அக்டோபர் 2 முதல் கட்டணமில்லா ‘வெற்றிப் பயணம்’ – 12,692 அரசு பேருந்துகளில் மகளிர், திருநர்களுக்கு இலவச பயணம்.

தமிழ்நாட்டில் மகளிருக்கான கட்டணமில்லா பேருந்து பயணத் திட்டம் மேலும் விரிவுபடுத்தப்பட்டு, ‘வெற்றிப் பயணம்’ என்ற பெயரில் அக்டோபர் 2ஆம் தேதி முதல் நடைமுறைக்கு வருகிறது. மகாத்மா காந்தியின் பிறந்தநாளான அக்டோபர் 2 முதல் இந்த விரிவுபடுத்தப்பட்ட திட்டம் செயல்படுத்தப்படும் என முதலமைச்சர் விஜய் அறிவித்துள்ளார்.

எந்தெந்த பேருந்துகளில் இலவச பயணம்?

தற்போது நகர்ப்புறங்களில் குறிப்பிட்ட சாதாரண பேருந்துகளிலும், 40 கி.மீ. வரையிலான மலைப்பகுதி சாதாரண பேருந்துகளிலும் மகளிர் கட்டணமின்றி பயணித்து வருகின்றனர்.

இந்நிலையில், ‘வெற்றிப் பயணம்’ திட்டத்தின் கீழ் இந்த வசதி மேலும் விரிவுபடுத்தப்படுகிறது.

இதன்படி,

• மாநகரம் மற்றும் நகர்ப்பகுதிகளில் இயக்கப்படும் எக்ஸ்பிரஸ் பேருந்துகள்
• எல்.எஸ்.எஸ். (LSS) பேருந்துகள்
• டீலக்ஸ் அரசு பேருந்துகள்
• மாவட்டங்களுக்கு இடையேயான புறநகர் சாதாரண பேருந்துகள்
• 40 கி.மீ.க்கு மேற்பட்ட மலைப்பகுதிகளில் இயக்கப்படும் சாதாரண பேருந்துகள்

ஆகிய சேவைகளிலும் மகளிர் கட்டணமின்றி பயணம் செய்ய முடியும்.

12,692 பேருந்துகள் திட்டத்தின் கீழ்

அரசுப் போக்குவரத்துக் கழகங்கள் மூலம் இயக்கப்படும் பேருந்துகளில் மொத்தம் 12,692 பேருந்துகள் ‘வெற்றிப் பயணம்’ திட்டத்தின் கீழ் கொண்டு வரப்படுவதாக தகவல்கள் தெரிவிக்கின்றன.

இதன் மூலம் நாள்தோறும் சுமார் 84.32 லட்சம் மகளிர் கட்டணமில்லா பயணத்தின் மூலம் பயன்பெறுவார்கள் என தெரிவிக்கப்பட்டுள்ளது.

மேலும், இத்திட்டத்தின் கீழ் சுமார் 85 சதவீத பேருந்து நடைகள் (Singles) இடம்பெறும் எனவும் தகவல்கள் வெளியாகியுள்ளன.

வருமான வரம்பு, பயண எண்ணிக்கை கட்டுப்பாடு இல்லை

‘வெற்றிப் பயணம்’ திட்டத்தில் பயன்பெற வருமான உச்சவரம்பு இல்லை என அறிவிக்கப்பட்டுள்ளது. அதேபோல், ஒரு குறிப்பிட்ட எண்ணிக்கையிலான பயணங்கள் மட்டுமே மேற்கொள்ள வேண்டும் என்ற கட்டுப்பாடும் இல்லை.

இதனால் தகுதியான மகளிர் தங்களது தேவைக்கேற்ப அரசு பேருந்துகளில் கட்டணமின்றி பயணம் செய்யும் வசதி கிடைக்கும்.

திருநர்களுக்கும் கட்டணமில்லா பயணம்

மகளிருடன் திருநர்களும் ‘வெற்றிப் பயணம்’ திட்டத்தின் கீழ் கட்டணமின்றி அரசு பேருந்துகளில் பயணம் செய்யலாம் என அறிவிக்கப்பட்டுள்ளது.

மாணவிகள், பணிபுரியும் பெண்களுக்கு பயன்

இந்தத் திட்ட விரிவாக்கத்தின் மூலம் தொலைதூரங்களில் உள்ள கல்லூரிகளுக்குச் செல்லும் மாணவிகள், பணியிடங்களுக்கு பயணம் செய்யும் பெண்கள் மற்றும் மருத்துவம் உள்ளிட்ட அத்தியாவசிய தேவைகளுக்காக பயணம் செய்யும் மகளிருக்கு பொதுப் போக்குவரத்தைப் பயன்படுத்துவது எளிதாகும் என அரசு தரப்பில் தெரிவிக்கப்பட்டுள்ளது.

ஆண்டுக்கு ரூ.6,000 கோடி செலவு

‘வெற்றிப் பயணம்’ திட்டத்தை செயல்படுத்துவதற்காக அரசுக்கு ஆண்டுதோறும் தோராயமாக ரூ.6,000 கோடி செலவாகும் என சட்டப்பேரவையில் அறிவிக்கப்பட்டுள்ளது.

திட்டத்தை நடைமுறைப்படுத்துவதற்கான மின்னணு பயணச்சீட்டு இயந்திரங்களின் (ETM) இணைப்பு மற்றும் சோதனைப் பணிகள் மேற்கொள்ளப்பட்டுள்ளதாகவும், செப்டம்பர் 25ஆம் தேதி சோதனை மற்றும் சரிபார்ப்புப் பணிகளும், செப்டம்பர் 27ஆம் தேதி சோதனை ஓட்டமும் நடைபெற்றதாகவும் செய்திகள் தெரிவிக்கின்றன.

தேர்தல் நடத்தை விதிமுறைகள் தொடர்பான நடைமுறை

மதுராந்தகம் மற்றும் தாராபுரம் சட்டமன்றத் தொகுதிகளில் இடைத்தேர்தல் அறிவிக்கப்பட்டுள்ள நிலையில், தேர்தல் நடத்தை விதிமுறைகள் அமலில் உள்ளன. இதனால் செங்கல்பட்டு மற்றும் திருப்பூர் மாவட்டங்களில் தேர்தல் நடத்தை விதிமுறைகள் விலக்கப்பட்ட பின்னரே இத்திட்டம் செயல்படுத்தப்படும் என தெரிவிக்கப்பட்டுள்ளது.

மாநிலத்தின் பிற பகுதிகளில் திட்டம் அக்டோபர் 2 முதல் நடைமுறைக்கு வரும் வகையில் ஏற்பாடுகள் செய்யப்பட்டுள்ளன.

முதல்வர் விஜய் அறிவிப்பு

இதுகுறித்து முதலமைச்சர் விஜய் வெளியிட்டுள்ள சமூக வலைதளப் பதிவில், தமிழ்நாட்டின் பாட்டி, அம்மா, அக்கா, தங்கைகள், பெண் குழந்தைகள் மற்றும் திருநர்களுக்கு அக்டோபர் 2 முதல் கட்டணமில்லா ‘வெற்றிப் பயணம்’ திட்டம் செயல்பாட்டுக்கு வரும் என தெரிவித்துள்ளார்.