட விரும்பவில்லை என்றும் சதீசன் கூறியுள்ளார். எதிர்காலத்திலும் இதுபோன்ற பயணங்களை மேற்கொள்வதில் தவறில்லை என்றும் அவர் தெரிவித்துள்ளார்.

செப்டம்பர் 21ஆம் தேதி மலப்புரம் மாவட்டத்தில் ஏற்பட்ட வெள்ளப்பெருக்கில் உயிரிழந்தவர்களின் குடும்பங்களை சந்திக்கவும், சம்பவ இடத்தை பார்வையிடவும் செல்ல வேண்டியிருந்ததாகவும், அப்போது வேறு வழியில் விரைவாகச் செல்ல முடியாத சூழ்நிலையில் அறிமுகமான ஒருவர் விமானத்தை ஏற்பாடு செய்து கொடுத்ததாகவும் அவர் விளக்கம் அளித்துள்ளார்.

“அரசு நிதியில் இருந்து செலவு செய்யப்படவில்லை”

தனது விமானம் மற்றும் ஹெலிகாப்டர் பயணங்களுக்கு தற்போதைய அரசு பதவியேற்ற பின்னர் அரசுக் கருவூலத்தில் இருந்து ஒரு ரூபாய் கூட செலவிடப்படவில்லை என சதீசன் தெரிவித்துள்ளார். முன்னைய அரசு காலத்தில் மாதம் ரூ.80 லட்சம் செலவில் ஹெலிகாப்டர் ஒப்பந்தம் செய்யப்பட்டிருந்ததாகவும், அந்த ஒப்பந்தம் செப்டம்பர் 19ஆம் தேதி முடிவடைந்ததாகவும் அவர் குறிப்பிட்டார்.

அந்த ஒப்பந்தத்தின்படி மாதத்திற்கு 25 மணி நேரம் வரை அரசு பயன்பாட்டிற்காக ஹெலிகாப்டரை பயன்படுத்த முடியும் என்றும், தாம் அதில் மூன்று அல்லது நான்கு மணி நேரம் மட்டுமே பயணம் செய்ததாகவும் சதீசன் தெரிவித்துள்ளார். அந்த ஹெலிகாப்டர் தற்போதைய அரசு பதவியேற்ற பின்னர் தனது பயணத்திற்காக இரண்டு முறை மட்டுமே பயன்படுத்தப்பட்டதாகவும் அவர் கூறியுள்ளார்.

“மலப்புறம் செல்ல வேறு வழி இல்லை”

செப்டம்பர் 21ஆம் தேதி சிவகிரி நிகழ்ச்சியில் இருந்து மலப்புறத்தில் உயிரிழப்புகள் ஏற்பட்ட பகுதிக்குச் செல்ல வேண்டியிருந்ததாகவும், அங்கு செல்லாமல் இருந்தால் முதலமைச்சர் சம்பவ இடத்தை பார்வையிடவில்லை என்ற விமர்சனம் எழுந்திருக்கும் என்றும் சதீசன் தெரிவித்துள்ளார்.

அந்த அவசர சூழ்நிலையில் வேறு போக்குவரத்து வழி கிடைக்காததால், தனியார் நபர் ஒருவர் விமானத்தை ஏற்பாடு செய்து கொடுத்ததாக அவர் கூறியுள்ளார். செப்டம்பர் 21ஆம் தேதி மலப்புறம் செல்ல சதீசன் சிறப்பு சார்ட்டர் விமானத்தை பயன்படுத்தியதாக அன்றைய செய்திகளும் தெரிவித்திருந்தன.

“பெயரை ஏன் வெளியிட வேண்டும்?”

விமானத்தை ஏற்பாடு செய்து கொடுத்த நபரின் பெயரை வெளியிட வேண்டிய அவசியம் இல்லை என்றும், அந்த நபர் எதிர்காலத்தில் ஏதேனும் சலுகையை எதிர்பார்த்து இதைச் செய்ததாக கருத வேண்டியதில்லை என்றும் சதீசன் தெரிவித்துள்ளார்.

அவசரத் தேவைக்காக முதலமைச்சர் சம்பவ இடத்திற்குச் செல்ல விமானம் ஏற்பாடு செய்து கொடுத்ததற்காக பின்னர் அரசு சலுகை வழங்கும் நிலை இருக்காது என்றும் அவர் கூறியுள்ளார்.

முன்னாள் முதல்வர்கள் குறித்தும் சதீசன் கருத்து

முன்னாள் முதலமைச்சர்களான பினராயி விஜயன் மற்றும் உம்மன் சாண்டி ஆகியோரும் தனியார் நபர்கள் ஏற்பாடு செய்த விமானங்களில் பயணம் செய்துள்ளதாக சதீசன் கூறியுள்ளார்.

இந்தியாவில் பல முதலமைச்சர்கள் இதுபோன்ற பயணங்களை மேற்கொள்வதாகவும், தேவையான சூழ்நிலையில் தானும் எதிர்காலத்தில் இதுபோன்ற பயணங்களை மேற்கொள்வேன் என்றும் அவர் தெரிவித்துள்ளார்.

இதற்கிடையில், சதீசனின் சார்ட்டர் விமானப் பயணம் குறித்து எதிர்க்கட்சித் தரப்பில் கேள்விகள் எழுப்பப்பட்டுள்ளன. விமானப் பயணச் செலவை யார் ஏற்றுக்கொண்டார்கள் என்பது தெளிவுபடுத்தப்பட வேண்டும் என மார்க்சிஸ்ட் கம்யூனிஸ்ட் கட்சியின் மாநிலச் செயலாளர் எம்.வி. கோவிந்தன் கூறியதாக செய்திகள் வெளியாகியுள்ளன.

முதலமைச்சர் தரப்பில், அரசின் நிதி பயன்படுத்தப்படவில்லை என்றும், தனிப்பட்ட அறிமுகம் கொண்ட ஒருவர் விமானத்தை ஏற்பாடு செய்ததாகவும் விளக்கம் அளிக்கப்பட்டுள்ளது. இந்த விவகாரம் தொடர்பான விவாதம் தொடர்ந்து நடைபெற்று வருகிறது.