12 ஆண்டுகளுக்குப் பிறகு மதுரை மீனாட்சி அம்மன் கோவில் குடமுழுக்கு நாளை நடைபெற உள்ளது!

12 ஆண்டுகளுக்குப் பிறகு நடைபெறும் விழா – பக்தர்களுக்காக 108 கழிப்பறைகள், கட்டுப்பாட்டு அறை உள்ளிட்ட சிறப்பு ஏற்பாடுகள்

மதுரை – செப்டம்பர் 16: மதுரை அருள்மிகு மீனாட்சி சுந்தரேசுவரர் திருக்கோயிலில் 12 ஆண்டுகளுக்குப் பிறகு நடைபெற உள்ள குடமுழுக்கு விழா நாளை (செப்டம்பர் 17) நடைபெற உள்ள நிலையில், பக்தர்களின் பாதுகாப்பு மற்றும் அடிப்படை வசதிகளுக்காக பல்வேறு சிறப்பு ஏற்பாடுகள் செய்யப்பட்டுள்ளன.

திருக்கோயிலுக்கு வரும் பக்தர்களுக்கு அரசு மருத்துவர்கள் மற்றும் செவிலியர்களுடன் கூடிய மருத்துவ உதவி மையங்கள், முகாம்கள் அமைக்கப்பட்டுள்ளன. மேலும், பக்தர்களின் வசதிக்காக 108 தற்காலிக கழிப்பறைகள் ஏற்பாடு செய்யப்பட்டுள்ளதுடன், பொதுமக்கள் அதிகம் கூடும் முக்கியமான இடங்களில் LED வண்ணத்திரைகள் அமைக்கப்பட்டுள்ளன. இதன் மூலம் குடமுழுக்கு நிகழ்வுகளை பக்தர்கள் நேரடியாகக் காணும் வகையில் ஏற்பாடுகள் செய்யப்பட்டுள்ளன.

மதுரை அருள்மிகு மீனாட்சி சுந்தரேசுவரர் திருக்கோயிலின் பரிவாரமூர்த்திகளுக்கான திருக்குடமுழுக்கு விழா செப்டம்பர் 16-ஆம் தேதி மாலை 5 மணி முதல் 6 மணி வரையும், தொடர்ந்து செப்டம்பர் 17-ஆம் தேதி காலை 7.40 மணி முதல் 8.10 மணி வரையும் நடைபெற உள்ளது. இதனைத் தொடர்ந்து அருள்மிகு மீனாட்சி சுந்தரேசுவரர் தங்க விமானங்கள் மற்றும் இராஜகோபுரங்கள் சமகாலக் குடமுழுக்கும், மூலவர் மீனாட்சி அம்மன் மற்றும் சுந்தரேசுவரர் சுவாமிகளின் கலசாபிஷேகமும் நடைபெற உள்ளது.

குடமுழுக்கு விழாவையொட்டி மாண்புமிகு அமைச்சர்கள், நாடாளுமன்ற மற்றும் சட்டமன்ற உறுப்பினர்கள், தவத்திரு ஆதீன பெருமக்கள், திருக்கோயில் அறங்காவலர்கள், ஆன்மிகப் பெரியோர்கள், உள்ளாட்சி அமைப்புகளின் பிரதிநிதிகள் மற்றும் பொதுமக்கள் பங்கேற்கும் வகையில் விழா ஏற்பாடுகள் செய்யப்பட்டுள்ளன.

மதுரை மீனாட்சி சுந்தரேசுவரர் திருக்கோயிலில் கடந்த 08.04.2009 அன்று குடமுழுக்கு நடைபெற்ற நிலையில், சுமார் 12 ஆண்டுகளுக்குப் பிறகு தற்போது குடமுழுக்கு நடைபெறுகிறது. இதனை முன்னிட்டு கோபுரங்கள் மற்றும் மண்டபங்களுக்கு மராமத்து பணிகள் மேற்கொள்ளப்பட்டதுடன், வர்ணம் பூசுதல் உள்ளிட்ட திருப்பணிகளும் மேற்கொள்ளப்பட்டுள்ளன. திருப்பணிகளுக்காக தொல்லியல் துறை வல்லுநர்களின் கருத்துரு, மதுரை மண்டல வல்லுநர் குழுவின் பரிந்துரை உள்ளிட்டவற்றின் அடிப்படையில் 86 திருப்பணிகளுக்கு ரூ.15.40 கோடியும், உபயதாரர் நிதி மூலம் 100 திருப்பணிகளுக்கு ரூ.16.89 கோடியும் என மொத்தம் ரூ.32.29 கோடி மதிப்பீட்டில் பணிகள் மேற்கொள்ளப்பட்டுள்ளதாக தெரிவிக்கப்பட்டுள்ளது.

மேலும், குடமுழுக்கு நிகழ்வை முன்னிட்டு அனைத்து துறை அலுவலர்களையும் ஒருங்கிணைத்து செயல்படும் வகையில் கட்டுப்பாட்டு அறை அமைக்கப்பட்டுள்ளது. இந்த கட்டுப்பாட்டு அறை இந்திரா கோபுரத்தின் கீழ் இராஜகோபுரத்திற்கு எதிர்ப்புறம் அமைந்துள்ள புதுமண்டபத்தில் செயல்பட்டு வருகிறது. பக்தர்களுக்கு நுழைவு வாயிலில் தண்ணீர், பிஸ்கெட் உள்ளிட்ட பிரசாதங்கள் வழங்க ஏற்பாடு செய்யப்பட்டுள்ளதுடன், பாதுகாப்பு மற்றும் சுகாதாரப் பணிகளும் மேற்கொள்ளப்பட்டுள்ளன.

குடமுழுக்கு விழாவையொட்டி மதுரையில் பக்தர்கள் அதிகளவில் கூட உள்ளதால், கூட்ட நெரிசல் கட்டுப்பாடு, பாதுகாப்பு, மருத்துவ உதவி, சுகாதாரம் மற்றும் பக்தர்களுக்கான அடிப்படை வசதிகள் உள்ளிட்ட ஏற்பாடுகள் தீவிரப்படுத்தப்பட்டுள்ளன.