மகனின் மருத்துவ சிகிச்சைக்காக விடுப்பு எடுத்த ஓட்டுநருக்கு பணியிட மாற்றமா? போக்குவரத்துக் கழக அதிகாரிகள் மீது கண்ணன் புகார்!

திருப்பத்தூர்: வாணியம்பாடி அடுத்த சுந்தரம்பள்ளி பகுதியைச் சேர்ந்த அரசு போக்குவரத்துக் கழக ஓட்டுநர் ஒருவர், மருத்துவ விடுப்புக்குப் பிறகு பணியிட மாற்றம் செய்யப்பட்டதாகவும், அதிகாரிகள் தன்னிடம் தரக்குறைவாகப் பேசியதாகவும் மாவட்ட ஆட்சியரிடம் புகார் மனு அளித்துள்ளார்.

மருத்துவக் காரணங்களுக்காக விடுப்பு

சுந்தரம்பள்ளி பகுதியைச் சேர்ந்த கண்ணன் (58), தர்மபுரி மண்டலம், சேலம் கோட்டத்திற்கு உட்பட்ட திருப்பத்தூர் பணிமனையில் ஓட்டுநராகப் பணியாற்றி வருகிறார். கடந்த ஆண்டு அவருக்குக் கால் எலும்பு முறிவு ஏற்பட்டதால் 25 நாட்கள் விடுப்பு எடுத்துள்ளார். இதேபோல், முடக்குவாதத்தால் பாதிக்கப்பட்ட தனது மகனை மருத்துவமனையில் அனுமதித்து, சுமார் 30 நாட்கள் உடனிருந்து கவனித்துக்கொள்வதற்காகவும் மருத்துவ விடுப்பு எடுத்ததாகக் கூறப்படுகிறது.

பேருந்து வழித்தடம் மாற்றப்பட்டதாகப் புகார்

தனக்கு இன்னும் சுமார் 251 நாட்கள் மருத்துவ விடுப்பு இருப்பதாகக் கூறும் கண்ணன், ஏற்கனவே ஓட்டுநராகப் பணியாற்றி வந்த திருப்பத்தூர் – தர்மபுரி வழித்தடப் பேருந்திலிருந்து மாற்றப்பட்டு, தற்போது பெங்களூரு செல்லும் பேருந்தில் பணியமர்த்தப்பட்டுள்ளதாகத் தெரிவித்துள்ளார்.

இந்தப் பணியிட மாற்றத்தால் மன உளைச்சலுக்கு ஆளானதாகக் கூறும் அவர், தனது கோரிக்கைகள் தொடர்பாக மாவட்ட ஆட்சியரிடம் மனு அளித்துள்ளார்.

அதிகாரிகள் மீது தரக்குறைவாகப் பேசியதாகக் குற்றச்சாட்டு

இதற்கிடையே, பணிமனை மேலாளர் செல்வகுமார், செக்கிங் இன்ஸ்பெக்டர் தமிழரசு மற்றும் கட்டுப்பாட்டாளர் சத்யராஜ் ஆகியோர் தன்னிடம் தரக்குறைவாகப் பேசியதாகக் கண்ணன் குற்றம்சாட்டியுள்ளார்.

மேலும், “நீ கலெக்டரிடம் வேண்டுமானாலும் போ, யாரிடம் வேண்டுமானாலும் போ. என்னை யாரும் எதுவும் செய்ய முடியாது. நாங்கள் சொல்லும் பேருந்தில்தான் வேலை செய்ய வேண்டும். இல்லையென்றால் வேலையை விட்டுச் செல்” என மிரட்டும் தொனியில் பேசியதாகவும் தனது புகார் மனுவில் குறிப்பிட்டுள்ளதாகத் தெரிவித்துள்ளார்.

மீண்டும் பழைய வழித்தடத்தில் பணியாற்ற கோரிக்கை

முடக்குவாதத்தால் பாதிக்கப்பட்ட தனது மகனின் மருத்துவச் சிகிச்சை மற்றும் பராமரிப்பைக் கருத்தில் கொண்டே விடுப்பு எடுத்ததாகக் கூறும் கண்ணன், தனக்கு நியாயம் கிடைக்க வேண்டும் எனக் கோரிக்கை விடுத்துள்ளார்.

மேலும், ஏற்கனவே பணியாற்றி வந்த திருப்பத்தூர் – தர்மபுரி வழித்தடப் பேருந்திலேயே மீண்டும் ஓட்டுநராகப் பணியாற்ற நடவடிக்கை எடுக்க வேண்டும் என்றும் வலியுறுத்தியுள்ளார்.

மருத்துவக் காரணங்களுக்காக விடுப்பு எடுத்த ஓட்டுநர் முன்வைத்துள்ள புகார்கள் குறித்து சம்பந்தப்பட்ட போக்குவரத்துக் கழக அதிகாரிகள் உரிய விசாரணை நடத்தி நடவடிக்கை எடுப்பார்களா என்ற எதிர்பார்ப்பு எழுந்துள்ளது.