தமிழக வெற்றிக்குரல் 200 மீட்டர் ஓட்டத்தில் 14 ஆண்டுகால தேசிய சாதனையை முறியடித்த ஓசூர் மாணவி மானசி!
By
K.Madesh
ஓசூர்:
தேசிய அளவிலான தடகளப் போட்டியில் 200 மீட்டர் ஓட்டப்பந்தயத்தில் 14 ஆண்டுகால சாதனையை முறியடித்து, ஓசூரைச் சேர்ந்த 12ஆம் வகுப்பு மாணவி மானசி புதிய சாதனை படைத்துள்ளார். சாதனை படைத்துத் திரும்பிய மாணவிக்கு அத்வைத் இன்டர்நேஷனல் அகாடமி பள்ளி நிர்வாகம் சார்பில் உற்சாக வரவேற்பு அளிக்கப்பட்டது.
25.12 வினாடிகளில் இலக்கைக் கடந்த மானசி
பஞ்சாப் மாநிலம் பாட்டியாலாவில், சிபிஎஸ்இ பள்ளிகளுக்கு இடையேயான தேசிய அளவிலான தடகளப் போட்டிகள் அக்டோபர் 15ஆம் தேதி முதல் 20ஆம் தேதி வரை நடைபெற்றன. நாடு முழுவதிலுமிருந்து மாணவ, மாணவிகள் பங்கேற்ற இப்போட்டியில், கிருஷ்ணகிரி மாவட்டம் ஓசூரில் உள்ள அத்வைத் இன்டர்நேஷனல் அகாடமி பள்ளியில் 12ஆம் வகுப்பு பயிலும் மாணவி மானசியும் கலந்து கொண்டார்.
இதில் 200 மீட்டர் ஓட்டப்பந்தயத்தில் பங்கேற்ற மானசி, பந்தயத் தூரத்தை 25.12 வினாடிகளில் கடந்து முதலிடம் பிடித்தார். இதன் மூலம், கடந்த 2012ஆம் ஆண்டு 25.61 வினாடிகளில் பதிவு செய்யப்பட்டிருந்த முந்தைய சாதனையை முறியடித்து, 14 ஆண்டுகளுக்குப் பிறகு புதிய தேசிய சாதனையைப் படைத்துள்ளார்.
பள்ளி நிர்வாகம் சார்பில் உற்சாக வரவேற்பு
சாதனை படைத்துத் திரும்பிய மாணவி மானசிக்கு, அத்வைத் இன்டர்நேஷனல் அகாடமி பள்ளி வளாகத்தில் பாராட்டு விழா நடைபெற்றது. பள்ளியின் நிறுவனர் அஸ்வத் நாராயணன் தலைமையில் நடைபெற்ற நிகழ்ச்சியில், மாணவிக்கு வெற்றிப் பதக்கம், மாலை மற்றும் பொன்னாடை அணிவித்து, மலர்க்கொத்து வழங்கி உற்சாக வரவேற்பு அளிக்கப்பட்டது.
மேலும், மாணவியின் வெற்றிக்குப் பயிற்சி அளித்த ஓட்டப்பந்தயப் பயிற்சியாளர் சேகருக்கும் பள்ளி நிர்வாகம் சார்பில் பாராட்டுகளும் வாழ்த்துகளும் தெரிவிக்கப்பட்டன. நிகழ்ச்சியில் பள்ளியின் முதல்வர், ஆசிரியர்கள், மாணவ, மாணவிகள், பெற்றோர் மற்றும் பள்ளி நிர்வாகத்தினர் உள்ளிட்ட ஏராளமானோர் கலந்து கொண்டு மாணவியைப் பாராட்டினர்.
2030 ஆசியப் போட்டியில் தங்கம் வெல்வதே இலக்கு!
தொடர்ந்து செய்தியாளர்களிடம் பேசிய மாணவி மானசி, 2030ஆம் ஆண்டு நடைபெறவுள்ள ஆசிய அளவிலான தடகளப் போட்டிகளில் 400 மீட்டர் ஓட்டப்பந்தயத்தில் பங்கேற்று, இந்தியாவுக்காகத் தங்கப் பதக்கம் வெல்வதே தனது அடுத்த இலக்கு எனத் தெரிவித்தார்.
தேசிய அளவில் சாதனை படைத்து ஓசூர் மாவட்டத்திற்குப் பெருமை சேர்த்த மாணவி மானசிக்கு பல்வேறு தரப்பினரும் வாழ்த்துகளைத் தெரிவித்து வருகின்றனர்.
