மயிலாடுதுறையில் 8 ஆண்டுகளாக தொடரும் பாதாள சாக்கடை பிரச்சனை! சமூக ஆர்வலரின் வீடியோ வைரல்.

மயிலாடுதுறை :

மயிலாடுதுறை நகராட்சிப் பகுதிகளில் பாதாள சாக்கடை கழிவுநீர் சாலைகளில் வழிந்தோடுவதாகவும், இதனால் பல ஆண்டுகளாக சுகாதார சீர்கேடு நீடிப்பதாகவும் குற்றச்சாட்டு எழுந்துள்ளது. இதுதொடர்பாக சமூக ஆர்வலர் ஒருவர் வெளியிட்டுள்ள வீடியோ சமூக வலைதளங்களில் கவனம் பெற்றுள்ளது.

மயிலாடுதுறை நகராட்சியில் மொத்தம் 36 வார்டுகள் உள்ளன. சுமார் ஒரு லட்சம் மக்கள் வசிக்கும் இந்நகருக்கு, தினந்தோறும் 10 ஆயிரத்திற்கும் மேற்பட்டோர் வந்து செல்வதாக கூறப்படுகிறது.

2007 முதல் செயல்பாட்டில் பாதாள சாக்கடை திட்டம்

மயிலாடுதுறை நகரில் கடந்த 2007ஆம் ஆண்டு முதல் பாதாள சாக்கடை திட்டம் செயல்பாட்டில் இருந்து வருகிறது. இந்நிலையில், பாதாள சாக்கடை குழாய்களில் உடைப்பு உள்ளிட்ட பிரச்சனைகள் ஏற்பட்டு வருவதாகவும், இதன் காரணமாக கடந்த 2018ஆம் ஆண்டு முதல் நகரின் பல்வேறு பகுதிகளில் சாலைகள் சேதமடைந்து பள்ளங்கள் உருவாகி வருவதாகவும் புகார் தெரிவிக்கப்பட்டுள்ளது.

30-க்கும் மேற்பட்ட இடங்களில் இதுபோன்ற பிரச்சனைகள் ஏற்பட்டுள்ளதாகவும், சாலைகள் அவ்வப்போது சீரமைக்கப்பட்டாலும் மீண்டும் பாதிப்பு ஏற்படுவதாகவும் கூறப்படுகிறது.

சாலைகளில் வழிந்தோடும் கழிவுநீர்

மேலும், நகரின் பல்வேறு பகுதிகளில் ஆள்நுழைவு தொட்டிகள் வழியாக பாதாள சாக்கடை கழிவுநீர் சாலைகளில் வழிந்தோடுவதாகவும் குற்றச்சாட்டு எழுந்துள்ளது. சில இடங்களில் கழிவுநீர் மழைநீர் வடிகால்கள் மற்றும் வாய்க்கால்களில் திறந்துவிடப்படுவதாகவும் புகார் கூறப்படுகிறது.

இதனால் பொதுமக்கள் பயன்படுத்தும் சாலைகளில் துர்நாற்றம் வீசுவதுடன், சுகாதார பாதிப்புகள் ஏற்படும் சூழல் உருவாகியுள்ளதாகவும் அப்பகுதி மக்கள் தெரிவிக்கின்றனர்.

சமூக ஆர்வலர் வெளியிட்ட வீடியோ

இந்த நிலையில், மயிலாடுதுறை மாவட்டம் பெரம்பூர் கிராமத்தைச் சேர்ந்த சமூக சேவகர் பாரதிமோகன், நகரின் பல்வேறு பகுதிகளில் பாதாள சாக்கடை கழிவுநீர் சாலைகளில் தேங்கி நிற்பதை வீடியோவாக பதிவு செய்துள்ளார்.

அந்த வீடியோவில், பல ஆண்டுகளாக நீடித்து வரும் பாதாள சாக்கடை பிரச்சனைக்கு நகராட்சி நிர்வாகம், மாவட்ட நிர்வாகம் மற்றும் மக்கள் பிரதிநிதிகள் உரிய நிரந்தர தீர்வு காண வேண்டும் என அவர் கேள்வி எழுப்பியுள்ளார்.

மேலும், பொதுமக்களின் அடிப்படை சுகாதார பிரச்சனையாக மாறியுள்ள இந்த விவகாரத்தில் அதிகாரிகள் உடனடியாக தலையிட்டு நடவடிக்கை எடுக்க வேண்டும் என்றும் அவர் வலியுறுத்தியுள்ளார்.

நிரந்தர தீர்வு எப்போது?

பல ஆண்டுகளாக பாதாள சாக்கடை பிரச்சனை தொடர்வதாக கூறப்படும் நிலையில், சமூக வலைதளங்களிலும் இந்த விவகாரம் தற்போது பேசுபொருளாகியுள்ளது.

பாதாள சாக்கடை குழாய் உடைப்பு, சாலைகளில் கழிவுநீர் தேக்கம் உள்ளிட்ட பிரச்சனைகளுக்கு அவ்வப்போது மேற்கொள்ளப்படும் தற்காலிக நடவடிக்கைகளுக்கு பதிலாக, முழுமையான தொழில்நுட்ப ஆய்வு மேற்கொண்டு நிரந்தர தீர்வு காண வேண்டும் என்பதே பொதுமக்களின் கோரிக்கையாக உள்ளது.

இந்த விவகாரம் தமிழக அரசின் கவனத்திற்கும் கொண்டு செல்லப்பட்டு, மயிலாடுதுறை நகரின் நீண்டகால பாதாள சாக்கடை பிரச்சனைக்கு நிரந்தர தீர்வு கிடைக்க வேண்டும் என பொதுமக்கள் எதிர்பார்க்கின்றனர்.